Read SEBR SÕNGO, 1998 A Neemi 2 Bible Online

A Neemi 2 - SEBR SÕNGO, 1998 bible

A Neemi 2

¹Rĩm a Artagzɛrzɛɛs sẽn deeg naam tɩ yʋʋm pis-yiiblẽ, Nisãn kiuugã pʋga, daar a yembre, reezẽ rãamã rag n tẽga rĩmã taoore, tɩ mam dɩk n na n kõ rĩmã, la mam neng zɩ n gãnem rĩmã taoor wa badaarã ye.

²Dẽ, rĩmã soka maam yaa: «Bõe yĩng tɩ f neng gãnem a woto? Fo bũmb yaool n ka zabd ye. La yaa bõe sũ-sãang n tar foom?» La rabeem-kãseng yõka maam.

³La mam yeela rĩmã yaa: «Wẽnd na kaoos-yã! Mam neng ka tõe n ka gãnem ye! Bala, mam yaab-rãmbã yaad sẽn be tẽng ningã sãamame, la a kʋɩlemsã fãa rɩɩ bugum.»

⁴Dẽ, rĩmã soka maam tɩ m datame tɩ b maan bõe n kõ-ma. La mam pʋʋsa saasẽ Wẽnnaamã,

⁵la m yaool n na n leok rĩmã n yeel yaa: «N-na! Yãmb sã n data, la y sã n nong maam, bɩ y kõ-m noore, tɩ m kẽng Zʋʋda soolmẽ wã, zĩig ning mam yaab-rãmbã yaad sẽn beẽ wã, n tɩ lebs tẽngã n me.»

⁶Rĩmã pag rag n zĩ a sɛɛgẽ, la rĩmã soka maam yaa: «Fo so-toakã na n dɩka rasem a wãna? La yaa rabʋr la fo na n lebg n wa?» Woto, taa rĩmã yam t'a sak n bas maam tɩ m na n kẽnge, la mam wilga rĩmã mam sẽn na n lebg n wa daar ninga.

⁷Mam leb n yeela rĩmã yaa: «N-na! M kotame tɩ sã n ta y yam, bɩ y gʋls sɛb n kõ-ma, tɩ m tɩ kɩs soolem ning sẽn be Efrat kʋɩlgã rʋʋndã gʋvɛrneer-dãmbã, tɩ b bas-m tɩ m pɩʋʋg b soolmã n kẽng Zʋʋda.

⁸Mam data sebr a to me n tɩ kɩs rĩmã tɩɩs naab a Azaf t'a kõ-m daad sẽn na n maneg tãb-sikã kʋɩlems sẽn pẽ Wẽnd doogã. La raad me m sẽn na n maneg tẽngã lalgã, ne roog ninga mam sẽn na n zĩnd a pʋgẽ wã.» Woto, rĩmã kõo maam seb-kãense, bala, mam Wẽnnaamã nug-sõngã rag n bee mam zugu.

⁹Dẽ, mam kẽnga gʋvɛrneer-dãmb nins sẽn be Efrat kʋɩlgã rʋʋndã nengẽ, n tɩ kɩs-b rĩmã sɛbã. Rĩmã rag n yãka tãb-biis ne wed-rʋʋdba, n kɩt tɩ b yãagd maam m tʋʋmdã pʋga.

¹⁰Woto, Horon tẽng rao a Sãmbalat ne a tʋmd-n-taag a Tobiza sẽn yaa Amo nedã sẽn wʋm tɩ ned n wat n na n sõng Israyɛll nebã, b sũyã sãama wʋsgo.

¹¹Woto, mam taa Zeruzalɛm, n pa beenẽ rasem a tãabo.

¹²Dẽ, mam yika ne yʋngo, n peeg neb kẽere, la mam yaool n dag n ka tol n togs ned mam Wẽnnaamã sẽn ning mam sũurẽ tɩ m maan bũmb ning Zeruzalɛm tẽngã yĩngã ye. La mam ka tall rũm-zoambdg a to tɩ ka rũng ning mam sẽn dag n zombdã ye.

¹³Woto, mam tũu noor ning sẽn teesd longã n yi ne yʋngã, n kẽng bulg ning b sẽn boond tɩ piryõngã sẽnẽ, n tɩ ta noor ning b sẽn boond tɩ tãmpʋʋr noorã. La mam maaga m meng n gilg n ges Zeruzalɛm lalsã, la mam yãame t'a lalsã fãa lebga wedse, la a kʋɩlemsã rɩɩ bugum.

¹⁴Mam kell n kẽng n taa tẽngã noor ning sẽn be ko-bundgã sẽn pẽ rĩmã bãkã sɛɛgẽ, la vɩʋʋgã wa n ka leb n be sẽn sekd mam rũngã m sẽn zombã loogr ye.

¹⁵Dẽ, mam kell n tũu Sedrõ ko-soogã ne yʋngã, n kell n maag m meng n get lalsã. La mam lebgame n tũ longã sẽnẽ noorã n lebg n lebe.

¹⁶La nanambsã ka mi mam sẽn dag n kẽngẽ, la b ka mi mam sẽn dag n maand bũmb ning me ye. Bala, hal tɩ ta badaare, mam dag n ka tol n yeel Zʋʋde tẽng nebã tɩ bũmb ye. Hal baa ne maan-kʋʋdbã, ne kãsem-dãmbã, wall nanambsã, baa ne neb a tãabã sẽn get-b tʋʋmdã yellã fãa, mam ka tol n togs-b tɩ bũmb ye.

¹⁷Dẽ, mam yeel-b lame yaa: «Yãmb nee nimbãaneg ning pʋg tõnd sẽn be wã. Zeruzalɛm tẽngã sãama zãnga, b yõoga a kʋɩlemsã bugum! Rẽ wã, bɩ y wa tɩ d lebs n me Zeruzalɛm lalsã, n tõog n yiis d tẽngã yãnde.»

¹⁸La mam togsa bãmb mam Wẽnnaamã nug-sõngã sẽn be mam zug to-to wã, la rĩmã sẽn yeel maam bũmb ningã. La zĩig pʋgẽ, bãmb zẽka b koees n yeele: «Yik-y tɩ d me!» Dẽ, bãmb paama raood n na n maan tʋʋm-sõng-kãngã.

¹⁹La Horon dao a Sãmbalat ne a tʋmd-n-taag a Tobiza sẽn yaa Amo nedã, ne Araab a Gesɛm sẽn wʋm kiba-kãngã, b sɩngame n paoog tõndo, la b yaal tõndo. Bãmb rag n sokda tõnd ne paoogr goam a woto: «Yaa bõe la yãmb maanda? Yãmb yik n dat n kɩɩsa rĩmã la?»

²⁰Dẽ, mam kɩtame tɩ b tɩ leok-b a woto: «Yaa saasẽ Wẽnnaamã meng n na n sõng tõnd tɩ d tõoge. Tõnd yaa bãmb tʋmtʋmdba. Dẽ, tõnd na n yik n lebs mee tẽngã! La yãmba, yãmb kõn tol n paam pʋɩɩre, wall noor ne bũmb Zeruzalɛm tẽngã pʋgẽ ye. La b kõn tol n leb n tẽeg yãmb yell Zeruzalɛm pʋgẽ ye.»