Read SEBR SÕNGO, 1998 A Neemi 4 Bible Online

A Neemi 4 - SEBR SÕNGO, 1998 bible

A Neemi 4

¹A Sãmbalat ne a Tobiza, la Araab-rãmbã, ne Amo nebã la Asdood nebã sẽn wʋm tɩ Zeruzalɛm lalgã meeb kẽngda taoore, la a lal-wedsã yẽtame n dabdã, bãmb fãa sũyã puuga wʋsgo.

²La bãmb seda ne taab n na n wa zab ne Zeruzalɛm tẽngã n sãam-a.

³Dẽ, tõnd pʋʋsa d Wẽnnaamã. La nin-bãmbã yĩng kɩtame, tɩ tõnd ning gũudb tɩ b gũud wĩndg ne yʋngo, n tõe n zab ne-b n sõng tõndo.

⁴Baa ne rẽ fãa, Zʋʋda nebã yeelame: «Neb nins sẽn wʋkd-b zɩɩbã pãng sɛɛme, la sagdã me yaa wʋsgo. Dẽ wã, tõnd ka na n tol n tõog n me lalgã n sɛ ye.»

⁵Tõnd bɛɛbã rag n yetame: «Tõnd na n soosame hal n tɩ kẽ Zʋɩf-rãmbã sʋka, tɩ b ka tol n bãnge, la b ka yãnd tõnd me ye. Woto, tõnd na n kʋ-b lame n kɩt tɩ b tʋʋmdã yalse.»

⁶La Zʋɩf-rãmb nins sẽn pẽ tõnd bɛɛbã waa tõnd nengẽ sẽn tat naoor piiga, n wat n togsd tõnd bɛɛbã sẽn dat n maan bũmb ningã. B rag n yetame: «Ya-y n lebg-y n wa tõnd nengẽ!»

⁷Dẽ, mam welga nebã roog-roogo, n ning-b londã sẽn be lalgã poorã tɩ b guudẽ, la b rag n zãada b zabr sʋʋse, b kãnã, la b tãbdo.

⁸Mam gesa nebã manesem sẽn yaa to-to. Dẽ, mam yikame n yeel kãsem-dãmbã ne nanambsã, ne neb nins sẽn dag n be beenẽ wã yaa: «Da zoe-y nin-bãmbã ye! Tẽeg-y tɩ Zu-soabã yaa kãsenga, la b tara pãnga. Zab-y y saam-biisã, y kom-dibli wã la y kom-pugli wã, ne y pagbã, la y zagsã yĩnga.»

⁹Tõnd bɛɛbã sẽn wʋm tɩ tõnd bãnga bũmb ning bãmb sẽn dag n dat n maanã, la b sẽn mik tɩ Wẽnnaam sãama bãmb saagrã, tõnd fãa leb n leba lalgã meebẽ, tɩ ned kam fãa leb n dɩk a tʋʋmde.

¹⁰La sẽn sɩng ne badaare, mam tʋmtʋmdbã pʋɩ-sʋk bee tʋʋmdã pʋga, la pʋɩ-sʋk a to wã me zãada kãna, la gãndo, ne tãbdo, la gãntigsi. La nanambsã rag n bee Zʋʋda buudã fãa poorẽ.

¹¹Neb nins sẽn met tẽngã lalgã ne neb nins sẽn wʋkd kugã ned kam fãa tʋmda ne nug-yende, tɩ nug a yembrã zãad a zab-teoogo.

¹²La tãn-metbã ned kam fãa rag n sẽbga zabr sʋʋg a sɛɛga, la a tʋmdẽ. La bar-pɛɛbdã rag n bee ne maam.

¹³Dẽ, mam yeela kãsem-dãmbã ne nanambsã, ne neb nins sẽn dag n be beenẽ wã yaa: «Tʋʋmdã ket n yaa wʋsgo, lalgã me wogmame, tõnd yaool n sãeegame n be lalgã zĩig toor-toore, n zãr ne taaba.

¹⁴Rẽ wã, yãmb sã n wa n wʋm baorgã peebgo, bɩ y yi yãmb sẽn beẽ wã, n zoe n wa mam nengẽ, n wa tigim taaba, la tõnd Wẽnnaamã na n zab n sõnga tõndo.

¹⁵Dẽ, yɩɩ woto la tõnd tʋm yã. Tõnd nebã pʋɩ-sʋk zãada kãn b nusẽ, n tʋmd yibeoog tɩ ta zĩ-sobdo, ãdsã pukr sasa.

¹⁶Leb n yaa wakat-kãng me la mam yeel nebã yaa: Bɩ tʋʋmd taoor soab fãa ne a rakõor pa Zeruzalɛm tẽngã pʋg n gãande. Woto, b na n gũu tẽngã yʋngo, tɩ wĩndga, bɩ b fãa yik n tʋme.»

¹⁷La maam ne m saam-biisã, ne m tʋmtʋmdbã, la gũudbã sẽn dag n tũud maamã ned ba a yembr ka tol n yeeg a fuugu, tõnd ned kam fãa rag n zãada a zab-teoog ne a rɩtgo.