Read SEBR SÕNGO, 1998 A Neemi 3 Bible Online

A Neemi 3 - SEBR SÕNGO, 1998 bible

A Neemi 3

¹Maan-kʋʋr kãsem a Eliyasɩɩb ne a saam-biisã sẽn yaa maan-kʋʋdbã yikame n naag taab n lebs n me tẽngã noor ning piisã sẽn tũud n yit la b kẽedẽ wã. Bãmb ning-a-la barka, la b vigl a kʋɩlemsã. Bãmb kell n mee lalgã n gũbg n tall n tɩ tãag neb koabg ro-lug-lugã, n ning-a barka, n kell me-a n tɩ tãag a Hananeyɛll gãosgã.

²La Zeeriko nebã beooga bãmb n metẽ, t'a Yimbri biig a Zakʋʋr beoog Zeeriko nebã n metẽ.

³A Sena yagensã n me tẽngã noor ning b sẽn boond tɩ zĩm dignoorã. Bãmb ninga a ra-paadsã n sɛ, la b ning a kʋɩlengã, n lugl a ra-lugdsã, la b ning a kʋɩlen-kuyã.

⁴La neb nins sẽn beoog bãmb n me lalgã la woto: Yaa a Uuriya biig a Meremote, ne a Hakoos yagensã, la a Berekɩya biig a Mesulam, ne a Mesezabɛll yagensã, n paas a Baana biig a Sadoke.

⁵La sẽn pʋgl bãmb yaa Tekoa nebã, la bãmb nanambsã zãgsame tɩ bãmb ka na n sak tɩ b tʋʋmã taoor dãmb soog-b ye.

⁶Yaa a Paseya biig a Yozada ne a Besodiya biig a Mesulam n lebs n me tẽngã rigno-kʋdrã. Bãmb ninga a ra-paadsã n sɛ, la b ning a kʋɩlengã, n lugl a ra-lugdsã, la b ning a kʋɩlen-kuyã.

⁷Neb nins sẽn beoog-a bãmb n me wã la woto: Yaa Gabawõ ned a Melatiya, ne Meronot ned a Yadon, n paas Gabawõ ne Mispa neb a taaba. Bãmb tʋma gʋvɛrneerã sẽn be Efrat kʋɩlgã rʋʋndã yʋʋr yĩnga.

⁸La taoor bilfu, yaa a Haraya biig a Uziyɛll sẽn yaa yõakã, la parfẽ maand a Hananiya n beoog yẽnda. Bãmb maana b tʋʋmd Zeruzalɛm n sɛ, la yaa lalgã sẽn yaa yaleng zĩig ningã.

⁹A Ʋʋr biig a Refaaza sẽn yaa Zeruzalɛm tẽngã sak a yembr naabã kẽng n tɩ beooga bãmb n metẽ.

¹⁰La taoor bilfu, a Harʋmaf biig a Yedaya tɩ beooga a Refaaza n met lalg ning sẽn teesd yẽnda zakã, la a Hasabneya biig a Hatuus beooga yẽnda n tʋmdẽ.

¹¹A Harim biig a Malkiya ne a Pahat-Moaab biig a Hasuub me manega lalgã zĩig a to, n paas ne gãosgã sẽn be wʋmsã sẽn beẽ wã.

¹²A Lokɛɛs biig a Salum sẽn yaa Zeruzalɛm tẽngã sak a yembr naabã ne a kom-pugli wã tɩ beooga a Hasuub n metẽ.

¹³A Hanun ne Zanoa tẽng nebã n me Zeruzalɛm tẽngã noor ning sẽn teesd longã. La bãmb sẽn me-a n sɛ, b ninga a ra-lugdsã, a ra-paadsã ne a kʋɩlen-kuyã. Bãmb kell n manega lalgã woglem sẽn yɩɩd kãntɩɩg tusri, n tall n tãag noor ning b sẽn boond tɩ tãmpʋʋr noorã.

¹⁴A Rekaab biig a Malkiya sẽn yaa Bɛt-kerɛm soolem naabã n maneg noor ning b sẽn boond tɩ tãmpʋʋr noorã. La b sẽn maneg-a n me n sɛ, b ninga a ra-lugdsã, a ra-paadsã ne a kʋɩlen-kuyã.

¹⁵A Koll-Hooze biig a Salum sẽn yaa Mispa sak a yembr naabã n lebs n me noor ning b sẽn boond tɩ ko-bundgã. Bãmb me-a lame n sɛ, la b pag-a-la bɛoongo. Bãmb ninga a ra-lugdsã, a ra-paadsã ne a kʋɩlen-kuyã. Yẽnda kell n manega lalg ning sẽn pẽ ne Siloe bãkã. Lal-kãng sɩnga rĩmã zẽedã zĩiga, hal n tɩ tãag rʋʋdg ning sẽn yit a Davɩɩd tẽngẽ wã n sigdã sʋka.

¹⁶La yẽnda zugẽ, yaa a Azbuk biig a Neemi sẽn yaa Bɛt-Sʋʋr sak a yembr naabã n me n tɩ tãag zĩig ning b sẽn boond t'a Davɩɩd yaadã, n kell n kẽng n ta bãkã b sẽn tu wã, hal n ta rĩmã gũudb roogã.

¹⁷Yẽnda zugẽ, yaa Leevi buudã neb sẽn be a Neemi taoor n tʋmdẽ wã: Yaa a Bani biig a Rehum ne a Hasabiya sẽn yaa Keyila sak a yembr naabã.

¹⁸Yẽnda zugẽ, yaa a Henadaad biig a Bavayi sẽn yaa Keyila sak a yembr naabã sẽn yaa b saam-biisã n beoog bãmb n tʋme.

¹⁹La a Zozoe biig a Ezɛɛr sẽn yaa Mispa naabã n yegl bãmb n tʋme. Yẽnda n maneg zĩig ning zab-teedã sẽn bĩngdẽ wã, yaa zĩ-kãng n yaa lalgã gõdgr zĩiga.

²⁰La yẽnda zugẽ, yaa a Zabayi biig a Baruk n tʋm ne a sũur fãa, sẽn sɩng lalgã gõdgr zĩigẽ, n tall n tɩ tãag maan-kʋʋr kãsem a Eliyasɩɩb zakã noore.

²¹La a Baruk zugẽ, yaa a Uuri biig a Meremot ne a Akoos yagensã n beoog n tʋme, sẽn sɩng ne a Eliyasɩɩb zakã noor n tɩ tãag a zakã satmẽ.

²²La maan-kʋʋdb nins sẽn yit sagsã pʋsã beooga bãmb n tʋme.

²³A Benzame ne a Hasuub me beooga bãmb zĩig a to sẽn tot bãmb zagsã n tʋmdẽ. La a Hananiya yageng a Azariya sẽn yaa a Maaseza biigã n beoog bãmb n me lalgã zĩig ning sẽn pẽ yẽnda roogã.

²⁴A Henadaad biig a Binui n beoog a Azariya n me lalgã sẽn be a Azariya yirã ne lalgã gõdgrẽ wã sʋkã.

²⁵A Uzayi biig a Palall teega lalgã gõdrã zĩigẽ n me n kẽng gãs-kẽengã sẽn be rĩmã na-yirã neng taoorã, n pẽneg gũudbã zakã. La taoor bilfu, a Paryoos biig a Pedaya,

²⁶ne Wẽnd doogã tʋmtʋmdbã sẽn dag n be Ofɛll sakã pʋgã, bãmb me meeme n tɩ tãag gãsg ning sẽn be gõdrã zĩigẽ wã, sẽn be noor ninga b sẽn boond tɩ koom noorã yaangã.

²⁷Tekoa nebã me beooga yẽnda sẽn sɩng ne gãs-kẽengã sẽn be gõdrẽ wã n tʋm n tɩ teeg Ofɛll lalgã.

²⁸La sẽn sɩng ne wiid noorã tɛka, maan-kʋʋdbã neb kam fãa manega lalgã zĩig ning sẽn tot a rignoorã.

²⁹Bãmb zugẽ, yaa a Imeer biig a Sadok me n maneg sẽn tot yẽnda roogã, t'a Sekaniya biig a Semaya sẽn yaa yaang noorã gũudã me beoog yẽnda n tʋme.

³⁰La a Selemiya biig a Hananiya, ne a Hanun sẽn yaa a Salaf yoobẽ biigã me beooga bãmb n maneg lalgã sẽn pʋgdã, t'a Berekɩya yegl bãmb n maneg sẽn tot yẽnda roogã.

³¹A Malkiya sẽn yaa yõakã beooga yẽnda n tʋme. A Malkiya tʋmame n tãag Wẽnd doogã tʋmtʋmdbã ne lɛɛbdbã rotã sẽn be noor ning b sẽn boond tɩ Mifkaadã. La kell n tɩ tãaga gũudbã ro-wokã sẽn be lalgã gõdgrã zĩigẽ wã.

³²Dẽ, yõgsã ne lɛɛbdbã sɩnga b tʋʋmdã gũudbã ro-wokã sẽn be lalgã gõdrẽ wã, n tɩ tãag rignoor ning piisã sẽn tũud n kẽedẽ la b yitã.

³³A Sãmbalat sẽn wʋm tɩ tõnd lebs n meta Zeruzalɛm lalgã, a sũurã yika hal wʋsgo, la a paooga Zʋɩf-rãmbã.

³⁴Yẽnda yalsa a saam-biisã ne Samaari tãb-biisã taoor n yeele: «Yaa bõe la Zʋɩf-rãmbã sẽn ka võorã rat n maane? Bãmb tagsdame tɩ b na n lebs n me b tẽngã, la b leb n maan maand a pʋg bɩ? Bãmb tagsdame tɩ b na n tõog n tʋma yõwã n sɛ bɩ? Rẽ yĩnga, bãmb tõe n wʋka lalgã sẽn lʋɩ wã kug bugmã sẽn dɩ wã n tõog lebs n me lalgã sɩda?»

³⁵La Amo ned a Tobiza sẽn dag n be a Sãmbalat sɛɛgẽ wã yeelame: «B we n nang pãng ne meebo! We-baag bal sã n wudg n fão lal-kãngã, a lubd-a lame!»

³⁶Dẽ wã, tõnd Wẽnnaam, kelg-y tõnd bɛɛbã sẽn yaand tõndã, la y kɩt tɩ b yaalgã leb-ba! Zu-soaba, kɩt-y tɩ b yõg-b n kẽes yembd tẽn-zẽnga, tɩ b paam yaalgo!

³⁷Zu-soaba, bɩ y ra kõ bãmb b beegrã sugri, la y ra yẽes b yel-wẽnã ye. Bala, tõnd sẽn lebs n met Zeruzalɛm lalgã, bãmb gɩdga metbã tɩ b ra me ye.

³⁸Dẽ, tõnd sɩd lebs n mee lalgã! Tõnd tõog n me-a lame t'a zẽk n ta a zãntlmã pʋɩ-sʋka, la d me-a lame n gilg tẽngã zãng n sege. Bala, nebã tʋma tʋʋmdã ne b sũur fãa!