Read SEBR SÕNGO, 1998 A. Zoobe 29 Bible Online

A. Zoobe 29 - SEBR SÕNGO, 1998 bible

A. Zoobe 29

¹A Zoob kell n togsa a sũur koɛɛg n yeele:

²«Mam nongẽ-la m sã n dag n tõe n lebgẽ-la wa pĩndã, wakat ning Wẽnnaam sẽn dag n gũud maamã,

³wakat ning bãmb fɩtlã sẽn dag n yãgd mam zugã, tɩ mam kẽnd lik pʋgẽ ne bãmb vẽenemã.

⁴Yaa wakat ning mam sẽn dag n tar pãnga, tɩ Wẽnnaam gũud mam yirã ne nonglmã.

⁵Yaa wakat ning Pãng-Soaba sẽn dag n ket n be ne maamã, tɩ mam kom-dibli wã karg n gũbg maamã.

⁶Yaa wakat mam sẽn dag n waasd m nao ne bĩis-gõeem, la pĩisã rag n kiigda kaam tɩ zoet wa kʋɩls mam yĩnga!

⁷Mam sã n dag n yi n na n kẽng tẽngã noor n tɩ zĩndi, mam kɩtdame tɩ b maneg m zĩigã tẽngã sõasg zĩigẽ.

⁸Kom-bɩɩs sã n dag n yãnd maam, bãmb loogdame, la nin-kẽembã sã n dag n yãnd maam, b yikdame n yals yĩngri.

⁹Nanambsã rag n basda b goamã, n dɩk b nus n pĩ b noore.

¹⁰Nin-kãsems rag n sĩndida b noore, tɩ b zɛlma tabend b ragsendagse.

¹¹Bala, ned ning fãa sẽn dag n kelgd maam rag n yetame tɩ mam yaa sũ-noog soaba. Sẽn dag n yãnd-a maam kɩta mam kaseto.

¹²Sɩd me, naong soab sã n dag n kelem n kos sõngre, mam sõngd-a lame. La m sõngd kɩɩbs sẽn ka tar ned sẽn na n sõng-bã.

¹³Sẽn kiid-bã kãab-nood rag n sigda mam zugu. La mam dag n kɩtdame tɩ pʋg-kõap tar sũ-noogo.

¹⁴Mam dag n yera tɩrlem wa fuugu. Zemsgo n dag yaa mam fuyorgo la m zu-vindga.

¹⁵Mam yɩɩ wa nin zoens yĩnga, la m yɩ wa nao põyã yĩnga.

¹⁶Mam dag n yaa naong rãmb baaba. Mam dag n maoodame n get sãan yell sõama.

¹⁷Mam dag n sãamda nin-wẽns pãng n fãagd neb nins bãmb sẽn namsdã.

¹⁸Mam dag n tagsdame tɩ m na n ki m gãagẽ, la m yʋʋmã rag n na n yɩɩ wa bĩisri.

¹⁹La m dag n yetẽ tɩ mam yẽgã na n tãoome n tãag koom noor tɩ meenem madgd mam vãadã yʋngo.

²⁰Mam ziirã rag n na n palemda m pʋgẽ. Mam tãpã rag n na n talla pãng m nugẽ.

²¹Neb rag n basdame n kelgd maam, neb rag n sĩnda b noor n kelgd mam saglse.

²²Mam sã n gome ned ka kɩɩsd ye. La mam goamã rag n sigda b fãa zutu.

²³B rag n gũuda mam leokr wa b sẽn gũud saag niibu. B yaagda b noy wa sigr saag sẽn kaoosd waoongo.

²⁴Mam dag n yõgemda m noor ne bãmba, la bãmb dag n ka tẽed maam ne rẽ ye. Bãmb dag n deegda rẽnda ne sũ-noogo.

²⁵Maam n dag n wilgd bãmb b sẽn tog n maanẽ. Maam n dag n yaa wa bãmb naaba. Mam dag n yaa wa rĩm sẽn be a zãma sʋka, la m yaa ned sẽn belsd sũ-sãang rãmba.»