Read SEBR SÕNGO, 1998 Yikri 10 Bible Online

Yikri 10 - SEBR SÕNGO, 1998 bible

Yikri 10

¹Sẽn-Ka-Saab yeela a Moyiis yaa: «Kẽng Faarõ nengẽ, bala, yaa maam n kɩt tɩ yẽnda ne a tʋmtʋmdbã sũy kenge, sẽn na n yɩlẽ tɩ mam bõn-yɛɛsdsã puk bãmb sʋka.

²Leb n yaa sẽn na n yɩlẽ tɩ fo togs f kambã ne f yagensã mam sẽn maan Ezɩpt nebã bũmb ninga, la bõn-yɛɛsds nins mam sẽn maan bãmb sʋkã. Woto, yãmb na bãng tɩ mam yaa Sẽn-Ka-Saabo.»

³Dẽ, a Moyiis ne a Aarõ kẽnga Faarõ nengẽ n tɩ yeel-a tɩ Sẽn-Ka-Saab sẽn yaa Ebre nebã Wẽnnaamã sokdame yaa: «Fo na n zãgsame tɩ f ka na n sik f meng mam taoor hal tɩ ta dabʋre? Bas mam nebã tɩ b kẽng n tɩ waoog maam.

⁴Fo sã n zãgs n ka bas mam nebã tɩ b looge, beoogo, mam na n tʋma sʋy tɩ b wa fo soolmã pʋga.

⁵Sʋyã na n wa pida tẽngã, tɩ ned ka leb n tõe n yãnd tẽn-gãongã ye. Bãmb na n dɩɩ bũmb nins fãa sapɩlmã sẽn ka sãama, yaa yãmb bũmb nins fãa sapɩlmã sẽn basã, la b na n dɩɩ tɩɩsã sẽn yit yãmb pʋtẽ wã fãa.

⁶Sʋyã na n pida fo rotã, ne f tʋmtʋmdbã roto, la Ezɩpt nebã fãa roto. Hal fo ba-rãmbã ne f yaab-rãmbã sẽn zĩnd dũni zug tɛk tɩ ta rũndã, b ka yãnd bũmb sẽn wẽnd a woto ye.» A Moyiis yii Faarõ nengẽ n looge.

⁷La rĩmã tʋmtʋmdbã yeela rĩmã yaa: «Rao-kãngã na n yɩɩ bẽdg tõnd yĩng hal tɩ ta dabʋre? Bas-y nin-bãmbã tɩ b kẽng n tɩ waoog Sẽn-Ka-Saab sẽn yaa bãmb Wẽnnaamã. Yãmb ket n nan ka mi tɩ Ezɩpt tẽngã sãamdame?»

⁸Dẽ, b kɩtame t'a Moyiis ne a Aarõ lebg n wa Faarõ nengẽ t'a yeel-b yaa: «Kẽng-y n tɩ waoog-y Sẽn-Ka-Saab sẽn yaa yãmb Wẽnnaamã. La yaa ãnda rãmb n na n kẽngã?»

⁹A Moyiis leokame yaa: «Yaa tõnd ne d kom-bɩɩsã, la d nin-kẽemsã, ne d kom-dibli wã la d kom-pugli wã, ne d rũm-bãoonegã, la d rũm-bɛdã n na n kẽnge. Bala, yaa Sẽn-Ka-Saab tigr tõnd yĩnga.»

¹⁰Dẽ, Faarõ yeela bãmb yaa: «Sã n yaa woto, mam sã n wa bas yãmb ne y zagsã rãmb tɩ y na n looge, bɩ Sẽn-Ka-Saab zĩnd ne yãmba. La mam miime tɩ yãmb sẽn dat n maan bũmb ningã yaa wẽnga.

¹¹Ayo! Rẽ ka tõe ye! M kotame tɩ yãmb daopã bal kẽng n tɩ waoog Sẽn-Ka-Saabo. Bala, yaa woto la yãmb kos yã.» Dẽ, b riga bãmb tɩ b yi Faarõ nengẽ n looge.

¹²Dẽ poore, Sẽn-Ka-Saab yeela a Moyiis t'a tẽeg a nug Ezɩpt tẽngã zugu, tɩ sʋy kẽ tẽngã n sãam koodã zãnga, ne bũmb nins fãa sapɩlmã sẽn basã.

¹³A Moyiis tẽega a dasaarã Ezɩpt tẽngã zugu, la Sẽn-Ka-Saab kɩtame tɩ sobg yi yaang n wa, la a fuga badaar wĩntoogã ne a yʋngã tõre. La vẽkembeoog yibeoogo, sobg yii yaang n wa ne sʋyã.

¹⁴La sʋyã siga Ezɩpt tẽngã zĩig fãa. B zɩ n yãnd sʋy sõor sẽn ta a woto, la b kõn tol n yãnd a buud me ye.

¹⁵Sʋyã rag n luda tẽngã fãa, la tẽn-gãongã zãng rag n sobame. Sʋyã rɩɩ koodã ne tɩɩsã biis zãnga, la bũmb nins fãa sẽn pa sapɩlmã loogr zugẽ wã. Ezɩpt tẽngã fãa pʋgẽ, vãoog ka pa tɩɩg zugu, la moog me ka pa pʋtã pʋs ye.

¹⁶La Faarõ yika tao-tao n kɩt tɩ b bool a Moyiis ne a Aarõ n yeel-b yaa: «Mam maana yel-wẽnd n beeg Sẽn-Ka-Saab sẽn yaa yãmb Wẽnnaamã, la m beega yãmb me.

¹⁷Dẽ wã, bɩ y kõ-m sugr m sẽn leb n beegã yĩnga, la y yõk Sẽn-Ka-Saab sẽn yaa yãmb Wẽnnaamã sɛɛg m yĩnga, tɩ b tõe n zãag-m ne to-kãngã sẽn dat n kʋ maamã.»

¹⁸Dẽ, a Moyiis yii Faarõ nengẽ n looge, la yẽnda tɩ yõka Sẽn-Ka-Saab sɛɛga.

¹⁹La Sẽn-Ka-Saab kɩtame tɩ sobg sẽn tar pãng yi nin-taoor n wa kãag sʋyã n tɩ lob rudum ko-kãsengã pʋgẽ, la sʋʋr ba a yembr ka pa Ezɩpt soolmã pʋgẽ ye.

²⁰Sẽn-Ka-Saab kɩtame tɩ Faarõ keng a sũuri, n ka sak n bas Israyɛll nebã tɩ b loog ye.

²¹Sẽn-Ka-Saab yeela a Moyiisi: «Zẽk f nug n tees yĩngri, tɩ lik bida zĩnd Ezɩpt tẽngã pʋgẽ tɩ b tõe n sɩɩs-a.

²²Dẽ, a Moyiis zẽka a nug n tees yĩngri, la Ezɩpt tẽngã fãa zĩnda lik bida pʋg rasem a tãabo.

²³La ned ba a yembr dag n ka leb n tõe n yãnd a to ye. Ned kam fãa pa a sẽn dag n beẽ n tãag rasem a tãabã. La Israyɛll nebã sẽn dag n beẽ wã rag n tara vẽenem.»

²⁴Dẽ, Faarõ kɩtame tɩ b tɩ bool a Moyiisi, la yẽnda yeela a Moyiis yaa: «Yãmb tõe n kẽng n tɩ waooga Sẽn-Ka-Saabo. La y rũm-bɛdã ne y rũm-bãoonegã ka na n tũ yãmb ye. Yaa yãmb zakã rãmb bal n tõe n tũ yãmb n looge.»

²⁵La a Moyiis leokame: «Yãmb meng n na n kõ tõnd rũms tɩ d maan zems-n-taar maoongã, ne maoong sẽn yõogd bugmã n kõ Sẽn-Ka-Saab sẽn yaa tõnd Wẽnnaamã.

²⁶Tõnd na n zã d rũmsã, la baa rũng naobeng meng ka na n pa ka ye. Bala, yaa bãmb sʋkã la d na n yãk rũms nins sẽn na n tall n maan maoong n kõ Sẽn-Ka-Saab sẽn yaa tõnd Wẽnnaamã. La sã n ka tõnd taa beenẽ, tõnd ka tõe n yãg n bãng rũm-bãmb ye.»

²⁷Sẽn-Ka-Saab kɩtame tɩ Faarõ keng a sũuri, n ka sak n bas bãmb tɩ b loog ye.

²⁸Faarõ yeela a Moyiisi: «Yi m zakẽ wã! Da leb n saag n bao tɩ wa mam taoor yɛs ye. Daar ning fo sẽn na n wa mam taoorã, badaar na n yɩɩ f kũum daare.»

²⁹La a Moyiis leoka yẽnda yaa: «Yaa yãmb n yeele, la mam kõn tol n leb n wa yãmb taoor yɛs ye.»