Read SEBR SÕNGO, 1998 Yikri 29 Bible Online

Yikri 29 - SEBR SÕNGO, 1998 bible

Yikri 29

¹Ad fo sẽn na n maan bũmb ning n welg a Aarõ ne a kom-dibli wã toore, tɩ b maan maan-kʋʋr tʋʋmdã mam yĩnga: Bao loalg ne pe-raad a yiib sẽn ka tar zanga,

²ne bur sẽn ka rã-bɩlle, la bur-maas sẽn ka rã-bɩll sẽn kalem ne kaam, la bur-maas sẽn ka tar dã-bɩll b sẽn ning kaam a zugu. Maan bãmb ne bõn-koaadl zom.

³Rɩk bãmb n sagl peoog a yembr pʋgẽ n tall n wa. La f tall loalgã ne pe-raad a yiibã n wa.

⁴La f tall a Aarõ ne a kom-dibli wã n wa sɛk zĩigã noore, n so bãmb koom.

⁵La f rɩk futã n yeelg a Aarõ. Yeelg yẽnda maan-kʋʋr fuugã fu-bilã, la maan-kʋʋr fuugã, ne yãoog lutgã, n dɩk maan-kʋʋr fuugã sẽbdg n sẽbg n naag ne a mengã.

⁶La f vil a zugã ne zu-vindgã, la f fõgn-a pugl sẽn welg toorã n bʋʋg zu-vindgã.

⁷La f rɩk welgrã kaam n pʋdg a zugu. Yaa woto la fo na n ning yẽnda zug kaam n welg-a toore.

⁸Yãmb sã n maan woto n sɛ, bɩ f tall a kom-dibli wã n wa n yeelg bãmb b fu-yerdã.

⁹La f sẽbg a Aarõ ne a kom-dibli wã sẽbdse, n fõgen bãmb pugli. La maan-kʋʋrã tʋʋmd na n yɩɩ bãmb dẽnda, n yaa no-tũudg sẽn ka sɛta. Yaa woto la fo na n ning tʋʋmdã a Aarõ ne a kom-dibli wã zutu.

¹⁰Bɩ f tall lol-pollã n wa sɛk roogã noore, la bɩ a Aarõ ne a kom-dibli wã palg bãmb nus lol-pollã zugu.

¹¹La bɩ fo kʋ lol-pollã Sẽn-Ka-Saab taoor sɛk roogã noore.

¹²La f tẽk f nug-bil lol-pollã zɩɩm pʋgẽ n mes tẽn-kugrã. La f raag zɩɩm ning sẽn kellã fãa tẽn-kugrã sɛɛgẽ.

¹³Rɩk a yãadã kaam la a sãoorã kaam ne a yiim a yiibã fãa ne b kaamã n yõog bugum tẽn-kugrã zugu.

¹⁴La f yiis lol-pollã nemdã ne a gãongã la a bĩndã sik zĩigã pʋgẽ n yõog bugum yɩnga. A yaa yel-wẽnã maoongo.

¹⁵Dẽ, bɩ f tall pe-raadã sʋk pe-raoog a yembr n wa, la bɩ a Aarõ ne a kom-dibli wã palg bãmb nus pe-raoogã zugu.

¹⁶La bɩ f kʋ pe-raoogã n dɩk a zɩɩmã n daag n gilg tẽn-kugrã fãa.

¹⁷La f bees pe-raoogã n pek a pʋ-teedã ne a naoã n ning bãmb ne a nemsã ne a zugã tẽn-kugrã zug

¹⁸n yõog pe-raoogã b sẽn beesã fãa ne bugum tẽn-kugrã zugu. Yaa maoong sẽn yõogd bugum Sẽn-Ka-Saab yĩnga, n tar yũ-noogo. Yaa kũun b sẽn yõogd bugum zãng Sẽn-Ka-Saab yĩnga.

¹⁹Rɩk pe-raoog a yiibẽ soabã t'a Aarõ ne a kom-dibli wã palg b nus pe-rao-kãng zugã.

²⁰La bɩ f kʋ pe-raoogã n yãk a zɩɩmã n tẽk a Aarõ rɩtg tʋbrã, ne yẽnda kom-dibli wã rɩtg tʋbã, la bãmb dɩtg nug-raadã ne b rɩtg nao-raadã, la bɩ f rɩk zɩɩmã sẽn ketã n daag n gilg tẽn-kugrã kɩremsã fãa.

²¹Yãk zɩɩm ning sẽn be tẽn-kugrã zugã ne tikr kaamã n mes a Aarõ ne a futã, la yẽnda kom-dibli wã me ne b futã. Yaa woto la f na n welg yẽnda toor ne a futã, la yẽnda kom-dibli wã me ne b futã b tʋʋmdã yĩnga.

²²Rɩk pe-raoogã kaamã ne a zʋʋrã la a yãadã kaam ne a sãoorã kaam la a yiim a yiibã fãa ne b kaamã la a rɩtg gerã, bala, a yaa maan-kʋʋr tʋʋmd sɩngr pe-raoogo.

²³La f yãk bur-gilg a yembre, ne bur-maasr a yembr sẽn maan ne kaam, la bur-maasr sẽn yaa faasga, sẽn lagem ne bur sẽn ka rã-bɩllã sẽn be leprã pʋgẽ Sẽn-Ka-Saab taoorã.

²⁴Rɩk bõn-kãens fãa n kɩs a Aarõ ne a kom-dibli wã, la f yuum bãmb Sẽn-Ka-Saab taoore.

²⁵Dẽ, bɩ f reeg bõn-kãens b nusẽ wã, n yõog bugum tẽn-kugrã zugu. Yaa maoong sẽn yõogd bugum Sẽn-Ka-Saab yĩnga, n tar yũ-noogo. Yaa kũun b sẽn yõogd bugum zãng Sẽn-Ka-Saab yĩnga.

²⁶Rɩk pe-raoog ning sẽn yaa maoong sẽn wilgd tɩ b ninga maan-kʋʋr tʋʋmd a Aarõ zugã yãoog n yuum Sẽn-Ka-Saab taoore. La yẽnda na n yɩɩ fo pʋɩɩre.

²⁷Bɩ f welg pe-raoogã yãoog ne a gerã b sẽn zẽk n yuumã toore. Yaa pe-raoog ning b sẽn kʋ wakat ning b sẽn ning maan-kʋʋr tʋʋmdã a Aarõ ne a kom-dibli wã zutã.

²⁸Yãoogã ne gerã na n yɩɩ a Aarõ ne a kom-dibli wã pʋɩɩre, la a na n yɩɩ no-tũudr wakat sẽn ka sɛta yĩnga. B tog n yãka bãmb Israyɛll nebã sẽn so wã pʋgẽ. Bõn-kãng yaa pʋɩɩr b sẽn yãkde. Rẽndã na n yɩɩ pʋɩɩr b sẽn yãkd Israyɛll nebã sẽn so wã pʋgẽ. Yaa bãmb zems-n-taar maandã zug la b tog n yãk-a. Yaa kũun bãmb sẽn yãkd n kõt Sẽn-Ka-Saabo.

²⁹A Aarõ maan-kʋʋr tʋʋmdã fut sẽn welg toorã na n yɩɩ yẽnda kom-dibli wã sẽn na n led yẽnda wã rẽnda. Bãmb na n yeelga fu-bãmb wakat ning b sẽn na n tik bãmb ne kaam n ning maan-kʋʋr tʋʋmd bãmb zutã.

³⁰A Aarõ bi-ribl ning sẽn na n led-a yẽnda zĩigẽ wã na n yeelga fu-kãens rasem a yopoe, n yaool n kẽ sɛk roogã pʋgẽ n maan sɛk roogã tʋʋmde.

³¹Rɩk pe-raoog ning b sẽn maan maoong wakat ning b sẽn ning maan-kʋʋr tʋʋmd bãmb zutã n dʋg a zĩig sẽn welg toor pʋgẽ.

³²La bɩ a Aarõ ne a kom-dibli wã wãb pe-raoogã nemdo, ne bur ning sẽn be leprã pʋgẽ wã sɛk roogã noore.

³³Bãmb tog n dɩɩ b sẽn dɩk bũmb ning n maan paoosg tʋʋmd bãmb yĩnga, n ning maan-kʋʋr tʋʋmd bãmb zut n welg bãmb toorã. Yaa bãmb bal n na n dɩ bõn-kãense. Ned sẽn ka maan-kʋʋd ka tog n dɩ-a ye, bala, bõn-kãens yaa bũmb sẽn welg toore.

³⁴La maoong ning sẽn wilgd tɩ b ninga maan-kʋʋr tʋʋmd bãmb zutã nemdã ne burã sã n kell n vẽeg beoogo, bɩ b yõog-a bugum. Bɩ y ra rɩ-a ye. Bala, yaa bũmb sẽn welg toore.

³⁵Maan a Aarõ ne a kom-dibli wã wa sẽn zems bũmb nins mam sẽn wilg foomã. Yaa rasem a yopoe tõr la fo na n dɩk maan-kʋʋr tʋʋmdã n ning bãmb zutu.

³⁶Daar fãa, bɩ f kʋ lol-polle, tɩ yɩ kongr maoongo. Bõn-kãng yaa paoosg yĩnga. Fo sã n maan paoosg maoong tẽn-kugrã zugu, fo na n yiisa tẽn-kugrã yel-wẽndã. Bɩ f ning kaam tẽn-kugrã zug a welgr yĩnga.

³⁷Rasem a yopoe fãa bɩ f maan paoosg maoong tẽn-kugrã zug n welg yẽnda a tʋʋmdã yĩnga. La a na n paama welgr hakɩɩka. Bũmb ning fãa sẽn na n sɩɩs tẽn-kugrã me na n lebga bũmb sẽn welg toore.

³⁸Ad maoong ning fo sẽn na n maan tẽn-kugrã zug wakat fãa: Daar fãa, yaa pe-bi a yiibu sẽn tar yʋʋmde.

³⁹Kʋ pe-bil a yembre, n maan maoong yibeoogo, la f kʋ pe-bil a yiib soabã n maan maoong zaabre.

⁴⁰La ne dẽenem pe-bil a yembrã, bɩ f paas zom-bãaneg wũmbl a tãab la pʋɩ-sʋka, la bɛka sẽn kalem ne oliiv kaam yãmb sẽn wõde, litr a ye la pʋɩ-sʋk la bɛka, la reezẽ rãam litr la pʋɩ-sʋk la bɛka, tɩ yɩ bõn-yũudl kũun maoongo.

⁴¹La zaabre, bɩ f kʋ pe-bil a yiibẽ soabã. La f kõ bõn-koaadl kũun ne bõn-yũudl kũuni wa sẽn maand yibeoogã, t'a lebg yũug sẽn yaa sõama. Yaa maoong sẽn dɩt bugum Sẽn-Ka-Saab waoogr yĩnga.

⁴²A na n yɩɩ maoong sẽn yõogd bugum sɛk zĩigã noore, Sẽn-Ka-Saab taoor yãmb yagensã yĩng zamaan fãa, zĩig ning mam sẽn na n seg foom n gom ne foomã.

⁴³La yaa be la mam na n segd Israyɛll nebã, la a na n welga toor mam yʋʋrã sẽn be beenẽ wã yĩnga.

⁴⁴Mam na n welga sɛk zĩigã fu-roogã ne tẽn-kugrã toore. Mam na n welga a Aarõ ne a kom-dibli wã toor mam maan-kʋʋr tʋʋmdã yĩnga.

⁴⁵Mam na n paa Israyɛll nebã sʋka, la m na n yɩɩ bãmb Wẽnnaam.

⁴⁶Bãmb na n bãngame tɩ mam yaa Sẽn-Ka-Saab sẽn yaa bãmb Wẽnnaam sẽn yiis bãmb Ezɩpt n na n zĩnd ne bãmba. Mam yaa Sẽn-Ka-Saab sẽn yaa bãmb Wẽnnaam.