Read SEBR SÕNGO, 1998 A Ɛstɛɛre 8 Bible Online

A Ɛstɛɛre 8 - SEBR SÕNGO, 1998 bible

A Ɛstɛɛre 8

¹Badaar bala, rĩm a Asiruus rɩka zʋɩf rãmbã bɛ a Haman zakã n kõ a Ɛstɛɛre. La a Mardoose kẽnga rĩmã nengẽ, bala, a Ɛstɛɛr dag n wilgame t'a Mardoose yaa yẽnda roagda.

²Dẽ, rĩmã pidga a nugbĩng ning a sẽn dag n deeg a Haman nengẽ wã, n kõ a Mardoose. La a Ɛstɛɛr kɩtame t'a Mardoose soog a Haman yirã.

³A Ɛstɛɛr lʋɩɩ tẽng n wõgemd rĩmã nao tẽngre, n yãb n bõos rĩmã, t'a sãam saag-wẽng ning Agaag buudã ned a Haman sẽn dag n dat n maanã, sẽn yaa Zʋɩf-rãmbã buudã sãoongã.

⁴Rĩmã rɩka a sãnem dasaarã n tees a Ɛstɛɛre, la yẽnda yikame n yaas rĩmã taoore.

⁵A Ɛstɛɛr yeela rĩmã yaa: «Sã n taa rĩmã yam, la sã n yaa tɩ rĩmã nonga maam, la rĩmã sã n dat n maan maam neere, la rĩmã sũur sã n yaa noog ne maam, bɩ b gʋls sebr sẽn wilgd tɩ Agaag ned a Hamedata biig a Haman sẽn dag n gʋls sebr ning n dat n sãam Zʋɩf-rãmbã fãa sẽn be rĩmã soolmẽ wã lebga zaalem.»

⁶Mam na n maana a wãn n get toog ning sẽn na n paam mam nebã, n ka yeel tɩ yelle? N-yẽe, mam na n maana a wãn n get mam buudã sãoongã n ka maan bũmbu.

⁷Rĩm a Asiruus goma ne a Ɛstɛɛr ne Zʋɩf a Mardoose n yeel-b yaa: «Ade, mam dɩka a Haman yirã zãng n kõ a Ɛstɛɛre, la mam kɩtame tɩ b luul a Haman da-lugdg zugu, yẽnda sẽn dag n dat n sãam Zʋɩf-rãmbã yĩnga.»

⁸Moasã, bɩ yãmb mengã gʋls bũmb ning yãmb sẽn tagsd tɩ yaa sõama n tõe n sõng Zʋɩf-rãmbã ne rĩmã yʋʋre, n ning rĩmã nug-tikr bãnde. Bala, sebr sẽn gʋls ne rĩmã yʋʋr n ning rĩmã nug-tikr bãnd ka tõe n tek ye.

⁹Badaar bala, kiuug a tãab soabã sẽn yaa Sɩvan kiuugã rasem pisi la a tãab daarã, b boola rĩmã sɛb-gʋndbã fãa, la b gʋlsa a Mardoose sẽn yãk yam ning zʋɩf-rãmbã wɛɛngẽ wã, n tʋm soolem toay-toayã fãa taoor-dãmba, la guvɛrneer-dãmbã, la nanambsã, sẽn sɩng ne Ẽnd n tɩ tãag Kuus tẽngã. Yaa soolem-dãmb koabg la pisi la a yopoe. B gʋlsa wa sẽn zems soolem fãa ne a gʋlsem la buud fãa me ne a goamã. La b gʋls n kõo Zʋɩf-rãmbã me ne b gʋlsem la b buudã goamã.

¹⁰B gʋlsa sɛbã ne rĩm a Asiruus yʋʋre, n ning rĩmã nug-tikr bãnde, la b rɩk-b n tʋm wed-rʋʋdb nins sẽn zao wiid nins rĩmã sẽn dag n tũus tɩ yaa sõama n tar pãng n be rĩmã zakẽ wã.

¹¹Ne seb-kãense, rĩmã rag n kõta Zʋɩf-rãmb nins fãa sẽn be tẽmsã fãa pʋsẽ wã noore, tɩ b tigim taab n zab n fãag b yõore. La b sãame, la b kʋ, la b menes buud nins fãa neb nins sẽn be tẽmsã pʋsẽ, la rĩmã soolem-dãmbã fãa pʋgẽ, n dat n yik n zab ne Zʋɩf-rãmbã. B yeelame tɩ b kʋ b pagbã ne b kambã, la b zɛ b paoongã me.

¹²La yõwã fãa na n yɩɩ daar a yembr pʋgẽ, rĩm a Asiruus soolem-dãmbã fãa pʋsẽ, kiuug piig la a yiib soabã b sẽn boond tɩ Adaar kiuug rasem piig la a tãabã daare.

¹³La soolem fãa pʋga, sebrã tog n yɩɩ tõogo, tɩ b tog n moon tɩ buud toay-toayã fãa wʋme, tɩ Zʋɩf-rãmbã me tõog n segl b mens badaar n dok b sũur ne b bɛɛbã.

¹⁴Rĩmã kõo noor tɩ sɛb-kɩtb nins sẽn zao-b wed-moos nins b sẽn tũus na-yirã pʋgẽ wã zoe tao-tao n looge. La b moona koɛɛgã Suuz na-tẽngã pʋga.

¹⁵A Mardoose yii rĩmã nengẽ ne naam fut sẽn gʋl kẽega la pɛɛlga, n fõgen sãnem maanf sẽn yaa bedre, la a yeelg kobr sẽn wʋg ne lamd gĩs sẽn yaa moaama. Suuz na-tẽngã pʋga, nebã rag n kaasdame n maand sũ-noogo.

¹⁶Zʋɩf-rãmbã sũur dag n yaa noogo, tɩ b kɩdemdẽ, la b rag n paama zu-zẽkre.

¹⁷Rĩmã yam-yakrã ne a tõogã sẽn ta soolem ne tẽng ning la zĩig ning fãa, Zʋɩf-rãmbã maanda sũ-noog n kɩdemdẽ, tɩ lebg tigr daare. La buud a taabã sẽn be soolmã pʋgã maana b mens n lebg Zʋɩf-rãmba. Bala, Zʋɩf-rãmbã rabeem yõka bãmba.