Read SEBR SÕNGO, 1998 Yikri 39 Bible Online

Yikri 39 - SEBR SÕNGO, 1998 bible

Yikri 39

¹B wʋga fut nins maan-kʋʋdbã sẽn na n yeelg n maan sɛk roogã tʋʋmdã ne gĩs sẽn yaa kẽeg haoo, la gĩs-moaam ne gĩs-miidu la lamd gĩs-bãanega. B maana a Aarõ fu-sõama wã wa Sẽn-Ka-Saab sẽn dag n yeel a Moyiisã.

²B maana maan-kʋʋr kãsem fuugã ne sãnem gĩsi, la gĩs sẽn yaa kẽeg haoo ne gĩs-moaama, la gĩs-miid ne lamd gĩs-bãanega.

³B kuda sãnem tɩ lebg faasga, n bẽes tɩ lebg wa gĩsi. La b kalma sãnemã ne gĩs sẽn yaa kẽeg haoo la gĩs-moaam ne gĩs-miid la lamd gĩs-bãanega, n wʋge, n kãd t'a yaa wa tʋʋm-mit sẽn tʋme.

⁴B maana bãg-tabds a yiib n tong maan-kʋʋd kãsem fuugã poorẽ la a taoore.

⁵B rag n naaga sẽbdg ning sẽn tar n sẽbgdẽ wã ne maan-kʋʋd kãsem fuugã n sẽ, la a tara sãnem gĩsi, la gĩs sẽn yaa kẽeg haoo ne gĩs-moaama, ne gĩs-miid ne lamd gĩs-bãaneg wa Sẽn-Ka-Saab sẽn dag n yeel a Moyiisã.

⁶B maana onigs kug n ning sãnem gãtsã pʋse. La Israyɛll kambã yʋy gʋlsa kugã zut wa tʋʋm-mit sẽn dɩk kɩtga, n bẽes kug n maan bãnde.

⁷La b ninga kugã maan-kʋʋd kãsem fuugã bãg-tabdẽ wã. Yaa kug sẽn na n tẽegd Israyɛll nebã yell wa Sẽn-Ka-Saab sẽn dag n yeel a Moyiisã.

⁸B maana yãoog lutg n bok ne sãnem gĩs sẽn yaa kẽeg haoo, la gĩs-moaam ne gĩs-miidu, la lamd gĩs-bãaneg t'a yaa wa tʋʋm-mitbã tʋʋma wa maan-kʋʋr kãsem fuugã.

⁹B maana yãoog lutgã ne pɛɛl a yiib sẽn pʋgl taaba, tɩ yɩ maoko. A woglmã zemsa nug-yakemd a yembre, la a yalmã me zemsa nug-yakemd a yembre.

¹⁰B rɩka kug nins b sẽn ning gãtsã pʋsã n ning yãoog lutga zug ruls a naase. Dẽenem rulgã tara sardoan ne topaaze, la emerood kuga.

¹¹Rulg a yiib soabã maana ne ɛskarbukl la safɩɩr ne diyama kuga.

¹²Rulg a tãab soaba tara opall ne agat la ametist kuga.

¹³La rulg a naas soaba tara kirzolite ne onigs la zaspe kuga. B ninga kugã sãnem gãtsã pʋsẽ.

¹⁴Kugã yʋy ne b sõor zemsa ne Israyɛll kom-dibli piig la a yiibã yʋyã. B gʋlsa bãmb zut ne kɩtg tɩ b yɩ wa bãnde. Kugr fãa tara a yembre.

¹⁵B kala wĩir ne sãnem yãoog lutga yĩnga.

¹⁶Bãmb maana sãnem gãts a yiibu, la sãnem nugbĩns a yiib sẽn yaa gilsi, la b ning sãnem nugbĩn-gils a yiibã yãoog lutgã kɩremsã gõdgr zĩis a yiibẽ wã.

¹⁷B tonga sãnem wĩy a yiibã ne nugbĩns nins sẽn be yãoog lutgã kɩremsã gõdgr zĩisẽ wã.

¹⁸La bãmb tonga sãnem wĩy a yiibã noy ne gãts a yiibã n ning maan-kʋʋd kãsem fuugã bãgd taoore.

¹⁹La b maana sãnem nugbĩns a yiib n ning yãoog lutgã kɩrems a naasã gõdgr zĩisẽ, la b ning nugbĩnsã pʋgẽ.

²⁰La b maana sãnem nugbĩns a yiib n ning maan-kʋʋd kãsem fuugã bãgd tẽngre zĩig ning sẽbdgã sẽn tong ne fuugã.

²¹B baoo wĩ-kẽeg n loe yãoog lutgã nugbĩnsã ne maan-kʋʋr fuugã nugbĩnsã, tɩ yãoog lutgã tõog n tabl maan-kʋʋr fuugã n da lak ye, wa Sẽn-Ka-Saab sẽn dag n yeel a Moyiisã.

²²Yẽnda wʋga maan-kʋʋr fuugã fu-wokã fãa ne gĩs-kẽega.

²³B kɩbga fuugã loor peendã tẽn-sʋka, n bal-a ne peend sẽn yaa taok t'a yɩ wa zabr fuug loore, t'a ra wa kẽeg ye.

²⁴B maana gernaad-dãmb ne gĩs sẽn yaa kẽeg haoo la gĩs-moaam ne gĩs-miidu la lamd gĩs-bãaneg n ning fuugã noore.

²⁵B maana bugla me ne sãnem halaal n ning gernaad-dãmbã sʋk n gilg fuugã noore.

²⁶Bugla ne gernaadã lɩʋʋsa taab n gilg fu-yor-bila noore. Fu-kãng yaa maan-kʋʋdbã kãsem tʋʋmd yĩng wa Sẽn-Ka-Saab sẽn yeel a Moyiisã.

²⁷B maana fu-yord me sẽn wʋg ne lamd gĩs-bãaneg a Aarõ ne a kom-dibli wã yĩnga.

²⁸La b maana zug peend ne lamd gĩs-bãanega, la pugli sẽn yaa sõama ne lamd gĩs-bãanega, la b maana põg-rãmb me ne lamd gĩs-bãanegã.

²⁹La b maana sẽbds n kãd-b ne gĩs sẽn yaa kẽeg haoo la gĩs-moaam ne gĩs-miid sẽn tar tʋʋm-mitbã nug tʋʋmd wa Sẽn-Ka-Saab sẽn dag n yeel a Moyiis t'a maanã.

³⁰B maana rĩ-tɛɛgã sẽn yaa sõama sẽn wilgd yẽnda welgrã ne sãnem, la b gʋlsa a zug ne kɩtg tɩ yɩ wa bãnde. A gʋlsmã yaa: Welga toor Sẽn-Ka-Saab yĩnga.

³¹La b loee yẽnda ne loɛtg sẽn yaa kẽeg haoo t'a zĩnd zug peendã zugu, a wa Sẽn-Ka-Saab sẽn dag n yeel a Moyiisã.

³²Yaa woto la b maan fu-roogã sẽn yaa sɛk roogã tʋʋmã n sɛ. Israyɛll nebã maana bũmb fãa tɩ zems wa Sẽn-Ka-Saab sẽn dag n yeel a Moyiisã. Bãmb maana woto bala.

³³Nebã talla sɛk zĩiga teed fãa n wa a Moyiis nengẽ. Yaa fu-roogã ne a teedã fãa, a sogds ne a ra-pegdã, la a ra-bɩlmã ne a ra-lugdsã ne b naoã,

³⁴la lutg ning sẽn maan ne pe-raad gãnd sẽn monemã, la lutg ning sẽn maan ne dofẽ-rãmb gãndã, la fu-lillidgã,

³⁵la kaset koglgã ne a ra-bɩlem la a limdã sẽn yaa bas-taal zĩigã,

³⁶la taablã ne a teedã fãa la kaset burã,

³⁷la fɩtl doagendgã b sẽn maan ne sãnem halaalã ne b fɩtl-dãmbã sẽn be b zĩisẽ wã, la b teedã fãa ne b kaamã fãa, la kaam sẽn na n ning fɩtl-dãmbã,

³⁸la sãnem tẽn-kugrã ne kaam sẽn pʋdgd maan-kʋʋdbã zut b sẽn welg bãmb b tʋʋmdã yĩng wakatã, la tɩdar zom sẽn na n yõog wisdu, la fu-lillidg sẽn na n ning fu-roogã noore,

³⁹la zũud tẽn-kugrã ne a gãmbrã sẽn yaa zũudã, la a ra-bɩlmã ne a teedã fãa, la pekr sĩngã ne a naoorã,

⁴⁰la zakã pɛɛlã ne a ra-lugdsã, la a ra-lugdsã naoã, ne zakã noor fu-lillidgã ne a wĩyã, la a biili wã, la a teedã fãa sɛk roogã tʋʋmd yĩnga,

⁴¹la maan-kʋʋdbã tʋʋmd fut b sẽn na n yeelg n maan sɛk roogã tʋʋmde. Yaa maan-kʋʋd a Aarõ fu-sõama wã ne a kom-dibli wã fut b sẽn yeelgd n maand maan-kʋʋr tʋʋmdã.

⁴²Israyɛll nebã maana tʋʋmdã fãa tɩ zems wa Sẽn-Ka-Saab sẽn yeel a Moyiisã kɛpɩ.

⁴³A Moyiis gesa tʋʋmdã fãa n mik tɩ bãmb maana wa Sẽn-Ka-Saab sẽn dag n yeel bãmb tɩ b maanã. La a Moyiis ninga bãmb zut barka.