Read SEBR SÕNGO, 1998 A. Zoobe 22 Bible Online

A. Zoobe 22 - SEBR SÕNGO, 1998 bible

A. Zoobe 22

¹Dẽ, Tema tẽng rao a Elifaaz yeelame:

²«Ninsaal tõe n nafa Wẽnnaam bɩ? Sẽn tar-a yam yaa a meng bal la a nafda.

³Fo sã n yaa nin-tɩrga, a nafda Pãng-Soabã bɩ? Fo manesem sã n yaa sõama, a nafda bãmb ne bõe?

⁴Rẽ yĩnga, yaa fo sẽn zoet bãmbã yĩng la b sɩbgd foom la b bʋʋd ne foom bɩ?

⁵Rẽ yĩnga, ka wẽngã n yaa wʋsg fo pʋgẽ sɩda? Rẽ yĩnga, fo kongrã ka loog nug sɩda?

⁶Fo rag n kɩtame tɩ f saam-biis gãneg b laog ne foom zaalem yĩnga. Fo rag n deesda bãmb fut n basd-b bɛɛla.

⁷Fo rag n ka kõt ko-yũud sẽn tar-a soab koom t'a yũ ye. La fo ka kõ kom sẽn tar a soab rɩɩb t'a rɩ ye.

⁸Pãng soab n dag n so tẽngã. Yaa sẽn tar-a zu-zẽkrã n zĩ a pʋgẽ.

⁹Fo kɩtame tɩ pʋg-kõap loog zaalem. La f maan kɩɩbs pãnga.

¹⁰Yaa woto n kɩt tɩ bẽdg yõk foom tɩ pelen-yɩk ling-fu.

¹¹Yaa lik tɩ f ka tõe n yãnd-a ye. La a koom lima foom.

¹²Wẽnnaam ka be hal yĩngr saasẽ sɩda? Ges ãdsã sẽn be yĩngr n zãr ne tõndã.

¹³Tɩ fo yaool n yetẽ: ‹Wẽnnaam mii bõe? Bãmb tõe n wẽdga lik bida n bãng yelle?

¹⁴Fo tagsdame tɩ sawat luda bãmb tɩ b ka tõe n yãnd ye, la b kẽnda sa-gãongã zugu.›

¹⁵Fo rat n tũu kʋdem-wẽndẽ sorã la? Sor ning nin-wẽnsã sẽn dag n tũ wã?

¹⁶B kãaga bãmb n loog tɩ wakat nan ka ta ye, bãmb yẽbgrã looga wa ko-zoetem sẽn loogdã.

¹⁷Bãmb dag n yeta Wẽnnaam tɩ b zãag n bas bãmba. La b yetẽ tɩ Pãng-soabã tõe n maana bãmb bõe.

¹⁸Yaool n yaa Wẽnnaam n dag n pids bãmb zagsã ne laogã. Nin-wẽnsã saagr zãra ne maam.

¹⁹Nin-tɩrs na n yãnda bãmb lʋɩɩsã n maan sũ-noogo. Pʋ-peelem soabã sã n yãnd b lʋɩɩsã, a na n yaal-b lame.

²⁰Sẽn dag n zabd-b ne tõndã ka menem sɩda? Bugum ka rɩ bãmb paoongã sɩda?

²¹Bao zems-n-taar ne Wẽnnaam, la f na paam vɩ-bãane. Dẽ, f na n leb n paama vɩ-noogo.

²²Sak n deeg zãmsgã sẽn yit bãmb noorẽ wã, la f bĩng bãmb goamã f sũur pʋgẽ.

²³Fo sã n lebg n leb Pãng-Soabã nengẽ, b na n leb n lebsa foom f zĩigẽ, la fo na n kɩtame tɩ wẽnem zãag ne fo fu-roogã.

²⁴Rɩk f sãnem n lob tẽnga, la f lob Ofɩɩr tẽng sãnemã ko-soodã kug sʋka.

²⁵La Pãng-Soabã n na n yɩ fo sãnem la f wanzuri.

²⁶Dẽ, Pãng-Soabã na n yɩɩ fo sũ-noogo, la f na n zẽka f neng n ges Wẽnnaam.

²⁷Fo na n bõosa bãmba, la b na n leoka fo pʋʋsgo. La fo na n pidsa f pʋlengã.

²⁸Bũmb nins fo sẽn yãk yam n na n maanã na n tõogame, la vẽenem na n yãga fo sorã zugu.

²⁹Wẽnnaam sikda tɩtaam soabã, la b fãagda sik-m-meng soabã.

³⁰Bãmb na n fãaga ka-bʋʋm soabã. Fo sã n tar pʋ-peelem, fo na n paama fãagre.»