Read SEBR SÕNGO, 1998 A Neemi 1 Bible Online

A Neemi 1 - SEBR SÕNGO, 1998 bible

A Neemi 1

¹A Hakaliya biig a Neemi goamã. Rĩm a Artagzɛrzɛɛs sẽn deeg a naamã tɩ yʋʋm pis-yiiblẽ, Kislɛv kiuugã pʋga, mam dag n bee Suuz na-tẽngẽ wã,

²la mam saam-biisã ned a yembr yʋʋr sẽn boond t'a Hanani ne neb a taab yii Zʋʋda n wa mam nengẽ. La mam sok-b lame n na n bãng Zʋɩf-rãmb nins b sẽn yõg n kellã, ne Zeruzalɛm tẽngã yell sẽn yaa to-to.

³Dẽ, bãmb leoka maam yaa: «Neb nins b sẽn ka yõg n kẽes yembdã wa n bee Zʋʋda soolmẽ wã, la b bee nimbãan-kãseng ne yãnd pʋga. Bala, Zeruzalɛm lalgã lebga weds n gilgi, t'a kʋɩlemsã fãa rɩ bugum.»

⁴Dẽ, mam sẽn wʋm koe-kãensã wã, mam zĩndame n yãbe. Mam dɩka rasem wʋsg n maan sũ-sãanga, la m loe noor n pʋʋs saasẽ Wẽnnaamã.

⁵Mam pʋʋsame n yeele: «Sẽn-Ka-Saab sẽn yaa saasẽ Wẽnnaam, yãmb yaa Wẽnnaam-kãseng sẽn tar pãnga, yãmb pidsda y kaoolã ne neb nins sẽn sakd yãmb tõodã, la yãmb maanda neb nins sẽn nong yãmbã neere!

⁶Mam kot-y lame tɩ y kɩll y tʋbr n kelg-ma, la y puk y nin n ges-ma, la y wʋm m pʋʋsgã m sẽn pʋʋsd yãmbã, bala, mam yaa y tʋmtʋmda. Mam bee yãmb taoor dũndã n pʋʋsd yãmb wĩndg la yʋngo, Israyɛll nebã sẽn yaa yãmb tʋmtʋmdbã yĩnga. Mam vẽnegd n togsda yãmb tõnd Israyɛll nebã yel-wẽnã tõnd sẽn maan n beeg yãmbã. Yaa sɩda, maam ne m buudã kongame.

⁷Tõnd sɩd maana sẽn ka zems n beeg yãmba. Tõnd kɩɩsa yãmb tõodã ne y noyã, la y no-tũudsã yãmb sẽn dag n kõ y tʋmtʋmd a Moyiisã.

⁸Mam kot-y lame tɩ y tẽeg goam nins yãmb sẽn dag n gom ne y tʋmtʋmd a Moyiisã. Yãmb dag n yeelame: «Yãmb sã n ka sak n tũ maam, mam na n kɩtame tɩ yãmb sãeeg n kẽ bu-zẽmsã sʋka.»

⁹La rẽ poore, yãmb sã n lebg n wa mam nengẽ, n deeg mam tõodã, n sak-ba, mam na n leb n tigsa yãmba, baa yãmb sẽn sãeeg n be dũniyã zĩig ning fãa, mam na n talla yãmb n lebg n wa zĩig ning mam sẽn yãk n ning m yʋʋrã.»

¹⁰Zu-soaba, bãmb yaa yãmb tʋmtʋmdba, la b yaa yãmb nebã. Yaa bãmb la yãmb sẽn fãag ne y pãn-kãsengã, la yaa ne y nug sẽn tar pãngã la y fãag-ba.

¹¹Dẽ wã yaa Zu-soaba, m kot-y lame tɩ y kɩll y tʋbr n kelg m pʋʋsgã, la y kelg y tʋmtʋmdbã sẽn tar datem tɩ zoe yãmb yʋʋrã pʋʋsgo! Zu-soaba, kɩt-y tɩ mam sẽn dat n maan bũmb ning rũndã wã tõoge, la y kɩt tɩ rĩmã sak n zoe mam nimbãanega, n leok m kosgã. Wakat-kãnga, mam dag n yaa rĩmã bõn-yũudl kɩta.