Read SEBR SÕNGO, 1998 Yikri 12 Bible Online

Yikri 12 - SEBR SÕNGO, 1998 bible

Yikri 12

¹Sẽn-Ka-Saab yeela a Moyiis ne a Aarõ Ezɩpt tẽngã pʋgẽ yaa:

²«Ki-kãngã na n yɩɩ pipi kiuug kiisã fãa sʋk yãmb yĩnga. A na n yɩɩ yʋʋmdã pipi kiuug yãmb yĩnga.

³Kẽng-y n tɩ yeel-y Israyɛll nebã fãa yaa: ‹Ki-kãngã rasem piigã daare, zak fãa tog n baoo pesgo, wall bʋʋga, la yaa rũng a yembre, zak fãa yĩnga.›

⁴Zakã neb sõor sã n paoodẽ tɩ b ka tõe n sɛ pe-tõre, bɩ b pʋɩ-a ne b yak ning sẽn pẽ n yɩɩdã, wa sẽn zems nebã sõore. Bɩ y pʋɩ pesgã n zems ned fãa sẽn tõe n dɩ to-to.

⁵Pesgã tog n yɩɩ pe-raoog sẽn zems yʋʋmde, la sẽn ka tar zang ye. Yãmb tõe n baoo pe-bila, wall bulla.

⁶Yãmb na n baoo zĩig n bĩng-a tɩ ta ki-kãngã rasem piig la a naasã daare. Israyɛll nebã fãa na n kodg-a-la zaab-noor wakate.

⁷Bɩ b yãk a zɩɩmã n mes y rot nins yãmb sẽn na n zĩnd-b pʋs n dɩ-a wã lug a yiibã zutu, la y mes rignoorã zugẽ.

⁸Badaar yʋngo, bɩ y sẽ rũngã, la y wãb a nemdã ne bur sẽn ka ning rã-bɩlle, la ne mood sẽn yaa toogo.

⁹Bɩ y ra wãb rũngã nemd tɩ ka bɩ n ta, wall y rʋg-a ne koom ye. Sẽ-y-yã a zugã ne a karsã la a pʋ-teedã.

¹⁰Bɩ y ra bas rũngã neong ba a yembr tɩ vẽeg beoog ye. Beoogã sã n vẽeg tɩ nemdã ketẽ, bɩ y rɩk-a n yõog bugum.

¹¹Ad yãmb sẽn na n dɩ-a to-to: Sẽb-y y sẽbdga, la y wid y neooda, tɩ y dasaarã be y nugẽ. Rɩ-y-yã-a ne yãgbo. Sẽn-Ka-Saab Pak tigrã la woto.

¹²Badaar yʋngo, mam na n pɩʋʋga Ezɩpt tẽngã, la m na n kʋʋ Ezɩpt kom-dẽemsã fãa kɛpɩ, sẽn sɩng ne ninsaalbã tɩ ta rũmsã, la mam na n sɩbga Ezɩpt wẽnnaam-dãmbã fãa. Mam yaa Sẽn-Ka-Saabo.

¹³Zɩɩmã sẽn be rot nins yãmb sẽn be b pʋsẽ wã zutã na n yɩɩ bãnd yãmb yĩnga. La mam sã n yãnd zɩɩmã, mam na n zʋʋg n basa yãmba, la toog sẽn sãamdã ka na n paam yãmb wakat ning mam sẽn na n sɩbg Ezɩptã ye.

¹⁴Daarã na n yɩɩ tẽegr daar yãmb yĩnga. Yãmb na n maan-a lame t'a yɩ tigr Sẽn-Ka-Saab yĩng n tẽegd da-kãng yelle, la y na n maand-a lame t'a yɩ wa no-tũudg sẽn ka sɛta, yãmb zamaan-dãmbã fãa yĩnga.»

¹⁵Yãmb na n dɩɩ bur sẽn ka ning rã-bɩll dasem a yopoe tõre. La sẽn sɩng ne rasem a yopoe wã pipi daarã, bɩ y yiis rã-bɩllã y rotẽ wã. Ned ning sẽn na n dɩ-a bũmb sẽn ning rã-bɩlle, pipi daarã n tãag rasem a yopoe daarã, b na n yiis-a-la Israyɛll buudã neb sʋka.

¹⁶Pipi daarã ne rasem a yopoe daarã, bɩ y maan tiging sẽn welg toore. La ned ka tog n tʋm dasem-kãens daarã, sã n ka tɩ segl rɩɩb n kõ yãmb ned kam fãa bala.

¹⁷Maand-y bur sẽn ka ning rã-bɩll tigrã, bala, yaa ra-kãng la mam yiis yãmb tãb-biisã Ezɩpt tẽnga. Bɩ y tẽegd da-kãng yelle, t'a yɩ no-tũudg sẽn ka sɛta, yãmb zamaan-dãmbã fãa yĩnga.

¹⁸Pipi kiuugã rasem piig la a naasã daar zaabre, yãmb na n dɩta bur sẽn ka ning rã-bɩlle, n tãag a rasem pisi la a yembrã daar zaabre.

¹⁹Rasem a yopoe tõre, b ka tog n yãnd rã-bɩll yãmb dotẽ wã ye. Bala, ned ning fãa sẽn na n dɩ-a bur sẽn ning rã-bɩlle, b na n yiisa a soab Israyɛll buudã neb sʋk n kʋ, sã n yaa sãana, wall tẽng-n-neda.

²⁰Bɩ yãmb da rɩ bũmb sẽn ning rã-bɩll ye. Yãmb sẽn be zĩig ning fãa, bɩ y rɩ bur sẽn ka ning rã-bɩlle.

²¹A Moyiis boola Israyɛll kasem-dãmbã fãa n yeel-b yaa: «Kẽng-y n tɩ bao-y rũm-bãooneg yãmb yirã rãmb yĩnga, n kʋ n maan Pak tigrã.

²²Dẽ poore, bɩ y bao izop vãado, n suk zɩɩmã sẽn be laagẽ wã n mes y rignoorã zugu, la y lug a yiibã. La bɩ yãmb ned ba a yembr da yi a roogẽ tɩ beoogã ka vẽeg ye.

²³Dẽ, Sẽn-Ka-Saab sã n wa n pɩʋʋgd n na n sɩbg Ezɩpt nebã, n yãnd zɩɩmã sẽn be y rignoorã ne y lug a yiibã zutã, Sẽn-Ka-Saab na n zʋʋga yãmb dignoorã, la b ka na n bas sãamdã ne toogã t'a kẽ yãmb dotã pʋs ye.

²⁴Bɩ bõn-kãng yɩ no-tũudg yãmb ne y yagensã yĩng zamaan woo zamaane.

²⁵Yãmb sã n wa tɩ kẽ tẽng ning Sẽn-Ka-Saab sẽn kãab tɩ b na n kõ-y lame wã, bɩ y maan minin-kãnga.

²⁶La yãmb yagensã sã n wa sok yãmb n na n wʋm minin-kãng võore,

²⁷bɩ y yeel-b yaa: Yaa Pak tigrã maoong tõnd sẽn maand n kõt Sẽn-Ka-Saabo, b sẽn zʋʋg n bas Israyɛll nebã rot Ezɩpt tẽngã yĩnga. Bãmb sẽn sɩbg Ezɩpt tẽngã ne toogã, b basa tõnd zagsã n ka maan-b bũmb ye.» Nebã sulgame n wõgemde.

²⁸Dẽ, Israyɛll nebã kẽngame n tɩ maan wa Sẽn-Ka-Saab sẽn dag n yeel a Moyiis ne a Aarõ wã.

²⁹Yʋn-sʋk wakate, Sẽn-Ka-Saab kɩtame tɩ Ezɩpt kom-dẽemsã fãa ki, sẽn sɩng ne Faarõ sẽn zao a naam geerẽ wã bi-kãseng tɩ ta sẽn be-b bi-bees roogẽ wã kom-dẽemse, la rũmsã kom-dẽems me.

³⁰Faarõ ne a ʋmtʋmdbã, la Ezɩpt nebã fãa yika ne yʋngã, la kelem-kãsems yika Ezɩpt tẽngã pʋgẽ, bala zak ka zĩnd tɩ kũum ka ki ye.

³¹Yʋn-kãng bala, Faarõ boola a Moyiis ne a Aarõ n yeel-b yaa: «Bɩ yãmb ne Israyɛll nebã yi la y bas m tẽngã. Kẽng-y n tɩ waoog-y Sẽn-Ka-Saab wa y sẽn dag n yeelã.

³²Tall-y y rũm-bãoonegã ne y rũm-bɛdã me n looge, wa y sẽn dag n kosã. Kẽng-y la y ning mam me zug barka.»

³³Ezɩpt nebã rag n pẽdgda Israyɛll nebã. Bãmb dag n datame tɩ Israyɛll nebã loog n bas tẽngã tao-tao, bala, b rag n tẽedame tɩ bãmb sẽn yaa Ezɩpt nebã na n kii zãnga.

³⁴Israyɛll nebã rɩka b zom-nagdɩ wã sẽn nan ka ning rã-bɩllã. Bãmb dag n luda b wamã ne b futu, n bob b bãgdẽ.

³⁵Israyɛll nebã maana wa a Moyiis sẽn dag n yeelã. Bãmb kosa Ezɩpt nebã wanzuri ne sãnem teedo, la futu.

³⁶Sẽn-Ka-Saab kɩtame tɩ Ezɩpt nebã nand Israyɛll nebã, la Ezɩpt nebã kõo bãmb bũmb nins b sẽn kosã. Dẽ, bãmb reesa Ezɩpt nebã sẽn dag n tarã fãa.

³⁷Israyɛll nebã yii Ramsɛs n dabd Sukote. Raop nins sẽn dag n kẽnd-b ne naoã sõor dag n kolga neb tus kobs-yoobe, kambã sõor sẽn ka naage.

³⁸Neb sẽn yaa buud toor-toor neb me n dag n be ne bãmba, la nin-bãmb rag n tara rũm-bãooneg ne rũm-bɛd wʋsgo.

³⁹Bãmb dɩka zom-nagdem nins b sẽn yi ne Ezɩptã n maan bur-maas sẽn ka ning rã-bɩlle. Bala, b riga bãmb Ezɩpt tɩ b ka paam n yals tɩ zom-nagdmã wuki, la b ka paam n bao rɩɩb n zã me ye.

⁴⁰Israyɛll nebã zĩnda Ezɩpt yʋʋm kobs-naas la pis-tã.

⁴¹La yʋʋm kobs-naas la pis-tã wã zugẽ, Sẽn-Ka-Saab nebã fãa yii Ezɩpt tẽngã.

⁴²Badaar yʋngo, Sẽn-Ka-Saab gesa bãmb yell tɩ b tõog n yi Ezɩpte. Woto me, Israyɛll nebã tog n dɩka ra-kãng tɩ yɩ tẽegr daare, zamaan woo zamaane.

⁴³Sẽn-Ka-Saab yeela a Moyiis ne a Aarõ yaa: «Ade, Pak tigrã no-tũudg la woto: ‹Sãan ba a yembr ka tar noor tɩ rɩ Pak tigrã rɩɩb ye.›

⁴⁴Yamb ning fãa f sẽn da ne ligd ka tog n dɩ Pak tigrã rɩɩb tɩ f ka reng n kẽes-a bãong ye.

⁴⁵Nin-loaagdg wall tʋmtʋmd sẽn deegd yaood ka tar noor tɩ rɩ Pak tigrã rɩɩb ye.

⁴⁶Yãmb na n wãba nemdã roog a ye pʋgẽ. Yãmb ka tog n tall neong n yi roogã pʋgẽ, la y ka tog n wõrg kõbr ba a yembr ye.

⁴⁷Bɩ Israyɛll buudã neb fãa maan Pak tigrã.

⁴⁸Nin-loaagdg sã n be yãmb sʋkã n dat n maan Pak tigrã n waoog Sẽn-Ka-Saabo, bɩ a raopã ne kom-dibli nins fãa sẽn be yẽnda zakẽ wã reng n kẽ bãongo. Dẽ poore, a na yaool n naag Israyɛll nebã n maan Pak tigrã. La rao sẽn ka kẽ bãong ka tog n dɩ tigrã rɩɩb ye.

⁴⁹Tõogã tog n yɩɩ bũmb a yembr Israyɛll nebã ne sãamb nins sẽn be yãmb tẽngẽ wã yĩnga.»

⁵⁰Dẽ, Israyɛll nebã fãa maana wa Sẽn-Ka-Saab sẽn dag n yeel a Moyiis ne a Aarõ wã kɛpɩ-kɛpɩ.

⁵¹La badaar bala, Sẽn-Ka-Saab kɩtame tɩ Israyɛll nebã yi Ezɩpt tẽngã, tãb-bi-sull-sulli.