Read SEBR SÕNGO, 1998 Yikri 4 Bible Online

Yikri 4 - SEBR SÕNGO, 1998 bible

Yikri 4

¹A Moyiis yeelame: «Israyɛll nebã ka na n tẽ maam, la b ka na n kelg maam ye. Bãmb na n yeelame tɩ Sẽn-Ka-Saab ka vẽneg b meng ne maam ye.»

²La Sẽn-Ka-Saab soka yẽnda yaa: «Yaa bõe n be fo nugẽ wã?» Yẽnda leokame: «Yaa dasaare.»

³La Wẽnnaam yeelame: «Lob-a tẽnga.» Dẽ, yẽnda lob-a-la tẽnga, la a lebga waafo. La a Moyiis zoee waafã taoore.

⁴La Sẽn-Ka-Saab yeela a Moyiis yaa: «Tẽeg f nug n gãd waafã zʋʋre.» A Moyiis tẽega a nug n gãd waafã, la a leb n lebga dasaar yẽnda nugẽ wã.

⁵Wẽnnaam yeelame: «Woto yaa sẽn na n yɩlẽ tɩ nebã tẽ tɩ Sẽn-Ka-Saab sẽn yaa bãmb yaab-rãmbã Wẽnnaam, n yaa a Abrahaam ne a Izak la a Zakoob Wẽnnaamã n vẽneg b meng ne foom.»

⁶Sẽn-Ka-Saab leb n goma ne yẽnda n yeele: «M kotame tɩ f tʋm f nugã f yãoogẽ wã.» Dẽ, yẽnda tʋma a nugã a yãoogẽ wã. La a sẽn yiis a nugã, wãood n dag n yõk a nugã t'a lebg pɛɛlg wa neeze.

⁷Dẽ, bãmb leb n yeela yẽnda yaa: «Lebs n tʋm f nugã f yãoogẽ wã.» La yẽnda lebs n tʋma a nugã a yãoogẽ wã. La a sẽn yiis a nugã n gese, a mikame t'a nugã leb n lebga wa yẽnda yĩngã fãa.

⁸Wẽnnaam yeelame: «Bãmb sã n ka tẽ foom, la b sã n ka sak n deeg dẽenem bãndã yĩnga, b na n tẽe yaoolem bãndã yĩnga.

⁹La bãmb sã n ka tẽ bãn-kãens a yiibã fãa, la b sã n ka sak n kelg fo koɛɛgã, bɩ f yãk Nill kʋɩlgã koom n pʋdg tẽn-koɛɛngã zugu, la kʋɩlgã koom fo sẽn na n yãkã na n lebga zɩɩm tẽn-koɛɛngã zugu.»

¹⁰A Moyiis yeela Sẽn-Ka-Saab yaa: «M Soaala, y kabre. Mam ka gom-minim soab ye. Ka zaamẽ, ka rabɩtẽ wall yãmb sẽn sɩng n gomd ne mam sẽn yaa yãmb tʋmtʋmdã zugẽ me ye. La yaa tɩ mam sɩng n yaa bidga.»

¹¹La Sẽn-Ka-Saab yeela yẽnda yaa: «Ãnda n kɩbg ninsaal noore? La ãnda n kɩtd tɩ ned lebg muk wall wʋnga, la ãnda n kõt ned nin wall a kɩt t'a lebg zoanga? Ka maam a Sẽn-Ka-Saab la?

¹²Moasã, bɩ f kẽng tɩ mam meng na n zĩnda ne fo noorã, la m zãms foom bũmb ning fo sẽn segd n togsã.»

¹³La a Moyiis leokame: «Y kabre, m Soaala! M kotame tɩ y tʋm yãmb sẽn dat-a soaba!»

¹⁴Dẽ, Sẽn-Ka-Saab sũur puuga ne a Moyiisi, la b yeelame: «Fo ba-biig a Aarõ sẽn yaa Leevi buudã nedã ka be la? Mam miime tɩ yẽnda tõe n goma naana-naana. Ade, yẽnda wat n na n sega foom. La yẽnda sã n yãnd foom, a sũur na n yɩɩ noogo.

¹⁵Dẽ, bɩ f gom ne-a n ning goamã a noorẽ. Mam na n zĩnda ne fo noorã, la m zĩnd ne yẽnda noorã, la mam na n wilga yãmb bũmb ning yãmb sẽn tog n maane.

¹⁶Yẽnda na n goma ne nebã fo yĩnga. La yẽnda na n lebga wa fo noore, la fo na n yɩɩ wa wẽnnaam yẽnda yĩnga.

¹⁷La bɩ f zã dasaarã f nugẽ, tɩ yaa yẽnda la fo na n tall n maan bõn-bãna.»

¹⁸Dẽ, a Moyiis yii zĩ-kãng n kẽng a rɛɛmb a Zetro nengẽ n tɩ yeel-a yaa: «M kota sor n kuil m ba-biisã sẽn be Ezɩptã nengẽ n tɩ ges b sã n ket n vɩɩme.» La a Zetro yeela a Moyiisi: «Kẽng ne bãane!»

¹⁹A Moyiis sẽn be Madiyã soolmẽ wã, Wẽnnaam yeel-a yẽnda: «Lebg n leb Ezɩpte. Bala, neb nins sẽn dag n baood foom n na n kʋ wã kiime.»

²⁰Dẽ, a Moyiis kɩtame t'a pagã ne a kom-dibli wã zomb bõense. La yẽnda leba Ezɩpt tẽnga. A Moyiis rag n zãada Wẽnnaam dasaarã a nugẽ.

²¹Sẽn-Ka-Saab yeela a Moyiis yaa: «Moasã, fo sẽn lebg n lebd Ezɩptã, ges mam sẽn ning bõn-bãn nins fãa fo nugẽ wã, n maan-b Faarõ taoore. Mam na n kɩtame tɩ Faarõ keng a sũurã n ka sak n kõ nebã sor tɩ b loog ye.

²²Fo na n yeela Faarõ yaa: «Ade, Sẽn-Ka-Saab yetame: ‹Israyɛll yaa mam bi-ribl-kãsenga.›

²³Mam yeta foom tɩ f bas m bi-riblã t'a kẽng n tɩ waoog maam. La fo sã n kɩɩs n ka bas yẽnda t'a kẽnge, mam na n kʋʋ fo bi-ribl-kãsengã.»

²⁴Bãmb sẽn wa n be so-toakã zugu, Sẽn-Ka-Saab sega a Moyiis sikã zĩigẽ, n baood n na n kʋ-a.

²⁵La a Sefoora rɩka kug-sɩleng n wãag a biigã yo-gãongo, n sɩɩs a Moyiis naoã la a yetẽ: «Fo yaa mam zɩɩm sɩda!»

²⁶A Sefoora sẽn yeel tɩ «mam zɩɩm sɩdã,» Sẽn-Ka-Saab basa a Moyiis taale, bãongã kẽesg yĩnga.

²⁷Sẽn-Ka-Saab yeela a Aarõ yaa: «Kẽng n tɩ seg a Moyiis we-raoogã pʋgẽ.» Dẽ, a Aarõ kẽngame n tɩ seg a Moyiis Wẽnnaam tãngã zugu, n mok-a.

²⁸La a Moyiis togsa a Aarõ goam nins fãa Sẽn-Ka-Saab sẽn gom ne yẽnda n tʋm yẽnda t'a tɩ togsã, la bõn-bãn nins fãa Sẽn-Ka-Saab sẽn kõ yẽnda noor t'a maanã.

²⁹A Moyiis ne a Aarõ kẽngame n tɩ tigim Israyɛll nebã kãsem-dãmbã fãa.

³⁰La a Aarõ togsa goam nins fãa Sẽn-Ka-Saab sẽn dag n gom ne a Moyiisã. Dẽ, a Moyiis maana bõn-bãnã nebã nifẽ.

³¹La nebã tẽeme. Bãmb sẽn wʋm tɩ Sẽn-Ka-Saab wa n na n sõnga Israyɛll nebã, tɩ la b yãnda bãmb namsgã, Israyɛll nebã sulga b zut n wõgemd tẽnga.