Read SEBR SÕNGO, 1998 A Ɛsdraase 1 Bible Online

A Ɛsdraase 1 - SEBR SÕNGO, 1998 bible

A Ɛsdraase 1

¹Pɛrs-rãmbã rĩm a Siruus naamã pipi yʋʋmdã pʋga, sẽn na n yɩl tɩ Sẽn-Ka-Saab sẽn dag n kɩt tɩ b no-rɛɛs a Zeremi togsã paam pidsgu, Sẽn-Ka-Saab ninga a Siruus sũurẽ n kɩt t'a moone, la a gʋls n togs a soolmã fãa pʋg n yeel yaa:

²Ade, Pɛrs-rãmbã rĩm a Siruus yetame: «Sẽn-Ka-Saab sẽn yaa saasẽ Wẽnnaamã kõo maam pãng tɩ m soog dũniyã soolmã fãa. La b kõo maam tʋʋmd tɩ m me roog Zeruzalɛm, Zʋʋda soolmã pʋg n kõ-ba.

³Ned sã n be yãmb sʋkã, n yaa Sẽn-Ka-Saab neda, bɩ a Wẽnnaam zĩnd ne-a t'a lebg n leb Zeruzalɛm sẽn be Zʋʋda soolmẽ wã, n tɩ me Sẽn-Ka-Saab sẽn yaa Israyɛll nebã Wẽnnaamã roogo. Wẽnnaam ning sẽn be-a Zeruzalɛmã!

⁴Israyɛll nebã sẽn be zĩig ning fãa, zĩ-kãng nebã tog n sõnga bãmba, n kõ-b wanzuri, sãnem, laog ne rũmsi. La b tog n kõ-b-la yamleoog kũun me, Zeruzalɛm Wẽnd doogã meeb yĩnga!»

⁵Dẽ, Zʋʋda buudã ne Benzame buudã kãsem-dãmbã, ne maan-kʋʋdbã, n paas Leevi buudã nebã, ne neb nins fãa Sẽn-Ka-Saab sẽn sɩɩs b sũy tɩ b tɩ me bãmb doogã seglame n na n kẽng n tɩ me Sẽn-Ka-Saab roogã sẽn be Zeruzalɛmã.

⁶Bãmb yagsã fãa sõng-b lame, n kõ-b wanzuri ne sãnem teedo, la laog a taaba. B kõo bãmb rũmsi, ne teed wʋsg sẽn tar yõodo, n paas yamleoog kũuni, roogã meeb yĩnga.

⁷La rĩm a Siruus lebsa Sẽn-Ka-Saab roogã teedã, teed nins naab a Nebukatnedzaar sẽn dag n tɩ wʋk Wẽnnaam doogã sẽn be Zeruzalɛmã pʋgẽ wã, n wa ning a meng wẽn-naandgã roogẽ wã.

⁸Pɛrs-rãmbã rĩm a Siruus kɩtame tɩ laogã gũud a Mitredat yiis teedã n sõd n kɩs Zʋʋda tẽng na-biig a Sesbatsaare.

⁹Ad teedã sõore: Yaa sãnem laas pis-tã, wanzuri laas tusri, ne sʋʋs pisi la a wɛ.

¹⁰Sãnem laas pis-tã, wanzuri la-boagl kobs-naas la piiga, n paas teed a taab tusri.

¹¹Sãnemã ne wanzuri wã teed fãa sõor yaa tus a nu la kobs-naase. La a Sesbatsaar sẽn wa n na n yi Babilond ne yembsã n lebg n leb Zeruzalɛmã, a wʋka rẽndã fãa n zɩ n looge.