Read SEBR SÕNGO, 1998 A. Zoobe 14 Bible Online

A. Zoobe 14 - SEBR SÕNGO, 1998 bible

A. Zoobe 14

¹Ninsaal buud fãa pag sẽn dogã vɩɩm yaa koɛɛg n pid ne yɩɩre.

²Yẽnda yita wa tɩ-puug n wẽneg n lʋɩ. Yẽnda loogda wa sulunsuk n ka kaoosdẽ ye.

³La yãmb a Wẽnnaam nin bee yẽnda zugu! Maam la yãmb bool n na n bʋ ne!

⁴Ãnda soab n tõe n kɩt tɩ bõn-sõng yi bõn-dẽgd pʋgẽ? Yẽnda soab ka tol n beẽ ye!

⁵Sã n yaa tɩ yãmb pĩnd n yãka ninsaal dasem sõore, sã n yaa tɩ yãmb sõda kiis nins a sẽn na n kaoosã sõore, sã n yaa tɩ yãmb yãka wakat a sẽn ka na n gãndge,

⁶bɩ y wẽnemd y neng n bas-a t'a paam yolsgo, t'a tõog n paam sũ-noog wa tʋmtʋmd sẽn paam vʋʋsg daare.

⁷B sã n kɛ tɩɩga, tẽeb beeme t'a na n leb n tobame, n tão wila.

⁸A yẽga sã n lebg kʋd tẽngã pʋgẽ t'a giuugã sẽn vig tomẽ wã sɩng kũum,

⁹baoosgo, a sã n paam koom, a lebd n tobame n ning wil wa tɩ-polle.

¹⁰La ninsaal sã n ki, a pãngã sɛɛme. Ninsaal sã n maan kaalem, a bee yɛ?

¹¹Ko-kãsengã koom tõe n loogame. Kʋɩlsã koom sɛtame tɩ b lebg koeemse.

¹²Woto me, ninsaal gãandedame n ka leb n yik ye. Sa-gãongã sã n ket a zĩigẽ, ninsaal ka na n leb n yik ye. Yẽnda kõn tol n nek a gõeemẽ wã ye.

¹³Yãmb sã n dag n solgẽ maam kɩɩm-kulg pʋgẽ, n bas maam beenẽ tɩ m solg hal tɩ y sũurã sigi, n yaool n yãk wakat n kõ-m t'a sã n ta bɩ y tẽeg m yelle!

¹⁴Ninsaal sã n dag n kiid n vʋʋgdẽ, mam toogã rasem sõor tɛka, mam dag n na n yalsẽ lame n gũ hal tɩ ned a to wa led m zĩigẽ.

¹⁵Dẽ, yãmb sã n bool maam, mam na n sakame. Yãmb sũur dag n na n sãama ne mam sẽn yaa y nug tʋʋmdã.

¹⁶La moasã, yãmb sõta mam nao-yakmã fãa, n gũusd n get m yel-wẽnã.

¹⁷Mam beegrã fãa bee y korgã pʋgẽ, la yãmb na n peka m yel-wẽnã fãa.

¹⁸Tãng lʋɩtame n sãeege, la pĩig serga a zĩigẽ.

¹⁹Koom tõe n kɩtame tɩ kug pedse, la a sẽn zoetã, a kãagda tẽngã tom. Yãmb kɩtdame tɩ ninsaal tẽebã fãa sɛt a woto.

²⁰Yãmb tusd-a lame n lubdẽ n kɩt t'a loogdẽ. Yãmb sãam-a nengã n dig-a.

²¹A kambã sã n paamd waoogre yẽnda ka mi ye, la b sã n paamd paoogr me, a ka bãngd ye.

²²Yaa yẽnda mengã yĩngã la a namsda. Yẽnda maanda sũ-sãang a mengã yĩng bala.