Read SEBR SÕNGO, 1998 Yikri 38 Bible Online

Yikri 38 - SEBR SÕNGO, 1998 bible

Yikri 38

¹Yẽnda maana maand sẽn yõogd bugum tẽn-kugr ne akasiya raado. Tẽn-kugrã yaa maoko. A woglem yaa kãntɩɩg a nu, a yalem me yaa kãntɩɩg a nu. A zãntlem yaa kãntɩɩg a tãabo.

²Yẽnda maana yɩɩl tẽn-kugrã kɩremsã gõdgr zĩis a naasẽ wã. Yɩɩlã ne tẽn-kugrã naaga taaba. La yẽnda lud-a-la ne zũudu.

³Yẽnda rɩka zũud n maan tẽn-kugrã teed fãa: yẽnda maana laas sẽn tar n wʋkd tompeglem ne pɛll-dãmba, la maoong zɩɩm laas ne maand kõsdse, la bugum laase.

⁴Yẽnda maana zũud gãmbr n yagl tẽn-kugrã kogrã tẽngre, tɩ gãmbrã noor a ye ta tẽnga, t'a noor a ye wã ta tẽn-kugrã zãntlem pʋɩ-sʋka.

⁵Yẽnda rõoga zũud tuiids a naas sẽn yaa gilsi, n ning gãmbrã kɩrems a naasã gõdgr zĩisẽ, n na n tui ra-bɩlmã b pʋsẽ.

⁶Yẽnda maana akasiya ra-bɩlmã n bolg bãmb ne zũudu.

⁷Yẽnda tuii ra-bɩlmã tuiids nins sẽn be tẽn-kugrã kɩrems a yiibã fãa wã pʋse, sẽn na yɩl n zã tẽn-kugrã. Yẽnda maana tẽn-kugrã ne ra-pegdo, t'a pʋgã yaa yoko.

⁸Yẽnda rɩka pagb nins sẽn tʋmd sɛk roogã noorã nin-getsã n maan zũud pekr sĩngã ne a naoã.

⁹Yẽnda maana zakã. Zakã kɩreng ning sẽn sɩng ne rɩtg n dabd goabg sẽnẽ wã tara pɛɛl sẽn wʋg ne lamd gĩs-bãanega. Bãmb woglmã zemsa kãntɩɩg koabga, rẽndã n dag n yaa zakã.

¹⁰B lugla ra-lugds pisi zũud nao pisi wã zut pɛɛlã yĩnga, la a maana ra-lugdsã yagendsã ne b bãensã ne wanzuri.

¹¹La zakã kɩreng ning sẽn teesd nug-rɩtgã pɛɛlã yalem yaa kãntɩɩg koabg wa zakã woglem sẽn yaa bũmb ningã. La ra-lugds pisi ne zũud nao pisi n be be. La ra-lugdsã ne b bãensã yaa wanzuri.

¹²La kɩreng ning sẽn be nin-taoorã pɛɛl yalem yaa kãntɩɩg pis-nu wa zakã yalem sẽn yaa bũmb ningã. La a tara ra-lugds piig ne b nao piiga. La ra-lugdsã tuiidsã ne b bãensã maana ne wanzuri.

¹³Zakã kɩreng ning sẽn teesd yaangã, wĩntoog sẽn pukdẽ wã yalem dag n yaa kãntɩɩg pis-nu.

¹⁴Zakã rignoor kɩreng a yembr pɛɛlã yalem zemsa kãntɩɩg piig la a nu ne b ra-lugds a tãabã, la b nao a tãabã.

¹⁵Zakã noor kɩreng a to wã me pɛɛlã yalem zemsa kãntɩɩg piig la a nu ne b ra-lugds a tãabã, la b nao a tãabã.

¹⁶Pɛɛl nins fãa sẽn gilg zakã wʋga ne lamd gĩs-bãanega.

¹⁷Ra-lugds nins sẽn gũbg zakã soga taab ne wanzuri bãense. B bola bãmb pugli wã ne wanzuri, la b naoã maana ne zũudu.

¹⁸Zakã noor fu-lillidgã wʋga ne gĩs sẽn yaa kẽeg haoo ne gĩs-moaama, la gĩs-miid ne lamd gĩs-bãaneg tʋʋm-mitba sẽn maandã. A yalem zemsa kãntɩɩg pisi, la a zãntlem yaa kãntɩɩg a nu, wa zakã peendã yalem sẽn yaa bũmb ningã.

¹⁹Zakã noor da-lugdsã yaa a naas ne b zũud nao a naase. Bãmb yagendsã maana ne wanzuri. B bãensã rag n yaa wanzuri, la b rag n bolga b pugli wã ne wanzuri.

²⁰B rag n maana sɛk roogã biili wã fãa, ne zakã sẽn gilg yẽnda wã biili fãa ne zũudu.

²¹Ad sɛk roogã sẽn yaa kaset roogã meeb gɛɛla. Gɛɛlã zemsa wa a Moyiis sẽn kõ Leevi nebã noor tɩ b maanã. Maan-kʋʋd a Aarõ biig a Itamaar n soog a yellã.

²²A Ʋʋr biig a Uuri biig a Betsaleyɛll sẽn yaa Zʋʋda buudã nedã maana bũmb nins fãa Sẽn-Ka-Saab sẽn dag n yeel a Moyiisã.

²³La a Ayisamak biig a Oholiyaab sẽn yaa Dan buudã nedã sõnga yẽnda. A Oholiyaab yaa kug-pɛɛsa, la sʋn-wʋgd sẽn kãt pɛɛl tɩ yɩ gʋlma, ne gĩs sẽn yaa kẽeg haoo, la gĩs-moaama, ne gĩs-miidu, la lamd gĩs-bãanega.

²⁴Sãnem nins fãa nebã sẽn kõ tɩ b rɩk n maan sɛk roogã tʋʋmdã zɩslem yaa kɩlo tusr la kobs-naas la pis-tã la a yoob la garem kobsi la pis-nu, sẽn zems ne sɛk roogã sẽn tar zɩslem makdg ning n makd sãnem zɩslmã.

²⁵La neb nins b sẽn sõdã yaoo wanzuri kɩlo tus a naase la kobs-wɛ, wa sẽn zems ne sɛk roogã sẽn tar zɩslem makdg ning n makd wanzuri zɩslmã.

²⁶Yõwã yaa sɛk roogã sɩkɛll pʋɩ-sʋka sẽn dat n togs tɩ wanzuri zɩslem garem a nii la bɛka, ned kam fãa b sẽn sõdã sẽn yao. Yaa raop nins fãa sẽn ta yʋʋm pisi, wall sẽn yɩɩd woto. Bãmb sõorã taa neb tus kobs-yoob la a tãabo, la kobs-nu la pis-nu.

²⁷B rõoga wanzuri zɩslem talã koabga, sɛk roogã naoã la fu-lillidgã ra-lugdsã naoã yĩnga. Bãmb yaa wanzuri nao koabga. Naoor a yembr fãa zɩslem zemsa talã, sẽn dat n togs tɩ kɩlo pis-naas la a wɛ.

²⁸La yẽnda rɩka wanzuri zɩslem sẽn zems kɩlo pisi la a wɛ la garem pis-nu la a yoob n maan da-lugdsã yagendse, la yẽnda luda ra-gilsã pugli wã ne wanzuri la a maan a bãensã.

²⁹Nebã sẽn kõ zũudã wa sẽn zems miningã, zɩslem zemsa kɩlo tus a tãab la kobs-naas la pis-yoob la a wɛ, la garem kobsi la pis-nii la a nii.

³⁰La yẽnda rɩka zũudã n maan sɛk roogã noor fu-lillidgã da-lugdsã naoã la zũudã tẽn-kugrã ne a zũud gãmbre, la tẽn-kugrã teed fãa.

³¹La ra-lugds nins sẽn gũbg zakã naoã ne ra-lugds nins sẽn be zakã noorã naoã, la sɛk roogã biili, la zakã biili fãa maana ne zũudu.