Read SEBR SÕNGO, 1998 A. Zoobe 17 Bible Online

A. Zoobe 17 - SEBR SÕNGO, 1998 bible

A. Zoobe 17

¹Mam vʋʋsmã tulgame. Mam dasmã tara sɛɛb n dabda, mam lebga yaoog rẽnda.

²Sẽn gũbg-b maamã ka neb sẽn yaand maam la? Bãmb tʋyã kɩtame tɩ m ka tõe n gũs ye.

³Wẽnnaam mam kot-y lame tɩ y bas tɩ m teeg yãmb mengã. Sã n ka yãmba, ãnda soab n na n dɩk sard mam yĩnga?

⁴Yãmb kɩda b yamã tɩ b ka mi neer ye. Woto yĩngã, bɩ y ra kɩt tɩ b tõog ye.

⁵Bãmb wẽnda ned sẽn bool a zo-rãmb tɩ b wa naag-a n dɩ, tɩ yẽnda meng kambã yaool n yong n get n ka paamdẽ ye.

⁶Bãmb kɩtame tɩ m lebg bɛɛb-laada, tɩ b tʋbsd mam nengã kolkoodo.

⁷Sũ-sãangã kɩtame tɩ m nin pãng booge, mam faagame hal tɩ m yĩngã lebg wa sulunsuku.

⁸Woto, nin-tɩrs pɛleng yɩkda bõn-kãng yĩnga. La bʋʋm soab yik n zabda ne wẽn-kɩɩsa.

⁹Bɩ nin-tɩrg kell n yals a tɩrlem sor zug kãenkãe. La nug ning sẽn ka maand wẽng paamda pãng n paasdẽ.

¹⁰Bɩ yãmb fãa lebg n wa, lebg-y n wa-y tɩ d gese! Mam kõn tol n yãnd yam soab ba a yembr yãmb sʋkã ye.

¹¹Mam dasmã loogame, mam sẽn dag n maan saagr ninsã sãamame, bũmb nins mam sẽn dag n dat n maan ne m sũur fãa wã vaalame.

¹²Bãmb yetame tɩ yʋng yaa wĩntoogo, la lik bida pʋgẽ, bãmb yetame tɩ vẽenem kolgame.

¹³Mam gũuda bõe tɩ ka kɩɩm-kulgu? Lebga lik bida pʋgẽ la mam na n tɩʋ m gãagã.

¹⁴Mam boonda yaoog tɩ m ba! La m boond zũnzũur tɩ m ma, la m tão!

¹⁵Dẽ, mam tẽeb gũudum bee yɛɛnẽ? Ãnda n tõe n yãnd mam tẽeb gũudmã?

¹⁶Tõnd sã n wa tũ taab n sig tẽng tomẽ, yẽnda na n sig n taa kɩɩm-kulgu.