Read SEBR SÕNGO, 1998 A. Zoobe 11 Bible Online

A. Zoobe 11 - SEBR SÕNGO, 1998 bible

A. Zoobe 11

¹Naama tẽng rao a Sofaar leoka a Zoob yaa:

²«Goam wʋsg a woto na pa n ka paam leokre? Rẽ yĩnga yaa goam minim n kõt ned bʋʋm la?

³Fo tẽedame tɩ fo pẽg-m-mengã tõeeme tɩ nebã sĩnd b noor bɩ? Fo na n paoogda nebã tɩ ned ka ning f yãnde?

⁴Fo yetame: ‹Mam bãngrã zemsa zãnga, la mam yaa yɩlemd yãmb nifẽ.›

⁵La ade, Wẽnnaam sã n dag n datẽ goamã, b sã n dag n yaagẽ b noor fo taoore,

⁶b sã n dag n yeelẽ foom b yamã bõn-soalgdga, yam ning sẽn yɩɩd ninsaal tagsg zĩig sẽn zãrã, fo rag n na yaool n bãng tɩ fo wɛɛngẽ, Wẽnnaam luda fo kongrã kẽere.

⁷Fo tõe n bãnga Wẽnnaam sẽn tagsde, f tõe n bãnga Pãng-Soabã zems-zãngã sẽn taẽ?

⁸Bãmb zems-zãngã zãntlem yɩɩda sa-gãna. Fo tõe n maana bõe? A zulum yɩɩda kɩɩm-kulgu. Fo tõe n bãnga bõe a wɛɛngẽ?

⁹A woglem yɩɩda tẽngã, t'a yalmã yɩɩd ko-kãsengã.

¹⁰Wẽnnaam sã n loogdẽ, Wẽnnaam sã n pag ned doogo, Wẽnnaam sã n bool ned bʋʋdo, ãnda soab n tõe n gɩdg-a?

¹¹Bala, Wẽnnaam mii ninsaan-zĩrẽ-be-nebã. Bãmb nee wẽngã tɩ ka tũ ne toog ye!

¹²We-bõang sã n wa tõog n dog yir-bõanga, yalem me na n yaool n paam bãngre!

¹³Zoobe, fo sã n maneg f sũurã, la f sã n tẽeg f nus n tees Wẽnnaam,

¹⁴fo sã n zãag f meng ne tʋʋm-wẽnse, n ka bas tɩ kegr zĩnd f zakã pʋga,

¹⁵wakat-kãng la f na n tõog n zẽk f zug tɩ yell kaẽ ye. Fo na n paama sũ-keelem n ka zoe rabeem ye.

¹⁶Bala, fo na n yĩma f toogã, fo na n tẽega a yell wa ko-zoetem sẽn looge.

¹⁷Fo vɩɩmã na n leb n yãgame n yɩɩd wĩnto-sʋka, lik bida wã na n lebga wa be-vẽegre,

¹⁸fo pɛlg na n gãeeme, bala, tẽeb beeme. Baa ne fo sẽn dag n paam yãndã, fo na n gãanda ne bãane.

¹⁹Fo na n gãandame tɩ ned ka be n na n kẽes foom dabeem ye. Neb wʋsg na n baoodame tɩ fo ges b yelle.

²⁰Nin-wẽns nin na n yiigame, la bãmb ka na n tol n yãnd zĩ-soalgdg ye. Bãmb sẽn gũud yaa kũum bala!»