Read SEBR SÕNGO, 1998 Yikri 5 Bible Online

Yikri 5 - SEBR SÕNGO, 1998 bible

Yikri 5

¹Dẽ poore, a Moyiis ne a Aarõ kẽnga Faarõ nengẽ n tɩ yeel-a yaa: «Sẽn-Ka-Saab sẽn yaa Israyɛll Wẽnnaamã yetame: Bas mam nebã tɩ b kẽng n tɩ maan tigr mam yĩng we-raoogẽ wã.»

²La Faarõ leokame: «Sẽn-Ka-Saab yaa ãnda tɩ mam na n kelg bãmb koɛɛg n bas Israyɛll nebã tɩ b looge? Mam ka mi Sẽn-Ka-Saabo, la m ka na n bas Israyɛll nebã tɩ b loog ye!»

³A Moyiis ne a Aarõ yeelame: «Ebre nebã Wẽnnaamã waa tõnd nengẽ. Tõnd kotame tɩ y bas-d tɩ d kẽng n tɩ kẽn dasem a tãab kẽnd we-raoogẽ wã n maan maand n kõ Sẽn-Ka-Saab sẽn yaa tõnd Wẽnnaamã, tɩ b ra wa wẽ tõnd ne bã-loangd wall ne zabr sʋʋg ye.»

⁴La Ezɩpt rĩmã yeela bãmb yaa: «Moyiis ne a Aarõ, yaa bõe tɩ yãmb dat n kɩt tɩ nebã bas b tʋʋmã? Kẽng-y n tɩ maan-y y tʋʋm-wɛglã!»

⁵Faarõ yeelame: «Tẽngã nin-kãensã sẽn lebg wʋsg moasã wã la yãmb dat n kɩt tɩ bãmb bas b tʋʋm-wɛglã?»

⁶Badaar bala, Faarõ yeela tʋʋm taoor dãmbã ne sẽn gʋnd-b sɛbã yaa:

⁷«Ra leb-y n kõ-y nebã mood tɩ b wẽ tãn-koɛɛmã wa b sẽn mi n maand raasenkamã ye. Bɩ bãmb mensã kẽng n tɩ wʋke.

⁸La baoosgo, kɩt-y tɩ b wẽ tãn-koɛɛm tɩ b sõor ta wa b sẽn dag n wẽed raasenkamã, la y ra tol n boog b sõorã ye. Bala, nebã lebga kʋɩɩmba. Yaa rẽ n kɩt tɩ bãmb kelemdẽ n yetẽ tɩ b bas bãmb tɩ b kẽng n tɩ maan maoong n kõ bãmb Wẽnnaamã.

⁹Paas-y nin-bãmbã tʋʋmã, tɩ b ra leb n paam vɩʋʋg n kelg zĩrẽ goam ye!»

¹⁰Dẽ, tʋʋm-soaadbã ne nebã seb-gʋndbã yik n yiime n gom ne nebã n yeele: «Faarõ yeelame t'a ka na n leb n kõ yãmb mood ye.

¹¹Kẽng-y toor n tɩ bao mood zĩig ning yãmb sẽn tõe n paamẽ. La b ka na n boog yãmb tʋʋmdã baa bilf ye.»

¹²Dẽ, nebã sãeega Ezɩpt soolmã tɛk fãa n wʋk mood n wõr n kalem ne tãndã.

¹³La tʋʋm taoor dãmbã modga bãmb n yeele: «Maan-y yãmb daar fãa tʋʋmdã n sɛ, wa b sẽn dag n mi n kõt yãmb moodã wakatã!»

¹⁴Faarõ tʋʋm-soaadbã tol n pãba neb nins bãmb sẽn dag n yãk Israyɛll nebã sʋk tɩ b yaa seb-gʋndbã, n sok bãmb tɩ yaa bõe tɩ bãmb ka sak n wẽ tãn-koɛɛmã zaamẽ ne rũndã tɩ b sõorã ta wa b sẽn dag n mi n maand raasenkamã?

¹⁵Israyɛll nebã seb-gʋndbã kẽnga Faarõ nengẽ n tɩ yẽgem ne-a n yeele: «Yaa bõe tɩ yãmb maand tõnd sẽn yaa yãmb tʋmtʋmdbã a woto?

¹⁶B ka leb n kõt tõnd moodo, la b yaool n yet tõnd tɩ d wẽ tãn-koɛɛmã! B pãbda tõndo, tɩ yaool n yaa yãmb nebã n beege!»

¹⁷La Faarõ yeela bãmb yaa: «Yaa kʋɩɩm n tar yãmba! Y yaa kʋɩɩmb bala! Yaa woto n kɩt tɩ yãmb yetẽ tɩ y rat n kẽngame n tɩ maan maoong n kõ Sẽn-Ka-Saabo.

¹⁸Moasã, leb-y y tʋʋmdẽ wã. B ka na n leb n kõ yãmb moodo, la y na n wẽe tãn-koɛɛmã t'a sõorã ta wa yãmb sẽn mi n maand raasenkamã.»

¹⁹Israyɛll nebã seb-gʋndbã yãame tɩ b sẽn yeel bãmb tɩ b ra sak n boog daar fãa tãn-koɛɛmã sõorã, yaa yel-pakr pʋg la b kẽes bãmba.

²⁰Dẽ, bãmb sẽn yi Faarõ nengẽ wã, b sega a Moyiis ne a Aarõ sẽn dag n yas n gũud bãmba.

²¹B yeela a Moyiis ne a Aarõ yaa: «Bɩ Sẽn-Ka-Saab ges yãmb yell n bʋ yãmb bʋʋdo. Yãmb n maan tɩ Faarõ ne a tʋmtʋmdbã tugd beem ne tõndo. Yãmb dɩka zabr sʋʋg n ning b nugẽ tɩ b na n kʋ tõndo.»

²²Dẽ, a Moyiis lebg n kẽnga Sẽn-Ka-Saab nengẽ n tɩ yeele: «M Soaala, yaa bõe tɩ yãmb maan nin-bãmbã wẽnga? Yaa bõe tɩ yãmb tʋm maam?

²³Sẽn sɩng ne wakat ning mam sẽn kẽng Faarõ nengẽ n tɩ gom ne yãmb yʋʋrã, yẽnda maanda nebã wẽnga, la yãmb ka tol n fãag y nebã ye!»