Read SEBR SÕNGO, 1998 A Ɛsdraase 9 Bible Online

A Ɛsdraase 9 - SEBR SÕNGO, 1998 bible

A Ɛsdraase 9

¹Yel-kãens fãa zugẽ, nanambsã wa n yeela maam yaa: «Israyɛll nebã, ne maan-kʋʋdbã, la Leevi nebã ka welg b mens ne tẽn-kãngã nebã ye. Bala, Kana nebã, ne Hɛt nebã, la Perɛɛz nebã ne Zebuus nebã, la Amo nebã, ne Moaab nebã, la Ezɩpt nebã, ne Amoor nebã sẽn maand tʋʋm-beed ninsã, bãmb me maanda a woto.

²Bala, bãmb peega nin-bãmb kom-pugli n maan b pagba, la b peeg n kõ b kom-dibli wã me tɩ b maan b pagba, n kɩt tɩ Wẽnnaam nebã kalem ne tẽn-bãmbã nebã. Yaa nanambsã ne taoor-dãmbã n yɩ pipi n maan yel-be-kãngã.»

³La mam sẽn wʋm yel-kãngã wã, mam pãrsa m futã ne m kobrã, la m gʋsd m zoobdã ne m toɛɛngã, la mam sũurã sãama zãnga, tɩ m lʋɩ n zĩnd tẽng ne sũ-sãanga.

⁴Dẽ, Zʋɩf-rãmb nins sẽn yi yembd pʋgẽ n wa wã, n zoet Israyɛll Wẽnnaamã, n ka rat n maan yel-beed ning Zʋɩf-rãmbã sẽn maanã wa n tigmã taab mam nengẽ. La mam kell n paa woto hal tɩ ta zaabr maoongã maaneg wakate.

⁵La zaabr maoongã maaneg wakat sẽn ta, mam yika m sũ-sãangã pʋg n yi. Mam dag n ket n yera m fu-pãrendã ne m kob-pãorengã. Mam yĩgimda m dũmã zutu, n zẽk m nus n tees Sẽn-Ka-Saab sẽn yaa mam Wẽnnaamã.

⁶La mam pʋʋsa Wẽnnaam n yeel yaa: «Mam Wẽnnaam, yãnd n tar maam, yãndã tara maam tɩ m ka tol n tõe n zẽk m neng yãmb taoor ye. Tõnd yel-wẽnã yaa wʋsgo, tɩ b zãntlmã yɩɩd tõnd woglmã, tõnd beegrã zamame n tol n tat saasẽ.

⁷Hal sẽn sɩng ne tõnd yaab-rãmbã zamaan tɩ ta rũndã, tõnd buudã maana yel-wẽn-bɛda. La yel-kãens yĩng kɩtame tɩ bu-zẽms rĩm-dãmb tõog tõnd ne d rĩm-dãmbã, la d maan-kʋʋdbã. B tõoga tõnd ne zabr sʋʋga, n kẽes tõnd yembd pʋga, la b fã-do, la b ning tõnd yãnde. Yaa rẽ n kɩt tɩ lebg a woto rũndã wã.

⁸La baoosgo, sẽn nan ka kaoose, yãmb a Sẽn-Ka-Saab sẽn yaa tõnd Wẽnnaamã, wilga tõnd y nimbãan-zoeere, n kɩt tɩ tõnd buudã neb nins sẽn põsã lebg n wa zĩnd yãmb a Wẽnnaam soolmã sẽn yaa zĩ-sõngã pʋga. Tõnd Wẽnnaam, yãmb maana woto n kɩt tɩ tõnd nin puki, yãmb leb n kõ-d-la vɩɩm bilf d yembdã pʋga.

⁹Tõnd Wẽnnaam, yaa sɩda, tõnd dag n yaa yembse, la yãmb ka bas tõnd yembdã pʋg ye. Yãmb kɩtame tɩ Pɛrs-rãmbã rĩm-dãmbã zoe tõnd nimbãanega. Bãmb basa tõnd tɩ d vɩɩmde, n tõog n lebs n me yãmb roogã, n yik a lal-wedsã, la d paam zĩ-soalgdg sẽn tar pãng Zeruzalɛm ne Zʋʋda pʋgẽ.

¹⁰La moasã, tõnd Wẽnnaam, bũmb ning sẽn maana poore, tõnd na n yeelame tɩ bõe? Bala, tõnd kɩɩsa yãmb tõodã.

¹¹Yaa tõod nins yãmb sẽn dag n tũnug y no-rɛɛsdbã n yeel tɩ: Yãmb sẽn dabd n na n tɩ reeg tẽng ning n soogã yaa tẽn-dẽgdo, bala, neb nins sẽn be a pʋgẽ wã yaa rẽgdo. La b maana b tʋʋm-beedã n kɩt t'a pid ne rẽgd zĩiga fãa.

¹²Dẽ wã, da rɩk-y y kom-pugli n kõ bu-zẽm-bãmbã kom-dibli wã tɩ b maan b pagb ye. La y ra bao bãmb kom-pugli wã n kõ y kom-dibli tɩ b maan b pagb me ye. Bɩ yãmb da bao tɩ nin-bãmbã yɩ neer wall b paam naar ye. Dẽ, yãmb na n yɩɩ buud sẽn tar pãnga, la y na n dɩɩ tẽngã laog yõodo, la y na n dɩk-a lame n bas ne y yagensã t'a lebg bãmb pʋɩɩr wakat fãa yĩnga.

¹³Tõnd Wẽnnaam, yaa tõnd tʋʋm-wẽnsã ne d yel-wẽnã sẽn yaa wʋsgã yĩng la yel-bãmbã sẽn paam tõndã. La baa ne rẽ fãa, yãmb ka sɩbg tõnd wa sẽn zems tõnd yel-wẽnã ye. La yãmb kell n basa tõnd tɩ d põse, n wa be ka.

¹⁴Dẽ wã, na n maana a wãn tɩ tõnd na n leb n kɩɩs yãmb tõodã, n maan lagem-n-taar ne bu-zẽmsã kãadem pʋgẽ, n maan tʋʋm-beed a woto? Sã n yɩ woto, yãmb sũur kõn yik tɩ y sãam tõnd n ka bas ned ba a yembr tɩ põs sɩda?

¹⁵Sẽn-Ka-Saab sẽn yaa Israyɛll Wẽnnaam, yãmb yaa tɩrga, bala, tõnd neb kẽer põsame n ket n vɩ. Yaa rẽ n kɩt tɩ yaa a woto rũndã. Dẽ wã, baa tõnd sẽn yaa yel-wẽn-dãmbã, baa ne tõnd ned ba a yembr sẽn dag n ka tog n põsã, tõnd bee yãmb taoore.»