Read SEBR SÕNGO, 1998 A. Zoobe 20 Bible Online

A. Zoobe 20 - SEBR SÕNGO, 1998 bible

A. Zoobe 20

¹Naama tẽng rao a Sofaar leokame yaa:

²«Bũmb ning mam sẽn tagsdã kɩtame tɩ m ka tõe n tõog m noorã n ka leok foom ye.

³Mam wʋmda paoogr goam sẽn zabd maam. Mam mii m sẽn na n leok tɩ bũmb ninga.

⁴Fo ka bãng tɩ hal kʋdemd wẽndẽ, hal wakat ning b sẽn ning ninsaal tẽng zugã,

⁵nin-wẽng sũ-noogã ka tõe n kaoos la?

⁶Baa yẽnda woglmã sã n zẽk n tat saagã, baa yẽnda zugã sɩɩsd sawatã,

⁷yẽnda na n menema wakat fãa yĩng wa a meng bĩndã. La a mitbã na n sokame t'a bee yɛ?

⁸Yẽnda na n looga wa yʋng zãmsd tɩ b ka leb n yãnd-a ye. B na n diga yẽnda t'a loog wa yʋng vẽnegre.

⁹Neb nins sẽn da minim n yãt yẽnda wã ka na n leb n yãnd-a ye. La zĩig ning yẽnda sẽn dag n be wã me ka na n leb n yãnd-a ye.

¹⁰Yẽnda kom-dibli wã na n yaoo naong rãmba. La yẽnda meng nug n na n lebs bũmb nins a sẽn dag n deeg tɩ yaa a arzegsã.

¹¹Yẽnda yĩngã tõr rag yaa wa bi-bɩɩg yĩng n tar pãnga, la rẽnda fãa na n naag n gãand tẽng tom pʋgẽ.

¹²Wẽng sẽn dag n yaa noog yẽnda noorẽ wã, tɩ yẽnda solg-a a zelemd tẽngrã,

¹³n basd-a be t'a kaoosdẽ wã,

¹⁴yẽnda rɩɩbã na n leba a yãadẽ wã, n pa be n lebg wa põeer zẽnem.

¹⁵Yẽnda na n wʋba arzegs nins yẽnda sẽn dag n dɩ wã. Wẽnnaam na n vaaga bãmb n yiis yẽ pʋgẽ wã.

¹⁶Yẽnda yũuda põeer zẽnem. La ruruug zelemd n na n kʋ-a.

¹⁷Yẽnda kõn tol n leb n paam tɩ sɩɩd ne bĩis-gõeem zoet wa ko-zoetem wʋsg ye.

¹⁸Yẽnda na n lebsa bũmb nins fãa yẽnda sẽn dag n paamã. Yẽnda ka na n dɩ a leebgã yõod ye.

¹⁹Bala, yẽnda namsa naong rãmb n ka sõng-b ye. Yẽnda reega rot a sẽn ka me ye.

²⁰Yẽnda zoee bõn n ka bas ye. Yẽnda rat wʋsgã yĩnga, a laog ba a ye kõn põs ye.

²¹Yẽnda yão-beedã kɩtame tɩ bũmb ka kelldẽ ye. Woto, yẽnda sũ-noog ka na n kaoos ye.

²²La yẽnda sẽn tar bũmb fãa tɩ sekã, toog n na n paam-a.

²³A sẽn ket n baood n na n pids a pʋga wakate, Wẽnnaam na n tʋma b sũ-kãbgrã tɩ sig dɩ a yĩnsã.

²⁴Yẽnda sã n zoe n na n põs kut zab-teoogo, zũud peemd n na n kõs-a n sãage.

²⁵Yẽnda sã n feoog peemdã a yĩngẽ wã, a sã n yiis pĩimã sẽn pɩndã a sãoorẽ wã, yaa kũum dabeem n na n yõk-a.

²⁶Lik bida bĩnga yẽnda paoongã yĩnga. Bugum ned sẽn ka widg n na n dɩ-a. La bũmb ning fãa sẽn be yẽnda fu-roogẽ wã na yɩɩ bõne.

²⁷Yĩngr na n puka a kongrã. La tẽngã me na n yik n zaba ne-a.

²⁸Wẽnnaam sũ-puugrã daare, a yirã paoong fãa na n looga wa ko-zoetem n kãage.

²⁹Ad bũmb ning Wẽnnaam sẽn bĩng nin-wẽng yĩnga. Woto n yaa pʋɩɩr ning Wẽnnaam sẽn kõ yẽnda wã.»