Read SEBR SÕNGO, 1998 Yikri 13 Bible Online

Yikri 13 - SEBR SÕNGO, 1998 bible

Yikri 13

¹Sẽn-Ka-Saab goma ne a Moyiis n yeele:

²Welg nebã ne rũmsã kom-dẽemsã fãa toor mam yĩnga, bala, Israyɛll bi-ribl-rẽeng ne rũng bi-rẽeng fãa yaa maam n so.

³Dẽ, a Moyiis yeela nebã yaa: «Tẽeg-y daar ning yãmb sẽn yi Ezɩptã, daar ning yãmb sẽn yi yembd pʋgẽ wã yelle. Bala, yaa ne Sẽn-Ka-Saab nug sẽn tar pãngã la b yiis yãmb beenẽ. Bɩ ned da rɩ bũmb sẽn ning rã-bɩll ye.

⁴Rũndã, yãmb yita bõn-bɩʋʋng kiuugã.

⁵Sẽn-Ka-Saab sã n wa kɩt tɩ yãmb kẽ tẽng ning Kana nebã, ne Hɛt nebã, la Amoor nebã, ne Hevi nebã, la Zebuus nebã sẽn beẽ wã pʋga, tẽng ning Sẽn-Ka-Saab sẽn dag n kãab n yeel tɩ b na n kõo y yaab-rãmbã, sẽn yaa tẽng sẽn pid ne bĩisim la sɩɩdã, bɩ y maan minin-kãng ki-kãng pʋgẽ.

⁶Yãmb na n dɩɩ bur sẽn ka ning rã-bɩll dasem a yopoe. La rasem a yopoe soabã daare, bɩ y maan tigr Sẽn-Ka-Saab yĩnga.

⁷Rasem-kãens pʋse, bɩ y rɩ bur sẽn ka ning rã-bɩlle. Yãmb soolmã pʋgẽ, b ka tog n yãnd rã-bɩll beenẽ ye.»

⁸Badaare, bɩ y yeel y kambã a woto: «Yaa bũmb ning Sẽn-Ka-Saab sẽn maan tõnd yĩng wakat ning tõnd sẽn yi Ezɩpt tẽngã yĩnga, la d maand woto.»

⁹Bõn-kãng na n yɩɩ bãnd yãmb nusẽ, la a yɩ bãnd yãmb rĩirẽ, n yaa tẽegr yãmb yĩnga, tɩ yãmb tõe n togsd Sẽn-Ka-Saab tõogã. Bala, yaa ne nug sẽn tar pãng la Sẽn-Ka-Saab yiis yãmb Ezɩpt tẽnga.

¹⁰Fo na n sakda tõ-kãng yʋʋmd fãa, wa sẽn zems wakat ning b sẽn yãkã.

¹¹«Sẽn-Ka-Saab sã n wa tall yãmb n tɩ kẽes Kana nebã tẽngẽ, wa bãmb sẽn dag n wẽen n yeel tɩ b na n kõo yãmb ne y yaab-rãmbã, b sã n wa kõ yãmb tẽn-kãnga,

¹²bɩ y welg biig fãa sẽn yaa a ma bi-rẽenga, la ne yãmb rũmsã kom-dẽems nins fãa sẽn yaa raadã n kõ Sẽn-Ka-Saabo. Raadã fãa yaa Sẽn-Ka-Saab n so.

¹³Yãmb na n dɩka bõang bi-rẽeng fãa sẽn yaa raoog n tek ne pe-bila wall ne bʋʋga. La yãmb sã n ka rat n tek bõangã, bɩ y wẽ a kãarã n wãage. Bɩ y ra ninsaalbã kom-dẽemsã fãa sẽn be yãmb kom-dibli wã sʋkã.

¹⁴Dẽ, yãmb kambã sã n wa sok yãmb nindaar n dat n bãng bõn-kãng võore, bɩ y yeel-ba: Yaa ne nug sẽn tar pãng la Sẽn-Ka-Saab yiis tõnd Ezɩpt yembdã pʋgẽ.

¹⁵Faarõ sẽn zãgs n ka bas tõnd tɩ d loogã, Sẽn-Ka-Saab kʋʋ Ezɩpt kom-dẽemsã fãa, sẽn sɩng ne ninsaalbã kom-dẽems hal tɩ ta rũmsã kom-dẽemse. Yaa rẽ n kɩt tɩ tõnd dɩkd kom-dẽemsã fãa sẽn yaa raopã n maand maand n kõt Sẽn-Ka-Saabo, la d daad kom-dẽems nins fãa sẽn be tõnd kom-dibli wã sʋkã.

¹⁶Bõn-kãng na n yɩɩ bãnd yãmb nusẽ, la a wa bãnd sẽn loe yãmb dĩirẽ. Bala, yaa ne nug sẽn tar pãng la Sẽn-Ka-Saab yiis tõnd Ezɩpt soolem pʋgẽ.»

¹⁷Faarõ sẽn bas nebã tɩ b loogã, Wẽnnaam ka tall bãmb n dɩk sor ning sẽn tũud Filistẽ-dãmbã soolmẽ wã ye. Baa ne so-kãng sẽn pẽ n yɩɩdã. Bala, Wẽnnaam yeelame tɩ nebã sã n yãnd zabrã, b tõe n wa maana b bãngẽ, n tek yam n lebg n leb Ezɩpt tẽnga.

¹⁸Dẽ, Wẽnnaam kɩtame tɩ nebã rɩk we-raoogã sor ning sẽn dabd-a rudum ko-kãsengã sẽnẽ wã. Israyɛll nebã tonga taab tãb-bi-sull-sull n yi Ezɩpt tẽngã.

¹⁹A Moyiis wʋka a Zozɛf kõabã n zã. Bala, a Zozɛf rag n kɩtame tɩ Israyɛll kambã wẽene. Yẽnda rag n yeelame: «Wẽnnaam sã n wa maan yãmb neere, bɩ y wʋk mam kõabã n yi ka n looge.»

²⁰Dẽ, bãmb yii Sukot n kẽng n tɩ tilg b sik-zĩigã Etam sẽn be we-raoogã kɩrengã.

²¹Sẽn-Ka-Saab rag lʋɩta bãmb taoor sawad-taok pʋgẽ wĩntoogo, n yãagd bãmb sorã zugu. La yʋngo, sawad-taokã lebgda bugum n kõt bãmb vẽenem, tɩ b tõe n kẽnd wĩntoog ne yʋngo.

²²La sawad-taokã rag n ka sergd n bas nebã wĩntoogo, la bugmã me ka basd bãmb yʋng me ye.