Read SEBR SÕNGO, 1998 A Ɛsdraase 7 Bible Online

A Ɛsdraase 7 - SEBR SÕNGO, 1998 bible

A Ɛsdraase 7

¹Bõn-kãens zugẽ, Pɛrs-rãmbã rĩm a Artagzɛrzɛɛs naamã wakate, a Ɛsdraas yii Babilond n wa. Yẽnda rag n yaa a Seraya biiga, n yaa maan-kʋʋr kãsem a Aarõ yagenga. A Seraya yaa a Azariya biiga, t'a Azariya yaa a Hilkiiza biiga,

²t'a Hilkiiza yaa a Salum biiga, t'a Salum yaa a Sadok biiga, t'a Sadok yaa a Akituub biiga,

³t'a Akituub yaa a Amariya biiga, t'a Amariya yaa a Azariya biiga,

⁴t'a Azariya yaa a Merayot biiga, t'a Merazot yaa a Zerakiya biiga, t'a Zerakiya yaa a Uuzi biiga, t'a Uuzi yaa a Buki biiga.

⁵La a Buki yaa a Abisuwa biiga, t'a Abisuwa yaa a Fine biiga, t'a Fine yaa a Eleyazaar biiga, t'a Eleyazaar yaa Maan-kʋʋd kãsem a Aarõ biiga.

⁶A Ɛsdraas yii Babilond n wa, yẽnda yaa ned sẽn tar bãngre, n mi a Moyiis tõodã sõama. Yaa tõod nins Sẽn-Ka-Saab sẽn yaa Israyɛll Wẽnnaamã sẽn dag n kõ a Moyiisã. La Sẽn-Ka-Saab sẽn dag n be ne yẽnda wã yĩnga, rĩmã kõo yẽnda bũmb ning fãa a sẽn kosã.

⁷Rĩm a Artagzɛrzɛɛs sẽn deeg a naamã tɩ yʋʋm yopoɛɛlẽ, Israyɛll neb kẽer waa Zeruzalɛm. Yaa maan-kʋʋdbã, yɩɩn-yɩɩndbã, zag-noy gũudbã, ne sẽn tʋmd-b Wẽnnaam doogẽ wã fãa.

⁸La a Ɛsdraas tũu nin-bãmbã n wa Zeruzalɛm kiuug a nu soabã pʋgẽ, rĩmã sẽn deeg a naamã tɩ yʋʋm yopoɛɛlẽ.

⁹A Ɛsdraas yãka yam n yi Babilond pipi kiuugã pipi daare, la Wẽnnaam nug-sõngã sẽn dag n gũud yẽnda wã yĩnga, a taa Zeruzalɛm kiuug a nu soabã pipi daare.

¹⁰Sɩd me, a Ɛsdraas rag n zãmsda Sẽn-Ka-Saab tõodã ne a sũur fãa, la a sakd-ba, la a rɩkd Sẽn-Ka-Saab tõodã ne b noyã n zãmsd Israyɛll nebã.

¹¹Ad sebr ning rĩm a Artagzɛrzɛɛs sẽn gʋls n kõ maan-kʋʋd a Ɛsdraas sẽn yaa ned sẽn mi Sẽn-Ka-Saab tõodã ne b noyã yell sõama wã. Sebrã koɛɛg yetame:

¹²«Maam a Artagzɛrzɛɛs sẽn yaa rĩm-dãmbã rĩmã n gʋlsd seb-kãngã, n kõt maan-kʋʋd a Ɛsdraas sẽn yaa ned sẽn mi Saasẽ Wẽnnaamã tõodã yell sõama wã.

¹³Ade, mam yetame tɩ y bas Israyɛll neb nins fãa sẽn be mam soolmẽ wã, b maan-kʋʋdbã ne Leevi buudã nebã sẽn dat n tũ foomã, tɩ b tũ foom n kẽng Zeruzalɛm.

¹⁴Yaa maam ne m kug-zĩidb a yopoe wã n tʋmd foom tɩ f kẽng Zʋʋda soolmẽ wã ne Zeruzalɛm, n tɩ ges b sã n sakda fo Wẽnnaamã tõod nins fo sẽn zãadã wa sẽn segde.

¹⁵La f zɩ wanzuri wã ne sãnemã, maam a rĩmã ne m kug-zĩidbã sẽn kõ ne yamleoog Israyɛll Wẽnnaamã sẽn be Zeruzalɛmã yĩngã n kẽnge.

¹⁶La f kell n zã wanzuri wã ne sãnemã fo sẽn na n dees Babilond soolmã pʋgẽ wã, ne kũun nins fãa nebã ne maan-kʋʋdbã sẽn kõ ne yamleoog bãmb Wẽnnaamã roog sẽn be Zeruzalɛmã yĩngã.

¹⁷La f sã n ta beenẽ, bɩ y modg n dɩk ligdã n da lolse, pe-raado, pe-ribli, la bũmb nins fãa sẽn segde, sẽn yaa bõn-koaadl kũuni, la reezẽ rãam kũuni, n tall n maan maoong yãmb Wẽnnaamã roog sẽn be Zeruzalɛmã tẽn-kugrã zugu.

¹⁸La rẽ poore, bɩ foom ne neb nins sẽn tũud foomã rɩk sẽn ketã, n maan yãmb sẽn date, wa sẽn zems yãmb Wẽnnaamã tʋlsem.

¹⁹La f rɩk laasã b sẽn kɩs foomã n tɩ ning fo Wẽnnaamã roog sẽn be Zeruzalɛmã pʋga.

²⁰La bũmb sã n ket fo sẽn tog n maan f Wẽnnaamã roog meeb wɛɛngẽ, bɩ f kɩt tɩ b yãk yaoodã na-yirã laog pʋgẽ n kõ-fo.

²¹Maam, dĩm a Artagzɛrzɛɛse, mam yeta soolmã ligd-gũudbã fãa sẽn be Efrat kʋɩlgã rʋʋndã, tɩ b kõ a Ɛsdraas sẽn yaa maan-kʋʋda la a yaa Saasẽ Wẽnnaamã tõodã gʋlsdã bũmb ning fãa a sẽn na n kosã.

²²Bɩ y kõ yẽnda sẽn tõe n ta wanzuri kɩlo tus a tãabo, la ki peoog koabga, ne rãam-yʋy kobs-naase, la kaam litr kobs-naase, ne yamsem, wa yãmb sẽn tõe tɛka.

²³Saasẽ Wẽnnaamã sẽn kõ noor ning tɩ b maan bũmb nins Wẽnd doogã meeb wɛɛngẽ wã, b tog n maan-a-la wa sẽn segde, tɩ Wẽnnaam sũ-puugr da wa lʋɩ rĩmã soolmã, ne a kom-dibli wã zug ye.

²⁴La sẽn paas me, tõnd wilgda ligd-gũudbã tɩ b ka tog n kɩt tɩ maan-kʋʋdbã, ne Leevi buudã, la yɩɩn-yɩɩndbã, ne zag-noy gũudbã, la Wẽnnaam doogã tʋmtʋmdbã yao yaoodo, bɩ yõor yaoodo, wall sor yaood ye.

²⁵La mam yeta foom a Ɛsdraas tɩ f tall yam ning fo Wẽnnaamã tõod bãngr sẽn be fo nugẽ wã, n yãk bʋ-kaoodba, ne tõodã bãngdba, tɩ b tõe n ges neb nins fãa sẽn be kʋɩlgã rʋʋnde, n mi yãmb Wẽnnaam tõodã bʋʋd kaoob yellã. La f kɩt tɩ sẽn ka mi-b tõodã bãng-ba.

²⁶La ned ning sẽn na n zãgs-a n ka sak fo Wẽnnaamã tõodã ne rĩmã rẽndã, bɩ b sɩbg a soabã wa sẽn segde, a soabã sã n zems kʋʋbo, bɩ b kʋ-a, wall b yiis-a buudẽ, ka rẽ bɩ b rees a laogã n bas-a, wall b kẽes-a bi-bees roogo.»

²⁷A Ɛsdraas zẽka a koɛɛg n pʋʋs n yeele: «Bɩ Sẽn-Ka-Saab sẽn yaa tõnd yaab-rãmbã Wẽnnaamã paam pẽgre. Bãmb sẽn ning rĩmã sũurẽ t'a na n kɩt tɩ Sẽn-Ka-Saab roogã sẽn be Zeruzalɛmã leb n paam a waoogrã yĩnga.

²⁸La yaa Sẽn-Ka-Saab n kɩte, tɩ rĩmã ne a kug-zĩidbã, la a nin-kãsemsã nong maam. Sẽn-Ka-Saab sẽn yaa mam Wẽnnaamã nug sẽn be mam zugã yĩnga, b kõo maam pãnga, tɩ m tõog n tigim Israyɛll nanambsã tɩ b na n tũ maam n kẽnge.»