Read SEBR SÕNGO, 1998 Yikri 18 Bible Online

Yikri 18 - SEBR SÕNGO, 1998 bible

Yikri 18

¹A Moyiis rɛɛmb a Zetro sẽn yaa Madiyã maan-kʋʋdã wʋma bũmb nins fãa Wẽnnaam sẽn maan n kõ a Moyiis ne Israyɛll dãmbã sẽn yaa bãmb nebã. Yẽnda wʋma Sẽn-Ka-Saab sẽn yiis Israyɛll nebã Ezɩpt tẽngã.

²A Moyiis rɛɛmb a Zetro peega a Moyiis pag a Sefoora n wa, a Moyiis rag n kɩtame t'a Sefoora

³ne a kom-dibli a yiibã kuili. Bi-ribl a yembr yʋʋr dag n boondame t'a Gersom[2]. Bala, a Moyiis rag n yeelame: «Mam yaa sãan n be tẽn-zẽnga.»

⁴La yẽnda bi-ribl a to wã yʋʋr dag n boondame t'a Eliyezɛɛre[3]. Bala yẽnda rag n yeelame: «Mam ba wã Wẽnnaam wa n sõnga maam, n fãag maam tɩ Faarõ ka kʋ maam ye.»

⁵A Moyiis rɛɛmb a Zetro ne a Moyiis kom-dibli wã, la a Moyiis pagã wa n mika a Moyiis a sik zĩigẽ wã we-raoogã pʋgẽ, Wẽnnaam tãngẽ wã.

⁶Yẽnda yeela a Moyiis yaa: «Maam a Zetro sẽn yaa fo rɛɛmbã waame n na n ges foom, la fo pagã ne a kom-dibli a yiibã tũu maam.»

⁷Dẽ, a Moyiis yiime n seg a rɛɛmbã, n wõgemd a taoore, la a mok-a. La bãmb soka taab kibare, la b tũ taab n kẽ a Moyiis fu-roogẽ wã.

⁸La a Moyiis togsa a rɛɛmbã bũmb nins fãa Sẽn-Ka-Saab sẽn maan Faarõ ne Ezɩpt rãmbã Israyɛll nebã yĩngã, la namsg nins fãa sẽn paam bãmb sorã zugã, la Sẽn-Ka-Saab sẽn fãag bãmb to-to.

⁹La a Zetro sũur yɩɩ noog wʋsg ne maan neer ning fãa Sẽn-Ka-Saab sẽn maan Israyɛll nebã, n fãag bãmb Ezɩpt rãmbã nusẽ wã.

¹⁰Dẽ, a Zetro yeelame: «Bɩ Sẽn-Ka-Saab paam pẽgre, bãmb sẽn fãag yãmb Ezɩpt nebã ne Faarõ nugẽ wã yĩnga, la b sẽn fãag b nebã Ezɩpt nebã nusẽ wã yĩnga.

¹¹Moasã, mam miime tɩ Sẽn-Ka-Saab yaa kãseng n yɩɩd wẽnnaam-dãmbã fãa, bala, bãmb fãaga b nebã Ezɩpt nebã nusẽ, wakat ning Ezɩpt nebã sẽn dag n maand bãmb pãngã.»

¹²Dẽ, a Moyiis rɛɛmb a Zetro maana maoong sẽn yõogd bugum ne maand a taab n kõ Wẽnnaam. A Aarõ ne Israyɛll kãsem-dãmbã fãa wa n lagma a Moyiis rɛɛmbã n dɩ Wẽnnaam taoore.

¹³Vẽkembeoogo, a Moyiis zĩndame n na n kao nebã bʋʋdo. Nebã yalsa a Moyiis taoor yibeoog hal tɩ ta zaabre.

¹⁴A Moyiis rɛɛmbã sẽn yã bũmb nins fãa yẽnda sẽn maand nebã yĩngã, yẽnda soka a Moyiis yaa: «Yaa bõe la fo sẽn maand nebã yĩngã? Yaa bõe tɩ fo zĩ kaanẽ f yembre? La bõe yĩng tɩ nebã fãa yɛs fo taoor yibeoog tɩ ta zaabre?»

¹⁵A Moyiis leoka a rɛɛmbã yaa: «Nebã wata mam nengẽ n na n sok n bãng Wẽnnaam daabo.

¹⁶Ned sã n tar yell ne a to, b wata mam nengẽ tɩ mam kao bʋʋdã, la m wilg Wẽnnaam no-tũudsã ne b tõodã.»

¹⁷A Moyiis rɛɛmbã yeela yẽnda yaa: «Fo sẽn maand bũmb ningã ka neer ye.

¹⁸Foom ne neb nins fãa sẽn be ne foomã na n gɩmbame. Bala, tʋʋmdã yɩɩda fo pãnga. Foom f yembr ka tõe n maan yõwã ye.

¹⁹Kelg mam koɛɛgã moasã, mam na n sagla foom, la bɩ Wẽnnaam zĩnd ne foom. Yɩ nebã no-rɛɛs Wẽnnaam taoore, la f tall bãmb yɛlã n kẽng Wẽnnaam nengẽ.

²⁰Bilg bãmb Wẽnnaam no-tũudsã ne b tõodã, la f wilg bãmb sor ning bãmb sẽn tog n tũ, ne bũmb nins bãmb sẽn tog n maanã.

²¹Dẽ poore, yãk nin-yẽesens nebã sʋk sẽn zoet Wẽnnaam, la sẽn yaa sɩd dãmba, la sẽn kis zãmb bũmbu. Yãk neb tusr-tusr nanambse, neb koabg-koabg nanambse, neb pis-nunu nanambse, la neb piig-piig nanambse.

²²Bɩ nanamb-kãens kaood nebã bʋʋd wakat fãa. Sã n yaa yel-kãsemse, bɩ b tall n wa fo nengẽ, la bɩ b mens kao yel-bãoonegã bʋʋdo. Sak tɩ b sõng foom n boog f zɩɩbã.

²³Fo sã n maan bõn-kãngã, la Wẽnnaam sã n yeel foom tɩ f maan woto wall woto, fo na n tõoga tʋʋmdã, la nin-bãmbã fãa me na n tõog n ta b zĩigẽ wã ne bãane.»

²⁴A Moyiis sak n deega a rɛɛmbã saglgo, n maan bũmb nins fãa yẽnda sẽn yeelã.

²⁵A Moyiis yãka nin-yẽesens Israyɛll nebã fãa sʋka, n kɩt tɩ b lebg neb tusr-tusr nanambse, neb koabg-koabg nanambse, neb pis-nunu nanambse, la neb piig-piig nanambse.

²⁶Nanamb-kãens rag n kaooda nebã bʋʋd wakat fãa. Bãmb dag n tallda yel-kãsemsã n wat a Moyiis nengẽ, la bãmb mensã rag n kaooda yel-bãoonegã bʋʋdo.

²⁷Dẽ, a Moyiis basa a rɛɛmbã t'a looge, la a rɛɛmbã lebg n kuila a tẽngẽ.