Read SEBR SÕNGO, 1998 Yikri 9 Bible Online

Yikri 9 - SEBR SÕNGO, 1998 bible

Yikri 9

¹Sẽn-Ka-Saab yeela a Moyiis yaa: «Kẽng Faarõ nengẽ n tɩ yeel-a tɩ Sẽn-Ka-Saab sẽn yaa Ebre nebã Wẽnnaamã yetame: ‹Bas mam nebã tɩ b kẽng n tɩ waoog maam.

²Fo sã n zãgs n ka bas bãmb tɩ b looge, fo sã n ka kõ-b sore,

³Sẽn-Ka-Saab na n tẽega b nug n kɩt tɩ bã-loangdg sẽn tar pãng wa kʋ fo rũmsã sẽn be weoogẽ wã, ne f wiidã, la f bõensã, ne f yʋgma wã, la f niigã, ne f rũm-bãoonegã.

⁴Sẽn-Ka-Saab na n welga Israyɛll rũmsã toor ne Ezɩpt rũmsã. La Israyɛll rũng ba a yembr ka na n ki ye.

⁵Sẽn-Ka-Saab yãka wakat n yeele: Yaa beoog la m na n maan bõn-kãng tẽngã pʋga.

⁶La badaar vẽkembeoog bala, Sẽn-Ka-Saab sɩd maana wa b sẽn dag n yeelã. Bãmb kɩtame tɩ Ezɩpt rũmsã fãa ki, la Israyɛll rũng ba a yembr ka ki ye.

⁷Faarõ tʋma neb tɩ b tɩ gese, la b tɩ mikame tɩ Israyɛll nebã rũng ba a yembr ka ki ye. La baoosg zãnga, Faarõ sũur kengame t'a ka sak n bas Israyɛll nebã tɩ b loog ye.»

⁸Sẽn-Ka-Saab yeela a Moyiis ne a Aarõ yaa: Bao-y wʋng vũund n pids y nusã, t'a Moyiis lob-a yĩngr Ezɩpt rimã nifẽ.

⁹La tompeglmã na n lebga wubsg n bui Ezɩpt tẽngã fãa, n kɩt tɩ nod-tãoods yi ninsaalbã ne rũmsã sẽn be Ezɩpt tẽngã pʋgẽ wã zutu.

¹⁰Dẽ, bãmb baoo wʋng vũund n tɩ yals Faarõ taoore. La a Moyiis rɩk-a lame n fãeeg yĩngri. La a lebga nod-tãoods n be ninsaalbã ne rũmsã zutu.

¹¹Nod-tãoodsã sẽn dag n tar tɩtã-rãmb yĩnga, bãmb rag n ka leb n tõe n kẽng a Moyiis nengẽ ye. Bala, bãmb yĩnsã rag n pida ne nod-tãoods wa Ezɩpt neb a taabã.

¹²Sẽn-Ka-Saab kɩtame tɩ rĩmã sũur kenge. La rĩmã ka kelg bãmb ye. Yɩɩ wa Sẽn-Ka-Saab sẽn dag n yeel a Moyiisã.

¹³Sẽn-Ka-Saab yeela a Moyiis yaa: «Yik tõdbeoog n kẽng Ezɩpt rĩmã nengẽ n tɩ yeel-a tɩ maam a Sẽn-Ka-Saab sẽn yaa Ebre nebã Wẽnnaamã yetame yaa: Bas mam nebã tɩ b kẽng n tɩ waoog maam.

¹⁴Tɩ bala, so-kãngã, mam na n tʋma m toodã fo mengã zugu, la fo tʋmtʋmdbã ne nebã zugu, tɩ fo bãng tɩ mam ka tar to dũniyã zug ye.

¹⁵Mam sã n dag n kɩtẽ tɩ bã-wẽng yõk fo nebã, woto tɩ fo menemẽ-la dũniyã zugu.

¹⁶La mam basa foom tɩ f vɩɩmde, sẽn na n yɩlẽ tɩ fo yãnd mam pãngã, la tɩ mam yʋʋr saag dũniyã fãa pʋgẽ.

¹⁷Fo sã n leb n gɩdg mam nebã n ka bas-b tɩ b looge,

¹⁸mam na n kɩtame tɩ beoog wẽn-kãngã bɩ sapɩlem wʋsg ni ne pãnga, t'a buud zɩ n zĩnd Ezɩpte, sẽn sɩng a yẽbgrẽ wã hal tɩ ta moasã ye.

¹⁹Dẽ yĩngã, bɩ f kɩt tɩ b kẽes fo rũmsã ne bũmb nins fãa fo sẽn so tɩ be weoogẽ wã roogẽ. Rũms nins fãa ne neb nins fãa b sẽn ka kẽes roog pʋgẽ wã, sapɩlmã na n pãb bãmb tɩ b ki.»

²⁰A Faarõ tʋmtʋmdb kẽer sẽn dag n zoet Sẽn-Ka-Saabã kɩtame tɩ b tall b tʋmtʋmdbã ne b rũmsã n wa kẽes rotẽ.

²¹La neb nins sẽn ka geelg Sẽn-Ka-Saab goamã basa b tʋmtʋmdbã ne b rũmsã weoogẽ wã.

²²La Sẽn-Ka-Saab yeela a Moyiisi: «Tẽeg f nug n tees yĩngri, tɩ sapɩlem ni Ezɩpt tẽngã pʋgẽ, ninsaalbã ne rũmsã ne moodã fãa zutu.

²³Dẽ, a Moyiis zẽka a dasaarã n tees yĩngri. Sẽn-Ka-Saab kɩtame tɩ sa-tãs zĩndi, n kɩt tɩ sapɩlem ni, tɩ bugum sig tẽn-gãongã zugu. Sẽn-Ka-Saab kɩtame tɩ sapɩlem ni ne pãng Ezɩpt tẽngã zugu.

²⁴La sapɩlmã naaga ne bugum, la Ezɩpt tẽngã kibar pʋgẽ, Ezɩpt nebã zɩ n yãnd sapɩlem a woto buud ye.

²⁵Ezɩpt tẽngã fãa pʋgẽ, sapɩlmã sãama bũmb nins fãa sẽn be weoogã pʋgẽ wã, sẽn sɩng ne ninsaalbã tɩ tãag rũmsã. La sapɩlmã sãama pʋtã moodo, la a kao weoogã tɩɩs zãnga.

²⁶La yaa Gosɛn tẽngã pʋg bal la sapɩlmã ka ni. Yaa beenẽ la Israyɛll nebã rag n be.»

²⁷Dẽ, Faarõ kɩtame tɩ b bool a Moyiis ne a Aarõ, la a yeel-b lame yaa: «So-kãngã, mam beegame. Sẽn-Ka-Saab yaa tɩrga, la yaa maam ne m nebã n konge.

²⁸Dẽ wã, yõk-y Sẽn-Ka-Saab sɛɛga, tɩ b kɩt tɩ sa-tãsã ne sapɩlmã yalse. Woto, m ka na n leb n gɩdg yãmb tɩ y ra loog ye.»

²⁹La a Moyiis leoka rĩmã yaa: «Mam sã n wa n yi tẽngã, mam na n zẽka m nus n tees Sẽn-Ka-Saabo, la sa-kelemsã ne sapɩlmã na n yalsame. Woto, fo na bãng tɩ Sẽn-Ka-Saab n so dũniyã.

³⁰La mam miime tɩ ne rẽ fãa, foom ne f tʋmtʋmdbã kell n ka na n zoe Wẽnnaam Sẽn-Ka-Saab ye.»

³¹B sãama lamdã ne orzã tɩ bala, orzã rag n womame, la lamda rag n ninga puudu.

³²La mui wã ne bõn-koaadlã sẽn ka sãamã, yaa tɩ bãmb ka womd tao-tao ye.

³³A Moyiis yii Faarõ nengẽ, la a yi tẽngã. La yẽnda zẽka a nus n tees Sẽn-Ka-Saab sẽnẽ, la sa-tãsã ne sapɩlmã yalsame, la saagã me yalsame.

³⁴La Faarõ sẽn yãnd tɩ saagã ne sapɩlmã la sa-tãsã yalsame wã, a kell n maana yel-wẽnã, la yẽnda ne a tʋmtʋmdbã kenga b sũyã.

³⁵Faarõ kenga a sũurã n ka sak n bas Israyɛll nebã tɩ b looge, wa Sẽn-Ka-Saab sẽn dag n yeel a Moyiisã.