Read SEBR SÕNGO, 1998 A Ɛstɛɛre 7 Bible Online

A Ɛstɛɛre 7 - SEBR SÕNGO, 1998 bible

A Ɛstɛɛre 7

¹Rĩmã ne a Haman kẽngame n na n tɩ rɩ tigrã ne rĩm-poak a Ɛstɛɛre.

²La rasem a yiibẽ soab-kãng daarã, wakat ning b sẽn wa n yũud reezẽ rãamã, rĩmã soka a Ɛstɛɛr yaa: «Rĩm-poak a Ɛstɛɛre, fo kosgã yaa bʋgo, kos tɩ f na n paamame. Wilg maam fo sẽn datã! Baa sã n yaa mam soolmã pʋɩ-sʋka, mam na n kõ-f lame.»

³Rĩm-poak a Ɛstɛɛr leokame yaa: «N'na! Sã n yaa tɩ yãmb nonga maam, la sã n taa yãmb yam, mam kotame tɩ y fãag m vɩɩmã, la m sẽn datã, yaa tɩ y fãag m buudã me vɩɩm.

⁴Bala, b rɩka maam ne m buudã neb n koose, tɩ b sãam-do, n kʋ-do, n menes-d zãnga. B sã n dag n koosẽ-la tõnd tɩ d na n yɩ yem-daado, la yem-pogse, mam dag n ka na n yeelẽ tɩ bũmb ye. La bɛyã ka geelg wẽng ning a sẽn na n maan rĩmã ye.»

⁵Dẽ, rĩm a Asiruus soka rĩm-poak a Ɛstɛɛr yaa: «Yaa ãnda soaba? Ned ning sũur sẽn pid ne wẽng a woto wã bee yɛɛnẽ?»

⁶A Ɛstɛɛr leokame: «Tõnd zabd-n-taagã la d bɛyã yaa a Haman, nin-wẽn-kãnga.» B sẽn goma a woto wã a Haman kii kɩɩmde, rĩmã ne rĩm-poakã taoore.

⁷Rĩmã sũur yikame t'a yik n bas tigrã n kẽng na-yirã zak pʋgẽ, zẽedã zĩigẽ. La a Haman paa be n yãbd n kot rĩm-poak a Ɛstɛɛr tɩ b fãag a vɩɩmã. Bala, a yãame tɩ rĩmã zoe n yãka yam n na n kʋ yẽnda.

⁸La rĩmã sẽn yi zakã pʋgẽ n lebg n wat tigrã roogẽ, a mikame t'a Haman lʋɩɩ gãag ning rĩm-poak a Ɛstɛɛr sẽn dag n beẽ wã zugu. Dẽ, rĩmã zẽka a koɛɛg n yeele: «Sẽn leb n paase, b rat n yõga rĩm-poakã roogẽ ka mam nifẽ. Gom-kãngã sẽn yi rĩmã noorẽ wã bal yee, b wa n pil a Haman nengã ne peende.»

⁹A Harbona sẽn yaa bãmb sʋkã ned a yembrã yeela rĩmã yaa: «Da-lugdg la a Haman dag n maan n lugl a zakã pʋgẽ n dat n luul a Mardoose, soab ning sẽn dag n gom-a tɩ rĩmã põsã, a woglmã yaa kãntɩɩg pis-nu.» Rĩmã yeelame: «Luul-y-yã-a beenẽ.»

¹⁰La b luula a Haman da-lugdg ning yẽnda sẽn dag n lugl a Mardoose yĩngã zugu. Dẽ, rĩmã sũur sigame.