Read SEBR SÕNGO, 1998 2 Kibayã 9 Bible Online

2 Kibayã 9 - SEBR SÕNGO, 1998 bible

2 Kibayã 9

¹Seba tẽng rĩm-poakã wʋma a Salmo yʋʋrã sẽn yi wã kibare. Dẽ, yẽnda waa Zeruzalɛm n na n mak a Salmo yamã ne sokds sẽn yaa yel-bũnã. Yẽnda wa ne a poorẽ dãmb wʋsgo, la yʋgma sẽn zɩt parfẽ-rãmbã, ne sãnem wʋsgo, la kug-sõama. La yẽnda sẽn ta rĩm a Salmo nengẽ, yẽnda soka a Salmo sokds nins fãa a sẽn da tar-a a sũurẽ wã.

²La rĩm a Salmo leoka a sokds fãa, la bũmb ba a yembr ka zĩnd sẽn solg t'a Salmo ka tõog n bilg a võor ye.

³Seba tẽng rĩm-poakã sẽn yãnd a Salmo yamã sẽn ta zĩig ningã, ne a na-zakã a sẽn me wã,

⁴la rɩɩb ning b sẽn talldẽ n wat rĩma taoorã, la a tʋmtʋmdbã rot sẽn yaa to-to wã, ne a sõgen-kambã tʋʋmã sẽn pʋɩ to-to wã, la fut ninsã b sẽn yerã, ne b sẽn get rĩmã bõn-yũudlã yell to-to wã, la rĩmã sẽn dʋʋd dʋʋdsã to-to n kẽed Sẽn-Ka-Saab roogã pʋgã, a maka goam n konge.

⁵Dẽ, yẽnda yeela rĩmã yaa: «Rẽnd mam sẽn dag n bee m tẽngẽ wã n wʋmd yãmb goamã kibarã, ne y yamã yellã sɩd yaa sɩd wɛ!

⁶Sã n ka mam sẽn wa tɩ m ninã yãndã, mam da ka sak n deeg tɩ yaa sɩd ye. La ade, mik mam sẽn dag n wʋmdã ka ta mam sẽn yã wã pʋɩ-sʋk meng ye. Yãmb yamã rãamd sẽn yi to-to wã, ne y arzegsã yɩɩda mam sẽn dag n wʋmd tɩ b gomdã.

⁷Ad neb nins sẽn be ne yãmbã yẽ tara sũ-noogo, neb nins sẽn tʋmd-b yãmb taoor daar fãa wã, tara sũ-noogo. Bala, bãmb bee ne yãmb wakat fãa n wʋmd y yam goamã!

⁸Bɩ Sẽn-Ka-Saab sẽn yaa yãmb Wẽnnaamã paam pẽgre. Bala, taa bãmb yam tɩ b yãk yãmb n kɩt tɩ y zaoond bãmb naam geerã zugu, n yɩ rĩma, Sẽn-Ka-Saab sẽn yaa yãmb Wẽnnaamã yʋʋr yĩnga! Bala, yaa Sẽn-Ka-Saab sẽn nong Israyɛlle, la b rat n kɩt t'a pa wakat fãa wã yĩnga, la bãmb sẽn kɩt tɩ yãmb lebg rĩma n soog yẽnda, tɩ yãmb maand sɩda, la y kaood bʋʋd ne tɩrlem.»

⁹Rẽ poore, Seba tẽng rĩm-poakã kõo rĩm a Salmo sãnem kɩlo tus a naas la kobessi, ne parfẽ-rãmb wʋsg sẽn tar yũ-noogo, la kug-sõama. Ned ka tol n leb n wa ne parfẽ-rãmb wʋsg sẽn tar yũ-noog a woto wa Seba tẽng rĩm-poakã sẽn wa n kõ rĩm a Salmo wã ye.

¹⁰Rĩm a Hiram ne rĩm a Salmo tʋmtʋmdbã sẽn dag n kẽnd Ofɩɩr tẽng n wat ne sãnemã me talla Sãntall ra-sõama, ne kug-sõama wʋsg n wa kõ rĩm a Salmo.

¹¹Rĩm a Salmo kɩtame tɩ b rɩka ra-sõama wã n pees ra-kʋgs Sẽn-Ka-Saab roogã ne na-yirã yĩnga, la b maana kʋla ruuds yɩɩn-yɩɩndbã yĩnga. La b ka tol n leb n yãnda buud Zʋʋda tẽnga pʋgẽ yɛs ye.

¹²Rĩm a Salmo kõo Seba rĩm-poakã bũmb nins fãa a sẽn dag n dat n kosã. Rĩm a Salmo sẽn kõ Seba tẽng rĩm-poakã bũmb ningã yɩɩda bũmb ninga a sẽn tall n wa kõ yẽnda wã. Rẽ zugẽ, Seba rĩm-poakã lebg n kuila a tẽngẽ, yẽnda ne a poorẽ dãmbã.

¹³Sãnem ning rĩm a Salmo sẽn dag n paamd yʋʋmd fãa wã yaa kɩlo tus pisi,

¹⁴n paas ne yaood nins yẽnda sẽn dag n deegd toandbã ne lɛɛbdbã nengẽ wã, la ne Araabi rĩm-dãmbã nengẽ wã. Soolem-dãmb a taabã rĩm-dãmbã, ne tẽngã kombɛɛmbã me rag n wat n kõta a Salmo sãnem la wanzuri.

¹⁵Rĩm a Salmo kɩtame tɩ b kud sãnem n maan gãn-bɛd kobessi, la gãong a yembr fãa zɩslem yaa kɩlo a yoobe.

¹⁶La a kɩt tɩ b maan gãn-bãooneg kobs-tã, la b rag n talla sãnem kɩlo a tãab n maan gãn-bil a yembr fãa. Dẽ, rĩm a Salmo kɩtame tɩ b bĩng bãmb roog ning b sẽn boond tɩ Libã tɩɩs roogã pʋga.

¹⁷Rĩm a Salmo kɩtame tɩ b maan geer sẽn yaa bedr ne wobd yẽna, n bolg-a ne sãnem halaale.

¹⁸Geerã rag n tara rʋʋdg sẽn tar kogs a yoobe, la sãnem nao roagendg sẽn tong ne geerã, la b maana nug-gãtse, la nus kʋgs geerã kɩrems a yiibã fãa, la b maan gɩgmã a yiib tɩ b yas yĩngr n yegl nug-kʋgsã, a yembr goabga, a yembr dɩtgo.

¹⁹La b maana gɩgmã piig la yiibu, tɩ b yas rʋʋdsã kogs a yoobã zut n tong goabg la a rɩtgo. B rag n zɩ n maan bũmb a woto buud soolem ba a ye pʋgẽ ye.

²⁰Rĩm a Salmo sẽn dag n tar lagd nins n yũudã fãa rag n maana ne sãnem, la teed nins fãa sẽn dag n be roog ning b sẽn boond tɩ Libã tɩɩs roogã pʋgẽ wã maana ne sãnem halaale. Bũmb dag n ka be beenẽ sẽn maan ne wanzuri ye. Bala, rĩm a Salmo zamaanẽ wã, b rag n ka geelgd wanzuri wa bũmb sẽn tar yõod wʋsg ye.

²¹Bala, rĩmã rag n tara koom kogl-bɛd sẽn digd Tarsɩɩs ne rĩm a Huram nebã. La yʋʋm a tãab fãa, bãmb lebgdẽ n wata ne sãnem, wanzuri, wobd yẽna, la wãamse, ne bulwãado.

²²Rĩm a Salmo waa n lebga kãseng n yɩɩd dũniyã rĩm-dãmba fãa ne arzegse, la ne yam me.

²³Dũniyã rĩm-dãmbã fãa rag n baood n yãnda rĩm a Salmo, sẽn na n yɩl n wʋm yam goam nins Wẽnnaam sẽn kõ-a wã.

²⁴Nin-kãensã ned kam fãa sã n dag n watẽ, a zãada a kũuni. Yaa wanzuri teedo, sãnem teedo, futu, zab-teedo, parfẽ-rãmb sẽn tar yũ-noogo, la wed-moos ne bõense. B rag n maanda a woto yʋʋmd fãa.

²⁵Rĩm a Salmo ra tara ro-bãooneg tus a naase wiidã yĩnga, la a tar saar-dãmba, ne wed-rʋʋdb tus piig la a yiibu. Rĩm a Salmo yãka tẽms tɩ yaa saar-dãmbã ne wiidã bĩngr zĩiga, la a ning kẽer Zeruzalɛm pʋgẽ n pẽneg rĩmã.

²⁶Rĩm a Salmo rag n sooga rĩm-dãmb nins fãa sẽn da be Efrat kʋɩlsã noorã, ne Filistẽ-dãmbã tẽmsã, hal n tɩ tãag Ezɩpt tẽnga toadga.

²⁷Rĩm a Salmo kɩtame tɩ wanzuri wã lebg wʋsg wa kug-zaals Zeruzalɛm pʋgẽ, la a kɩt tɩ sɛɛdr tɩɩsã lebg wʋsg wa wom-seesã sẽn be kunkubẽ wã.

²⁸B rag n tara wed-moos n yit Ezɩpt ne tẽms a taabã fãa n wat n kõt a Salmo.

²⁹B gʋlsa rĩm a Salmo vɩɩmã kibarã sẽn ketã, a sɩngr n tãag a sɛɛbo, no-rɛɛs a Natã sebrã pʋga, la no-rɛɛs a Ayiya sẽn yit Sɩlo no-reesg koɛɛgã pʋga, la yãt a Yedo vẽnegrã sebr pʋga, a sẽn gomd a Nebat biig a Zeroboaam yellã wɛɛngẽ.

³⁰A Salmo zĩnda Zeruzalɛm n dɩ naamã yʋʋm pis-naas n soog Israyɛll tõrã fãa.

³¹Rĩm a Salmo saka a saam-dãmba, la b mum-a-la a ba a Davɩɩd Tẽngã pʋga. La yaa a biig a Roboaam n deeg a zĩig n lebg rĩmã.