Read SEBR SÕNGO, 1998 2 Kibayã 8 Bible Online

2 Kibayã 8 - SEBR SÕNGO, 1998 bible

2 Kibayã 8

¹A Salmo rɩka yʋʋm pisi n me Sẽn-Ka-Saab roogã, ne yẽnda mengã na-zakã.

²Dẽ zugẽ, yẽnda lebg n mee tẽms nins a Huram sẽn dag n kõ yẽnda wã, n kɩt tɩ Israyɛll neb tɩ zĩnd b pʋsẽ.

³A Salmo kẽng n tɩ zaba ne Hamat-Soba tẽngã n deeg-a n sooge.

⁴La yẽnda maneg n mee Tadmoor sẽn be we-raoogẽ wã, ne kood bĩngr zĩis tẽmsã, n paas ne tẽms nins fãa yẽnda sẽn dag n zoe n me Hamat soolmã pʋgẽ n na n bĩngd a koodã.

⁵Yẽnda maneg n mee Bɛt-Horon tẽngã sẽn be tãngã zugã ne Bɛt-Horon tẽng ning sẽn be tãngã sɛɛgã, n ning lals sẽn tar pãng n gũbgi, la a yãk rignoy n ning kʋɩlems sẽn tar pɩgdse.

⁶La a mee Balaate, ne tẽms nins fãa yẽnda sẽn dag n kɩt tɩ b bĩngd a koodã, sẽn dag n yaa a Salmo rẽndã, la tẽms nins sẽn da bĩngd a zabr-saar-dãmbã, ne tẽms nins a sẽn da bĩngd a wed-moosã. A Salmo sẽn da rat bũmb nins fãa n me wã, a me-b-la Zeruzalɛm pʋgẽ, la Libã soolem pʋgẽ, la ne tẽms nins fãa yẽnda sẽn so wã pʋsẽ.

⁷Neb nins fãa sẽn dag n be Israyɛll pʋgẽ, n yaool n ka Israyɛll buudã neb ye. Yaa Ɛt tẽng nebã, Amo nebã, Perɛɛz nebã, Hɛɛv nebã, la Zebu nebã.

⁸Bãmb yaa neb nins Israyɛll nebã sẽn da bas n ka kʋ wã yagense, la b ra keta Zeruzalɛm. Yaa bãmb la a Salmo yãk tɩ b na n maan tʋʋm-wɛglã hal tɩ tãag rũndã.

⁹La a Salmo ka kɩt tɩ Israyɛll nebã maan tʋʋm-wɛglã ye, a kɩtame tɩ bãmb yaa a tãb-biisã la a wed-rʋʋdbã nanambse, la sẽn dag n get-b saar-dãmbã yellã nanambse.

¹⁰A Salmo kɩtame tɩ b yãk nanambs kobs-yi la pis-nu sẽn na n getẽ ninbuiidã fãa yelle.

¹¹Rĩm a Salmo peega Faarõ bi-puglã sẽn yaa a pagã n yiis a Davɩɩd tẽngã pʋgẽ, n tɩ kẽes-a roog ning yẽnda sẽn me n kõ-a wã pʋga. Bala, yẽnda rag n yetame tɩ rẽndã yĩng ka tog n kɩt tɩ pag zĩnd Israyɛll rĩm a Davɩɩd na-zakẽ wã ye. Bala, zĩig ning Sẽn-Ka-Saab kaoolã koglg sẽn zĩndẽ wã welga toore.

¹²Sẽn sɩng ne wakat-kãnga, rĩm a Salmo rag n maanda Sẽn-Ka-Saab maoong sẽn yõogd bugmã Sẽn-Ka-Saab tẽn-kugr ning yẽnda sẽn me Sẽn-Ka-Saab roogã noorã zugu.

¹³La daar fãa, a Salmo rag n maanda maoong sẽn yõogd bugum, ne vʋʋsg rayã, la ki-paalsã, la Sẽn-Ka-Saab tigindã wakate, wa a Moyiis tõogã sẽn da wilg bũmb ningã.

¹⁴Rĩm a Salmo maana wa a ba a Davɩɩd sẽn dag n wilg yẽnda wã, yẽnda ninga maan-kʋʋd fãa a zĩigẽ, la a ning Leevi nebã b zĩigẽ, tɩ b tõe n pẽgd Sẽn-Ka-Saab daar fãa wã, la b maand b tʋʋmd daar fãa n sõngd maan-kʋʋdbã, la a ning zag-no-gũudbã ned kam fãa ne a zag-no-gũudga, wa sẽn zems ned kam fãa ne a sulli, bala, woto yaa tõog ning Wẽnnaam dao a Davɩɩd sẽn dag n wilgã.

¹⁵La b ka tol n bʋdg n bas rĩmã sẽn dag n wilg tõog ning sẽn kẽed ne maan-kʋʋdbã, ne Leevi nebã, la baa sẽn kẽed laogã wɛɛngẽ.

¹⁶Dẽ, yɩɩ woto la b tõog n maan tʋʋm nins fãa a Salmo sẽn dag n dat n maanã n sɛ, sẽn sɩng ne Sẽn-Ka-Saab roogã yẽbgrã, n tɩ tãag a baoosgã daare. Dẽ, b maana Sẽn-Ka-Saab roogã tʋʋmd n sɛ.

¹⁷A Salmo yikame n kẽng Esɩyõ-Gebɛɛr tẽngã ne Eliyot sẽn be Edom soolmã pʋgẽ ko-kãsengã noorã.

¹⁸La beenẽ, a Huram tʋma a Salmo koom kogendo, ne neb sẽn mi koom kogendã rugsg sõama, tɩ b yãag a Salmo tʋmtʋmdbã n kẽng Ofɩɩr tẽnga. La bãmb talla sãnem kɩlo tus pisi la a yiib la pis-nu n wa kõ rĩm a Salmo.