Read SEBR SÕNGO, 1998 A. Zoobe 33 Bible Online

A. Zoobe 33 - SEBR SÕNGO, 1998 bible

A. Zoobe 33

¹Zoobe, moasã, kelg m goamã. Yok f tʋbr n kelg mam goamã fãa.

²Gese, mam yaagda m noore. Mam zelemd n be m dagsendakẽ n gomda.

³Yaa ne pʋ-peelem la m na n gome. Yaa bãngr sɩd bal la m noorã na n togse.

⁴Yaa Wẽnnaam sɩɩgã n naan maam. Yaa Pãng-Soab vʋʋsmã n kõ maam vɩɩm.

⁵Fo sã n tõe bɩ f leok maam, segl f meng n yik n yals mam taoor n gome!

⁶Gese, Wẽnnaam taoore, mam yaa wa foom bala. Bãmb naana maam me ne tẽng tom.

⁷Woto, tõog ning mam sẽn tar n gomdã ka na n kẽes-f rabeem ye. La mam sẽn tar noor ningã ka na n nams-f ye.

⁸Fo gomame tɩ m tʋb wʋme. Mam wʋma fo sẽn gome:

⁹«Mam tara bʋʋm, m ka tar beegr ye, mam zemsame, kongr ka be mam pʋgẽ ye.

¹⁰La yaa Wẽnnaam n baood n dogl maam yelle, bãmb geta maam wa b bɛyã.

¹¹Bãmb balga mam naoã n gũusd bũmb nins fãa mam sẽn maandã.»

¹²La mam na n leoka foom tɩ rẽ pʋgẽ, fo ka tar bʋʋm ye. Bala, Wẽnnaam yaa kãseng n yɩɩd ninsaala.

¹³Bõe yĩng tɩ f baood n zab ne wẽnde? Yaa bãmb sẽn ka leokd fo goamã fãa wã yĩng bɩ?

¹⁴Bala, Wẽnnaam gomda ne mansem buud toor-toore, la nebã ka maand gũusg ye.

¹⁵Bãmb gomda ne nebã zãmsd la ne yʋng vẽnegr pʋga, b sẽn wat n be gõe-zulung pʋg wakate, la b sẽn wat n gãe b gãagẽ n gõe.

¹⁶Bãmb gomda ninsaalb tʋbẽ, n wilg vẽenega b sẽn dat tɩ b gũus ne bũmb ninga,

¹⁷sẽn na n yɩlẽ tɩ ninsaal bas a tʋʋm-wẽnsã la b gũ sẽn tara pãng ne a wã wilg-m-mengã,

¹⁸la b fãag-a ne bokã la ne bẽdgo, tɩ kãn-dibg ra yiis a vɩɩmã ye.

¹⁹Wakat ninga b remsda ninsaala n gãneg-a t'a gãe n bẽedẽ, tɩ tooga sãag n kẽ a kõabã,

²⁰Wakat kãnga, a ka leb n nong rɩɩb ye. A ka leb n dat rɩ-nood ye.

²¹A yĩngã faagdame tɩ nebã neẽ, a kõabã ned sẽn dag n ka ne wã pukame.

²²Wakat-kãnga, yẽnda kolgda a yaoogo, a kolgda sẽn wat-b ne kũumã.

²³Malɛɛk-rãmb tusr sʋka, malɛɛk a ye sã n be n na n yõk Wẽnnaam sɛɛg n kõ-a, n wilg ninsaal a sẽn tog n maane,

²⁴yẽnda sã n zoe a nimbãaneg n yeel tɩ b ra bas-a t'a sig yaoogẽ wã, mam paama yaood n yao!

²⁵Dẽ, a yĩngã na n leb n yɩɩ sõama wa yẽnda bi-bɩɩlmẽ wã. Yẽnda na n leb n lebga wa a sẽn dag n yaa to-to a bi-bɩɩlem wakatã.

²⁶Yẽnda na n pʋʋsa Wẽnnaam, la Wẽnnaam na n deeg-a lame t'a kẽng bãmb nengẽ ne sũ-noogo. Bãmb na n lebsa ninsaal a sõmblmã.

²⁷Yẽnda yɩɩnda nebã taoor n yetẽ: «Mam maana yel-wẽnã, mam golma sẽn yaa tɩrgã, la Wẽnnaam ka sɩbg-m wa sẽn zems m kongrã ye.

²⁸Wẽnnaam fãag-m-la wakat ning m sẽn dag n dabd yaoogẽ wã, la mam ket n vɩɩ vẽenemẽ.»

²⁹Ade, Wẽnnaam maanda a woto naoor a yiib wall a tãab ninsaal yĩnga,

³⁰n fãag-a ne yaoogã t'a zĩnd vẽenemẽ ne nin-vɩɩse.

³¹Zoobe, kelg maam, kelg maam neere. Sĩnd f noor tɩ yaa maam n gomde.

³²Fo sã n tar koɛɛg bɩ f leok-ma. Gom tɩ m dat n kõo foom bʋʋm.

³³Fo sã n ka tar goam sẽn na n leoke, bɩ f sĩnd n kelg maam tɩ m zãms-f yam.