Read SEBR SÕNGO, 1998 A. Zoobe 2 Bible Online

A. Zoobe 2 - SEBR SÕNGO, 1998 bible

A. Zoobe 2

¹Daar a yembre, Wẽnnaam kom-dibli wã waa Sẽn-Ka-Saab taoore, la sʋtãana leb n tũu bãmb n kẽnge.

²La Sẽn-Ka-Saab soka sʋtãana yaa: «Fo yii yɛɛnẽ?» La a leokame: «Mam saad n gilgda dũniyã zugu.»

³Dẽ, Sẽn-Ka-Saab leb n soka yẽnda yaa: «Fo yãnda mam tʋmtʋmd a Zoob bɩ? Ned ka be dũniyã zug n yaa wa yẽnda ye. A Zoob yaa burkĩna, n yaa tɩrga, la a zoet Wẽnnaam n zãagd a meng ne wẽng maanego. Yẽnda yasa kãenkãe a burkĩndã pʋga, tɩ fo yaool n kɩt tɩ mam nams-a zaalem bala.»

⁴Sʋtãana leoka Sẽn-Ka-Saab yaa: «Gãongo, gãong yĩnga[2]! Ninsaal dɩkda a sẽn tar fãa n kõ a vɩɩm yĩnga.

⁵Dẽ wã, m kotame tɩ y sɩɩs a kõabã ne a yĩngã nemd n gese, mam mii vẽeneg t'a na n tʋʋsa yãmb n ka zoe y nif ye.»

⁶Sẽn-Ka-Saab yeela sʋtãana yaa: «Beneere, a bee fo nugẽ. Bũmb sẽn be bala, ra sɩɩs a vɩɩmã ye!»

⁷Dẽ, sʋtãana yii Sẽn-Ka-Saab nengẽ n looge. Yẽnda lobga a Zoob yĩn-gãong bã-toaag sẽn sɩng ne a nao-pʋsã n tɩ tãag a zugã.

⁸A Zoob rɩka sa-pees n zagemd a yĩngã, la a zĩ tompeglmẽ.

⁹A Zoob pagã yeel-a lame yaa: «Yãmb kell n yasa kãenkãe y burkĩndã pʋga? Tʋʋs-y Wẽnnaam la y ki!»

¹⁰La a Zoob leoka yẽnda yaa: «Fo gomda wa fo yaa yalma! Wẽnnaam dag n kõta tõnd naarã tɩ d reegdẽ, dẽ wã, d kõn sak n deeg toogã me sɩda!» Bõn-kãng fãa pʋga, a Zoob ka tol n maan yel-wẽnd a noorã goam pʋgẽ ye.

¹¹A Zoob zo-rãmb a tãabã, Tema tẽng rao a Elifaaze, Suhit tẽng rao a Bildaad ne Naama tẽng rao a Sofaar wʋma tood nins fãa sẽn paam a Zoobã. Bãmb ned kam fãa yi a tẽngẽ n wa, la b yẽsa ne taab n na n kẽng n tɩ yãb a Zoob la b bels-a.

¹²A Zoob zo-rãmbã sẽn zĩnd yɩɩg n tool n yãnd a Zoobã, b tudg-a lame. Dẽ, bãmb sɩngame n yãbd wʋsgo. Bãmb pãrsa b futu, la b wʋkd tom n lobd yĩngr tɩ rʋʋgd b mens zutu.

¹³Bãmb naaga a Zoob n zĩnd tẽng rasem a yopoe la yʋnd a yopoe. Bãmb ned ba a yembr ka tol n tõog n yaag a noor n yeel a Zoob tɩ bũmb ye. Bala, b rag n neeme t'a Zoob toogã yaa kãseng wʋsgo.