Read SEBR SÕNGO, 1998 Yikri 24 Bible Online

Yikri 24 - SEBR SÕNGO, 1998 bible

Yikri 24

¹Rẽ, Wẽnnaam yeela a Moyiis yaa: «Bɩ foom ne a Aarõ la a Nadaab ne a Abihu la Israyɛll kãsem-dãmb pis-yopoe wã kolg tãngã n wa Sẽn-Ka-Saab sẽnẽ. La bɩ y yaas yɩɩg n wõgemde.

²Bɩ a Moyiis bal kolg Sẽn-Ka-Saabo. La bɩ neb a taabã ra kolg ye, la bɩ b ra tũ yẽnda n dʋ tãngã ye.»

³A Moyiis kẽngame n tɩ togs nebã Sẽn-Ka-Saab goamã fãa la bãmb noyã fãa. La nebã fãa naaga taab n leok n yeele: «Tõnd na n maana bũmb nins fãa Sẽn-Ka-Saab sẽn yeelã.»

⁴La a Moyiis gʋlsa Sẽn-Ka-Saab goamã fãa. La yẽnda yika tõdbeoog n maan tẽn-kugr tãngã pende, ne kug piig la a yiibu Israyɛll buud piig la a yiibã yĩnga.

⁵La yẽnda yãka Israyɛll kom-bɩɩs n tʋm tɩ b tɩ maan maand sẽn yõogd bugum, la b kʋ lols n maan zems-n-taar maand n kõ Sẽn-Ka-Saabo.

⁶La a Moyiis rɩka maandã zɩɩm pʋɩ-sʋk n ning laas pʋsẽ. La zɩɩmã pʋɩ-sʋk sẽn kellã, yẽnda rɩk-a-lame n mes tẽn-kugrã.

⁷Rẽ, yẽnda rɩka kaoolã sebr n karem tɩ nebã kelge. La nebã yeelame: «Tõnd na n sak n maana bũmb nins fãa Sẽn-Ka-Saab sẽn yeel tõndã.»

⁸Dẽ, a Moyiis rɩka zɩɩmã n yãk n mes nebã n yeele: «Woto yaa kaoolã zɩɩm, yaa kaool ning Sẽn-Ka-Saab sẽn maan ne yãmba, wa sẽn zems bãmb goamã fãa wã.»

⁹La a Moyiis ne a Aarõ la a Nadaab ne a Abihu la Israyɛll kãsem-dãmbã pis-yopoe wã rʋʋ tãngã.

¹⁰La bãmb yãnda Israyɛll Wẽnnaamã, la bãmb naoã sẽn tab zĩig ningã wẽnda wa b maana ne safɩɩr kugr sẽn pɩnd wa sa-gãongo.

¹¹La bãmb ka tẽeg b nug n sãam Israyɛll kãsem-dãmbã ye. La bãmb yãnda Wẽnnaam. La bãmb dɩɩme la b yũ.

¹²A Moyiis sẽn be Sinayi tãngã zugu, Sẽn-Ka-Saab yeela a Moyiis yaa: «Rʋ tãngã n wa mam nengẽ, n yals beenẽ tɩ m kõ-f kug-wals sẽn tar mam tõodã ne m noyã mam sẽn gʋls n na n zãms nebã»

¹³Dẽ, a Moyiis ne yẽnda sõangd a Zozoe yikame n dʋ Wẽnnaam tãngã zugu.

¹⁴A Moyiis yeela kãsem-dãmbã yaa: «Yaas-y ka n gũ tõnd tɩ d kẽng la d wa. A Aarõ ne a Ʋʋr bee ne yãmba. Ned sã n tar a yell n dat manegre, bɩ a kẽng bãmb nengẽ.»

¹⁵Dẽ, a Moyiis rʋʋ tãngã zugu. La sawaodg luda tãngã.

¹⁶La Sẽn-Ka-Saab ziir zĩnda Sinayi tãngã zugu. La sawaodgã luda Sinayi tãngã rasem a yoobe. La rasem a yopoe wã raare, Sẽn-Ka-Saab zĩnda sawaodgã pʋgẽ n bool a Moyiisi.

¹⁷Israyɛll nebã yãnda Sẽn-Ka-Saab ziirã sẽn wẽnd bug-kãseng sẽn dɩt tãngã zugu.

¹⁸La a Moyiis kẽe sawaodgã pʋgẽ n dʋ tãngã zugu. La a Moyiis paa tãngã zug rasem pis-naase, la yʋnd pis-naase.