Read SEBR SÕNGO, 1998 A Neemi 5 Bible Online

A Neemi 5 - SEBR SÕNGO, 1998 bible

A Neemi 5

¹Daar a yembre, nebã sʋk neb kẽere, pagb la raopa, yikame n yẽgem wʋsg ne b saam-biisã sẽn yaa Zʋɩf-rãmbã.

²Bãmb neb kẽer dag n yetame: «Tõnd yaa wʋsgo, bala, d tara kom-dibli la kom-pugli. Dẽ wã, tõnd nongẽ lame n paam bɩle n dɩ n vɩɩmde.»

³La kẽer me rag n yetame: «Komã sasa, tõnd sã n dat n paam koodo, yaa tɩlɛ tɩ d rɩk d pʋtã, d reezẽ tɩɩs pʋtã ne d zagsã n gãneg n deege.»

⁴Neb a taab me rag n yetame: «Tõnd sã n dat n yao rĩmã yaoodã, rẽndame tɩ tõnd rɩk d pʋtã ne d reezẽ tɩɩs pʋtã n tɩ gãneg n deeg ligd n wa yao.

⁵Tõnd fãa yaool n yaa buud a yembre, tɩ tõnd kom-dibli wã me yaa bũmb a yembr ne bãmb kom-dibli wã! Lebga tɩlɛ ne tõnd tɩ d kẽes d kom-dibli la d kom-pugli yembdo, tɩ kẽer meng zoe n yaa yembse? Woto fãa yaa tõnd sẽn ka mi d sẽn na n maanegã yĩnga. Bala, tõnd pʋtã, ne d reezẽ tɩɩs pʋtã fãa lebga neb a taab n so!»

⁶Mam sẽn wʋm nebã yẽgengã ne b sẽn gom woto wã, mam sũurã puuga hal wʋsgo.

⁷Dẽ, mam yãka yam n na n leng kãsem-dãmbã ne nanambsã. Mam sok-b lame yaa: «Bõe yĩng tɩ yãmb pengd y saam-biisã n baood yõodo?» Rẽ, mam maana tigin-kãseng ne bãmba.

⁸La mam yeel-b lame yaa: «Tõnd saam-biisã b sẽn dag n dɩk n koos ne bu-zẽmsã, tõnd maana d sẽn tõe tɛk n yao n deeg-ba, tɩ yãmb leb n dɩk y saam-biisã ne y tãopã n wẽneg n koosd ne yãmb mensã sẽn yaa Zʋɩf-rãmbã ne taaba.» La bãmb sẽn dag n ka tõe n leok tɩ bũmbã yĩngã, b sĩnda sɩddd...

⁹Mam kell n kẽnga taoor n yeel yaa: «Yãmb sẽn maand bũmb ningã ka zems ye! Yãmb dag n tog n vɩɩmda tõnd Wẽnnaam dabeem zoees pʋga, tɩ buud a taabã sẽn yaa tõnd bɛɛbã ra wa tʋʋs yãmb ye.

¹⁰Ade, maam me, ne m saam-biisã, la mam tʋmtʋmdbã rag n dɩka d ligd ne d bɩle n peng nin-bãmbã. Dẽ wã, wa-y tɩ d bas b samdã taale.

¹¹Rũndã bala, lebs-y bãmb b pʋtã, b reezẽ tɩɩs pʋtã, ne b oliiv tɩɩsã, la b zagsã, la y ra reeg roagleng ning b sẽn dag n tog n dogl b sẽn peng yãmb nengẽ wã zugã ye. Yaa roaglengã sẽn yaa wʋsgã, sã n yaa ligdi, koodo, reezẽ rãam wall kaam.»

¹²Bãmb fãa leokame: «Tõnd na n maana wa fo sẽn yeelã. Tõnd na n lebsa bũmb ning tõnd sẽn dag n deegã, la d ka na n yeel tɩ b wa ne bũmb ye. Dẽ, mam boola maan-kʋʋdbã tɩ b wa yɩ kaset dãmba, n kɩt tɩ kãsem-dãmbã ne nanambsã wẽen bãmb taoor n yeel tɩ b na n sak n maana wa b sẽn yeelã.»

¹³Woto, mam fugumda m fuugã noor n yeele: «Bɩ Wẽnnaam fugs ned ning fãa sẽn ka sak-a n pids a pʋlengo! Bɩ b yiis-a a buudã sʋka, la b rees a laogã n bas-a zaalem.» La nebã fãa leokame n yeele: «N-yẽe! Bɩ a yɩ woto!» Nebã fãa yɩɩl n pẽga Sẽn-Ka-Saabo. La ned kam fãa pidsa a pʋlengo.

¹⁴Daar ning rĩmã sẽn yãk maam tɩ m lebg Zʋʋda tẽng gʋvɛrneer n soog Zʋɩf-rãmbã tɛka, sẽn sɩng ne rĩm a Artagzɛrzɛɛs sẽn deeg a naamã tɩ yʋʋm pis-yiiblẽ n tɩ tãag a yʋʋm pis-tã la a yiiblẽ wã, maam ne m saam-biisã maana yʋʋm piig la a yiibu, n ka tol n deeg yaood wa gʋvɛrneer sẽn segd n deegã ye.

¹⁵Gʋvɛrneer-dãmb a taabã sẽn deng maam n zĩndã rag n namsda nebã, n modgd-b tɩ b wat ne rɩɩbo, reezẽ rãam, n paas wanzuri wakɩ-koeems pis-naase. Gʋvɛrneerã tʋmtʋmdbã me rag n soo nebã ne pãnga. La mam sẽn zoet Wẽnnaamã yĩnga, mam zɩ n maan bũmb a woto ye.

¹⁶Sẽn yɩɩd fãa, mam dɩka m mengã n kõ tẽngã lalg meeb yĩnga. Tõnd ka tol n da pʋʋg d mengã yĩng ye. La mam tʋmtʋmdbã fãa naaga taab n tʋmd lalgã tʋʋmde.

¹⁷Zʋɩf-rãmbã neb ninsi, ne nanambs nins sẽn dag n naagd maam n dɩtẽ wã sõor yaa neb koabg la pis-nu, n paas ne neb nins sẽn yit tẽn-kɩrems n watẽ wã.

¹⁸Daar fãa, b rag n kʋʋda loalga, pe-nobds a yoobe, ne noose, n segl rɩɩbã mam yĩnga. La rasem piig fãa, b wat n kõta maam reezẽ rãam hal tɩ sekdẽ. Baa ne woto fãa, mam ka tol n yeel tɩ b wa ne yaood gʋvɛrneer yĩng ye. Bala, lalgã tʋʋmd rag n zoe n yaa zɩɩb wʋsg nebã yĩnga.

¹⁹Mam Wẽnnaam, tẽeg-y mam yelle, la y maan-m neere, bũmb ning fãa mam sẽn maan nin-bãmbã yĩngã!