Read SEBR SÕNGO, 1998 A Ɛsdraase 5 Bible Online

A Ɛsdraase 5 - SEBR SÕNGO, 1998 bible

A Ɛsdraase 5

¹Daar a yembre, Wẽnnaam no-rɛɛsdb a yiibu, a Aaze, ne a Ido biig a Zakari togsa pĩnd-n-bãngr gomde, Zʋɩf-rãmb nins sẽn be Zeruzalɛmã ne Zʋʋda pʋgẽ wã wɛɛngẽ, ne Israyɛll Wẽnnaamã sẽn be ne bãmbã yʋʋre.

²Dẽ, a Seyaltiyɛll biig a Zorobabɛlle, ne a Yotsadak biig a Zozoe yikame n sɩng Wẽnnaam doogã sẽn be Zeruzalɛmã meebo. La Wẽnnaam no-rɛɛsdbã sẽn be beenẽ wã sõng-b lame.

³La Wakat-kãng bala, gʋvɛrneer a Tatnayi sẽn so Efrat kʋɩlgã rʋʋndã, ne a Setaar-Boznayi, ne b tʋmd-n-taasã kẽnga bãmb nengẽ n tɩ sok-b yaa: «Yaa ãnda soab n kõ yãmb noor tɩ y lebs n me Wẽnnaam doogã, la y yik a lalsã?»

⁴Dẽ, b leb n yeelame yaa: «Togs-y tõnd neb nins sẽn naag roogã meeb pʋgẽ wã yʋyã.»

⁵La Wẽnnaam dag n bee ne Zʋɩf-rãmbã kãsem-dãmba. Dẽ, b ka tõog n kɩt tɩ b yals tʋʋmdã ye. B kẽnga taoore, la b gũud b sẽn na n tɩ togs rĩm a Daryuus yellã, la rĩmã sẽn na n tʋm leokr ning tɩ wa yel-kãng wɛɛngẽ.

⁶Gʋvɛrneer a Tatnayi sẽn be Efrat kʋɩlgã rʋʋndã, ne a Setaar-Boznayi ne b tʋmd-n-taasã sẽn yit Afarsak sẽn be Efrat kʋɩlgã rʋʋndã gʋlsa sebr n tʋm dĩm a Daryuusi.

⁷B gʋlsa sebrã n yeel yaa: «Rĩm a Daryuusi, bɩ y vɩɩmd ne laafɩ la bãane!

⁸Tõnd dat n togsa rĩmã, tɩ tõnd gilga Zʋʋda soolmã pʋga, n kẽng Wẽnnaam-kãsengã roogẽ, la d mikame tɩ Zʋɩf-rãmbã lebs n meta roogã ne kug-peesdse, la b ningd ra-bɛd n met a lalsã. B sɩd tʋmda tʋʋmdã ne maag-m-menga, la a kẽngda tao-tao.

⁹La tõnd soka kãsem-dãmbã yaa: Ãnda n kõ yãmb noor tɩ y lebs n me ro-kãngã, la y maneg n yik a lalsã?

¹⁰La tõnd leb n soka bãmb n na n bãng neb nins sẽn get tʋʋmdã yellã yʋyã, sẽn na n yɩl n gʋls tʋʋmdã taoor dãmb yʋy n wa kõ yãmba.

¹¹Ad b sẽn leok tõnd to-to: Tõnd yaa yĩngr la tẽng Wẽnnaamã tʋmtʋmdba, la tõnd lebs n meta roog ning Israyɛll rĩm-kãseng a yembr sẽn dag n me hal yʋʋm zãrã.

¹²La tõnd yaab-rãmbã rag n maaname tɩ Wẽnnaam sẽn be yĩngrã sũurã yiki. Dẽ, Wẽnnaam basame tɩ Babilond naab a Nebukatnedzaar sẽn yaa Kalde rãmbã buudã sãam Wẽnd doogã, la a yõg nebã n kẽes yembd Babilonde.

¹³La baoosgo, rĩm a Siruus sẽn deeg a naamã tɩ yʋʋmde, a kõo noor tɩ b lebs n me Wẽnnaam doogã.

¹⁴Naab a Nebukatnedzaar dag n wʋka sãnemã ne wanzuri wã teedã sẽn dag n be Wẽnnaam doogã pʋg Zeruzalɛmã, n kẽng n tɩ ning Babilond wẽnd doogã pʋga. La rĩm a Siruus yiisa teedã Babilond wẽnd doogẽ wã n kɩs ned a yembr yʋʋr sẽn boond t'a Sesbatsaare. A Sesbatsaar yaa rĩm a Siruus sẽn dag n yãk ned ning n kɩt t'a lebg Zʋʋda gʋvɛrneerã.»

¹⁵La rĩmã yeela a Sesbatsaar yaa: «Wʋk te-bãmbã, tɩ b sã n wa lebs n me Wẽnnaam doogã a pĩnd zĩigẽ wã Zeruzalɛm tẽngã pʋga, bɩ f kẽng n tɩ ning-b beenẽ.»

¹⁶Yaa rẽ n kɩte, t'a Sesbatsaar wa Zeruzalɛm ka, n wa lebs n yẽbg Wẽnnaam doogã. La sẽn sɩng ne badaare, b meta Wẽnnaam doogã, la a ket nan ka me n sɛ ye.

¹⁷Dẽ wã, sã n taa rĩmã yam, bɩ b kɩt tɩ b vees Babilond dĩm-dãmbã seb-kʋdã pʋse, n ges rĩm a Siruus sã n dag n kõo noor tɩ b lebs n me Wẽnnaam doogã sẽn be Zeruzalɛmã bɩ a ka kõ. La rẽ poore, bɩ rĩmã togs tõnd bãmb yam-yãkr sẽn yaa to-to yel-kãngã wɛɛngẽ.