Read SEBR SÕNGO, 1998 Yikri 17 Bible Online

Yikri 17 - SEBR SÕNGO, 1998 bible

Yikri 17

¹Israyɛll kʋʋngã fãa yikame n yi Sĩn we-raoogẽ wã, n dɩk sor n sɩng kẽnd wa Sẽn-Ka-Saab sẽn dag n yeel bãmbã. La bãmb siga Refidim. La koom dag n ka be nebã sẽn na n yũ ye.

²Dẽ, nebã leb n yika zabr ne a Moyiis n yeele: «Kõ-y tõnd koom tɩ d yũ.» La a Moyiis soka bãmb yaa: «Yaa bõe tɩ yãmb zabd ne maam? Yaa bõe tɩ yãmb baood Sẽn-Ka-Saab noore?»

³Ko-yũud yõka nebã beenẽ. La nebã yẽgma ne a Moyiis n yeele: «Yaa bõe tɩ yãmb yiis tõnd Ezɩpt soolmã pʋgẽ, n tall tõnd n wa ka tɩ d na n ki ko-yũudu, tõnd ne d kambã la d rũmsã?»

⁴A Moyiis zẽka a koɛɛg n gom ne Sẽn-Ka-Saab n yeele: «Mam na n maana bõe ne nin-kãensã? Ketẽ-la bilfu, tɩ bãmb lob maam ne kuga.»

⁵Dẽ, Sẽn-Ka-Saab yeela a Moyiis yaa: «Lʋɩ nebã taoore, yãk Israyɛll kãsem-dãmb kẽer tɩ b tũ foom. Rɩk dasaar ning fo sẽn dag n tall n wẽ Nill kʋɩlgã koomã n kẽnge.

⁶La sã n yaa ne maam, mam na n yalsa fo taoor beenẽ, pĩig ning sẽn be Horɛɛbã zugu. La fo na n wẽe pĩigã tɩ koom yi a pʋgẽ tɩ nebã yũ.» A Moyiis maana woto Israyɛll nebã kãsem-dãmbã nifẽ.

⁷A Moyiis pʋda zĩigã yʋʋr tɩ Masa, sẽn dat n togs tɩ ‹no-baoodem›, la Meriba, sẽn dat n togs tɩ ‹zabre.› Bala, Israyɛll nebã zaba ne Sẽn-Ka-Saabo, la b bao bãmb noor n yeele: «Rẽ yĩnga, Sẽn-Ka-Saab bee tõnd sʋk bɩ, bɩ b ka be?»

⁸Amalɛk rãmba waa Refidim n na n zab ne Israyɛll nebã.

⁹Dẽ, a Moyiis yeela a Zozoe yaa: «Yãk neb tõnd yʋʋr yĩng n yi n tɩ zab ne Amalɛk rãmbã n kõ-do. Beoogo, mam na n zãa Wẽnnaam dasaarã n tɩ yals tãn-bilã zugu.»

¹⁰A Zozoe maana wa a Moyiis sẽn yeel yẽnda wã. Yẽnda kẽngame n tɩ zab ne Amalɛk rãmbã. La a Moyiis ne a Aarõ la a Ʋʋr dʋʋ tãn-bilã zugu.

¹¹La a Moyiis sã n zẽk a nugã, Israyɛll dãmbã tõogdame, la yẽnda sã n sik a nugã, Amalɛk rãmbã tõogdame.

¹²La a Moyiis nusã sẽn yɛ wã yĩnga, a Aarõ ne a Ʋʋr dɩka kugr n kõ yẽnda t'a zaoonde. La a Aarõ ne a Ʋʋr gãda yẽnda nusã, a yembr dɩtgo, a yembr goabga. Woto, a Moyiis nusã kengame hal tɩ ta wĩndgã kõom.

¹³La a Zozoe tõoga Amalɛk nebã ne sʋʋga.

¹⁴La Sẽn-Ka-Saab yeela a Moyiis yaa: «Gʋls yõwã sebr pʋgẽ tẽegr yĩnga, la bɩ f yeel a Zozoe tɩ mam na n menesa Amalɛk buudã zãnga, tɩ b ka leb n tẽeg b yell saasã tẽngr ye.»

¹⁵Dẽ, a Moyiis maana tẽn-kugri, n pʋd a yʋʋr tɩ Adonayi-Nisi[1].

¹⁶La yẽnda yeelame: «Nug n zẽk n zabd ne Sẽn-Ka-Saab geerã. Woto yĩnga, Sẽn-Ka-Saab na n yika zabre. Bãmb na n zaba ne Amalɛk rãmbã zamaan woo zamaane.»