Read SEBR SÕNGO, 1998 A Ɛstɛɛre 2 Bible Online

A Ɛstɛɛre 2 - SEBR SÕNGO, 1998 bible

A Ɛstɛɛre 2

¹Yel-kãens loogr zugẽ, rĩm a Asiruus sũurã sẽn n wa n sigi, yẽnda tẽega a Vasti yellã, ne bũmb ning yẽnda sẽn dag n maanã, la b sẽn dag n maan yam-yãkr ning a Vasti wɛɛngẽ wã.

²Rĩmã sõgen-kambã yeela rĩmã yaa: «Bɩ b bao pʋg-sadb sẽn ka mi raopa, la sẽn yaa neeba, n wa kõ rĩmã.»

³Bɩ rĩmã yãk neb b soolem-dãmbã fãa pʋse, tɩ b tigs pʋg-sadb sẽn ka mi raopa, la sẽn yaa neeba, n tall n wa Suuz na-tẽngã na-pagb zak pʋga. La bɩ b rɩk bãmb n kõ a Hegayi sẽn yaa rĩmã sõgen-kãseng ning sẽn get-a pagbã yellã, t'a ges b yell n kõ b ka-zɛɛdem buud toay-toay tɩ b maneg b mense.

⁴La bi-pugl ning sẽn na n ta rĩmã yam, n na n deeg a Vasti zĩig n lebg rĩm-poaka. Gom-kãng yɩɩ rĩmã noogo, la a maana wa b sẽn yeelã.

⁵Zʋɩf a yembr n dag n be Suuz na-tẽngã pʋg t'a yʋʋr boondẽ t'a Mardoose, n yaa a Yayɩɩr biiga, a Yayɩɩr yaa a Sɩmeyi biiga, t'a Sɩme yaa a Kɩɩs biiga, yẽnda yaa Benzame buudã neda.

⁶La yẽnda rag n naaga neb nins Babilond rĩm a Nebukatnetzaar sẽn dag n yõg n naag ne Zʋʋda naab a Yekoniya n yiis Zeruzalɛm n tall n wa Babilondã.

⁷A Mardoose rag n deega a baaba bilã biig a Adasa b sẽn boond t'a Ɛstɛɛrã n zãada. Bala, a Ɛstɛɛr ba wã ne a ma wã rag n kiime. La pʋg-sadã rag n yaa neer hal wʋsgo.

⁸B sẽn moon rĩmã noor tɩ nebã fãa wʋma, b tigma pʋg-sadb wʋsg Suuz na-tẽnga pʋg n ning a Hegayi nugẽ. Dẽ, b talla a Ɛstɛɛr me n kẽng rĩmã zakẽ n tɩ ning a Hegayi sẽn yaa pagbã gũudã nugẽ.

⁹La pʋg-sadã rag n taa a Hegayi yam t'a paam t'a na n maan-a neere. Dẽ, a Hegayi yɩɩ tao-tao n kõ a Ɛstɛɛr ka-zɛɛdem nins yẽnda sẽn na n tall n maneg a mengã, la rɩɩb nins a sẽn tog n dɩ wã. La a yãk tʋmtʋmd-pogs a yopoe na-yirã tʋmtʋmd-pogs nins sẽn mi-b tʋʋmd sõama n yɩɩdã sʋka, n kõ a Ɛstɛɛre. La a talla ne a tʋmtʋmd-pogsã, n tɩ kẽes rot nins sẽn yaa sõama n yɩɩd na-yirã pagb zak pʋgẽ wã.

¹⁰A Ɛstɛɛr ka maan tɩ b bãng yẽnda roagdbã, la yẽnda sẽn yaa buud ning ye. Bala, a Mardoose rag n gɩdga yẽnda t'a ra togs bõn-kãens ye.

¹¹La daar fãa, a Mardoose rag n kẽnda pagbã zak sɛɛga, n sokd n na n bãng a Ɛstɛɛr keelem, la b sẽn n get a yell to-to.

¹²Pʋg-sad fãa rag n tog n maana kiuug piig la yiibu, n yaool n kẽng rĩm a Asiruus nengẽ, wala sẽn zems b sẽn kõ noor ning pagbã wɛɛngẽ wã. B rag n dɩkda kiuug a yoob n zɛ miir kaam. La b rɩk kiuug a yoobe, n sõ parfẽ-rãmb sẽn tar yũ-noogo, ne pagb ka-zɛɛdem buud toor-toore.

¹³La pʋg-sad ning fãa sẽn na n yi pagbã zakẽ n kẽng rĩmã nengẽ, b kõt-a-la bũmb ning fãa a sẽn date, t'a zã n kẽng na-zakẽ wã.

¹⁴Yẽnda rag n kẽngda zaabre, la beoog sã n vẽege, yẽnda yitame n kẽ pagbã zak a yiibẽ soabã pʋga, la yaa a Saasgaaz sẽn yaa rĩmã sõgen ning sẽn geta rĩmã pʋg-rɩkdsã yellã nengẽ. La yẽnda ka lebd n kẽng rĩmã nengẽ, tɩ sã n ka rĩmã n wa n dat-a, n pʋd a yʋʋrã n kɩt tɩ b bool-a ye.

¹⁵A Mardoose baaba bil a Abisayɩll bi-pugl a Ɛstɛɛre, yẽnda sẽn dag n deeg n wubdã wakat sẽn ta, t'a tog n kẽng rĩmã nengẽ wã, a ka kos baa fɩ, n zʋʋg sõgen-kãseng a Hegayi sẽn get-a pagbã yellã sẽn wilg yẽnda bũmb ningã ye. La ned ning fãa sẽn dag n yãnd a Ɛstɛɛre, a sũur noomã ne-a.

¹⁶Yaa Rĩm a Asiruus sẽn deeg-a naamã tɩ yʋʋm-yopoɛɛlẽ, kiuug piig la a yiib soabã sẽn yaa Tebɛt kiuugã pʋgẽ, la b peeg a Ɛstɛɛr n kẽng na-zakẽ wã.

¹⁷A Ɛstɛɛr la rĩmã wa n tɩ nong n yɩɩd pagb a taabã fãa, la rĩmã sũur dag n nooma ne a Ɛstɛɛre, n yɩɩd pʋg-sadb a taab nins fãa sẽn ka mi raoã. Dẽ, rĩmã rɩka naam maanf n fõgen a Ɛstɛɛre, n kɩt t'a lebg rĩm-poak n deeg a Vasti zĩiga.

¹⁸Rĩmã maana tig-kãseng a nanambsã ne a tʋmtʋmdbã fãa yĩnga, n na n waoog a Ɛstɛɛre. La yẽnda kõ a soolem-dãmbã fãa vʋʋsgo, la a kõ kũun wʋsg wa sẽn zems rĩm sẽn tõe n kõ tɛka.

¹⁹B sẽn wa n na n leb n tigim pʋg-sadb nins sẽn ka mi raoã naoor a yiibẽ soabã, rẽ t'a Mardoose rag n zĩi rĩmã zak noore.

²⁰A Ɛstɛɛr kell n ka maan tɩ b bãng yẽnda roagdbã, ne yẽnda sẽn yaa buud ninga, wa a Mardoose sẽn dag n yeel yẽndã wã. Bala, yẽnda rag n sakda a Mardoose wa wakat ning yẽnda sẽn da ket n be a Mardoose nengẽ wã.

²¹Wakat ning a Mardoose sẽn wa zĩ rĩmã zak noorã, a Bigtã, ne a Terɛɛs sẽn yaa rĩmã sõgen-kãsems nins sẽn gũud-b rignoor ning sẽn kẽed-a rĩmã ro-gãasẽ wã, yẽsa ne taab n dat n kʋ rĩm a Asiruusi, bãmb sũurã sẽn yik ne rĩmã yĩnga.

²²La a Mardoose bãnga yel-kãnga, n tɩ wilg rĩm-poak a Ɛstɛɛre, t'a Ɛstɛɛr rɩk yellã n tɩ togs rĩmã, la a wilg tɩ yaa a Mardoose n togse.

²³La b sẽn vɛɛs n mik tɩ yellã yaa sɩdã, b luula sõgen-bãmb yiibã da-lugds zutu. La b gʋlsa bõn-kãng soolmã kibay sebr pʋgẽ rĩmã taoore.