Read SEBR SÕNGO, 1998 Yikri 11 Bible Online

Yikri 11 - SEBR SÕNGO, 1998 bible

Yikri 11

¹Sẽn-Ka-Saab yeela a Moyiis yaa: «Mam na n kɩtame tɩ toog a to paam Ezɩpt rĩmã ne a nebã: Dẽ poore, yẽnda na n basa yãmb tɩ y loog n yi zĩ-kãngã. La a sã n wa kong n na n bas yãmb tɩ y looge, a na n diga yãmb tɩ y yi n looge.

²Mam kotame tɩ f gom ne nebã, n yeel-b tɩ sã n yaa raoa, wall paga, bɩ ned fãa kos a yak sãnem ne wanzuri teedo.»

³Sẽn-Ka-Saab kɩtame tɩ Ezɩpt nebã yik n nong Israyɛll nebã, la tɩ Faarõ nebã ne Ezɩpt nebã rag n waoogda a Moyiis hal wʋsgo.

⁴A Moyiis yeelame: «Ade, Sẽn-Ka-Saab yetame: ‹Yʋn-sʋkã, mam na n pɩʋʋga Ezɩpt tẽngã pʋga.

⁵La Ezɩpt kom-dẽemsã fãa na n kiime. Yaa sẽn sɩng ne Faarõ sẽn zao a naam geerẽ wã bi-rẽenga, hal n tãag yem-pogsã sẽn be neerẽ n werdã kom-dẽemse, ne rũmsã kom-dẽemsã fãa.

⁶Kelems sẽn tat yɩɩg na n zĩnda Ezɩpt tẽngã zĩigã fãa. A buud nan ka zĩndi, la a kõn tol n leb n zĩnd abada.

⁷La sã n yaa ne Israyɛll nebã sẽn beẽ wã, baag meng ka na n wes ned wall rũng ye. Sẽn na n yɩlẽ tɩ yãmb bãng tɩ Sẽn-Ka-Saab welga Ezɩpt nebã ne Israyɛll nebã toore.› »

⁸Dẽ, fo tʋmtʋmdbã fãa na n wa wõgemda mam taoor n yeele: ‹Bɩ foom ne neb nins fãa sẽn pʋgd foomã yi tẽngã.› Rẽ zugẽ, mam na n yi n loogame.› » A Moyiis yii Faarõ nengẽ ne sũ-puug-kãsenga.

⁹Sẽn-Ka-Saab yeela a Moyiis yaa: «Faarõ ka na n kelg yãmb goamã ye. La yaa sẽn na n yɩlẽ tɩ mam leb n maan bõn-yɛɛsds a taab n yɩlem Ezɩpt tẽngã pʋga.»

¹⁰A Moyiis ne a Aarõ rag n maana bõn-yɛɛsds-kãens fãa Faarõ taoore. Sẽn-Ka-Saab kɩtame tɩ Faarõ keng a sũuri, n ka sak n bas Israyɛll nebã tɩ b yi a tẽngẽ wã n loog ye.