Read SEBR SÕNGO, 1998 Yikri 1 Bible Online

Yikri 1 - SEBR SÕNGO, 1998 bible

Yikri 1

¹Ad a Israyɛll b sẽn boond t'a Zakoobã kamb nins sẽn tũ a yẽnda n kẽng Ezɩpt tẽngã yʋyã, la yaa ned kam fãa ne a zak rãmba:

²Yaa a Rubɛn ne a Sɩmyõ, a Leevi ne a Zʋʋda,

³a Isakaar ne a Zabulõ la a Benzame,

⁴a Dan ne a Neftali la a Gaad ne a Asɛɛre.

⁵A Zakoob yagensã fãa rag n yaa neb pis-yopoe. Wakat-kãng t'a Zozɛf bee Ezɩpt tẽnga.

⁶A Zozɛf ne a ba-biisã fãa, la zamaan-kãng nebã fãa wa n kiime.

⁷La Israyɛll yagensã rogame n fɩɩg n pid tẽngã, la b pãngã rag n tara paasgo.

⁸La rĩm-paalg sẽn dag n ka bãng a Zozɛf n wa n na n soog Ezɩpte.

⁹Rĩmã yeela a nebã yaa: «Ade, Israyɛll nebã sõor yɩɩda tõndo, la b pãngã yɩɩda tõndo.

¹⁰Dẽ wã, wa-y tɩ d maan yam ne-ba, tɩ b ra wa fɩɩg n lebg wʋsg ye. Bala, zabr sã n yiki, b na n naaga tõnd bɛɛbã n zab ne tõndo, la b zoe n yi tẽngã.»

¹¹Dẽ, b yãka yembd tʋʋm taoor dãmba, sẽn na n yɩlẽ tɩ b modg Israyɛll nebã n kɩt tɩ b tʋm tʋʋm-wɛgla. Yɩɩ woto tɩ b me teed bĩngr tẽmse, Faarõ yĩnga: Yaa Pitom ne Ramsɛɛse.

¹²La baa ne b sẽn dag n namsd Israyɛll nebã, Israyɛll nebã rag n tara fɩɩgre, tɩ b sõorã tar paasgo. Bõn-kãng kɩtame tɩ b rag n kis Israyɛll nebã.

¹³Dẽ, Ezɩpt nebã modga Israyɛll nebã n kɩt tɩ b maan yembd tʋʋm sẽn yaa toog hal wʋsgo.

¹⁴Bãmb kɩtame tɩ Israyɛll nebã maan yembd tʋʋm sẽn yaa toogo, n kɩt tɩ b vɩɩmã lebg toogo: Yaa tãnd buiibu, tãn-koɛɛm wẽebo, la pʋt pʋsẽ tʋʋm buud fãa. Woto n dag n yaa yembd tʋʋm nins fãa b sẽn dag n modgd bãmb tɩ b tʋmdẽ wã.

¹⁵Ezɩpt rĩmã goma ne Ebre nebã pʋg-roagsdbã me. Pʋg-roags a yembr yʋʋr la a Sɩfra t'a yembr yʋʋr yaa a Puwa.

¹⁶Rĩmã yeela bãmb yaa: «Yãmb sã n wa rogsd Ebre nebã pagbã, yãmb sã n ges b rogmã zĩigẽ n mik tɩ bi-pɛɛlgã yaa bi-ribla, bɩ y kʋ-a, la a sã n yaa bi-pugla, bɩ y bas-a t'a vɩɩmde.»

¹⁷La pʋg-roagsdbã zoee Wẽnnaam n ka maan wa Faarõ sẽn yeel bãmbã ye. Bãmb basa kom-dibli wã n ka kʋ ye.

¹⁸Dẽ, Ezɩpt rĩmã boola pʋg-roagsdbã tɩ b wa, la yẽnda soka bãmb yaa: «Yaa bõe tɩ yãmb maan a woto? Bõe yĩng tɩ yãmb basd kom-dibli wã n ka kʋʋda?»

¹⁹Pʋg-roagsdbã leoka Faarõ n yeel yaa: «Ade, yaa tɩ Ebre nebã pagb ka wẽnd Ezɩpt pagbã ye. Bãmb yaa pagb sẽn tar pãnga, dẽ, bãmb dogda tao-tao tɩ pʋg-roagsã nan ka wa ye.»

²⁰Wẽnnaam maana pʋg-roagsdbã neere, la Ebre nebã fɩɩgame n paam pãng wʋsgo.

²¹Pʋg-roagsdbã sẽn zoe Wẽnnaamã yĩnga, Wẽnnaam kõ-b-la yagense.

²²Dẽ, Faarõ yeela a nebã fãa yaa: «Kom-dibli nins fãa sẽn na n dogã bɩ y lob-b Nill kʋɩlgã pʋgẽ, la y bas kom-pugli wã fãa tɩ b vɩɩmde.»