Read SEBR SÕNGO, 1998 A. Zoobe 36 Bible Online

A. Zoobe 36 - SEBR SÕNGO, 1998 bible

A. Zoobe 36

¹A Elihu leb n kẽnga taoor n yeel yaa:

²«Maag f yĩng bilf tɩ m wilg-fu. Bala, mam ket n tara goam sẽn tõe n wilg tɩ Wẽnnaam tara bʋʋm.

³Mam na n dɩka m daar zãr bãngrã n wilg tɩ sẽn naan-a maamã tara bʋʋm.

⁴Bɩ f bãng tɩ mam ka yagd zĩrẽ ye. Ned ning fo sẽn ne f taoorã bãngr zemsa zãnga!

⁵Wẽnnaam yaa pãng soaba, la b ka sãbsd ned ye. Bãmb tara pãng b yam-yãkrã pʋgẽ.

⁶Bãmb ka basd nin-wẽng t'a vɩɩmd ye. La b sõngda b sẽn namsd neb ninsã.

⁷Bãmb ka wẽnemded n bas nin-tɩrg ye. Bãmb n zaoolgd rĩm-dãmb zaoorẽ, n kɩt tɩ b zĩnd be wakat fãa yĩng n deeg waoogre.

⁸La b sã n ning bãmb bãense, wall toog sã n paam bãmba,

⁹yaa tɩ Wẽnnaam dat n togsa bãmb b tʋʋmã ne b yel-wẽnã la b wilg-m-mengã

¹⁰n kɩt tɩ b kelg n paam zãmsgo, la b yeel-b tɩ b bas wẽng maanego.

¹¹Bãmb sã n kelg Wẽnnaam koɛɛgã n sake, bãmb na n zĩnda naar pʋg n tãag b tɛk daare, la b na n taa b yʋʋmã tɛk sũ-noog pʋga.

¹²La bãmb sã n ka kelg Wẽnnaam koɛɛgã, kãn-dibg n na n kõs-b tɩ b ki n ka bãng ye.

¹³Nin-wẽnsã sũy yikdame. Baa b sã n sɩbg bãmba, b ka pʋʋsd Wẽnnaam tɩ b sõng-b ye.

¹⁴Bãmb kiida b bi-bɩɩlem wakate? maoong zĩisẽ pʋg-yoaadbã sʋka.

¹⁵La Wẽnnaam kɩtdame tɩ sẽn namsdbã namsg fãag-ba. Bãmb tũnugda namsgã n yokd b tʋbã.

¹⁶Bãmb na n yiisa foom toog pʋgẽ me n ning foom zĩ-yaleng pʋgẽ, tɩ fo paam lohorem la b kɩt tɩ f zakã lɛɛg n pid ne rɩ-nood buud toor-toore.

¹⁷La fo sã n kaood bʋʋdã wa nin-wẽnga, bʋ-kaoorã ne zemsgã na n paalga foom.

¹⁸Ra sak tɩ f sũura sẽn puugã kɩt tɩ f maan wẽng ye. Ra sak tɩ yaood ning fo sẽn tog n yaoã kɩt tɩ f bʋdg ye.

¹⁹Fo kelemsã tõe sõnga foom tɩ f yi toog pʋgẽ bɩ? Fo pãngã ne f raoodã fãa tõe sõnga foom bɩ?

²⁰Ra wẽ sir n bao yʋng ning sẽn na sãamd nebã fãa wã ye.

²¹Gũus n da wa wẽnemd n maan wẽng ye. Bala, rẽndã n kɩt tɩ f paam namsgã.»

²²«Gese, Wẽnnaam wilgdame tɩ b yaa kãseng n tar pãnga. Ãnda soab n tõe n zãms ned wa bãmba?

²³Ned ka be n tõe n wilg bãmb sor ye. La ãndã n tõe n yeel bãmb tɩ b maana sẽn ka zemse?

²⁴Tẽeg n pẽg tʋʋm nins Wẽnnaam sẽn maan tɩ nebã tar n yɩɩndẽ wã.

²⁵Ninsaalbã buud fãa nee bãmba. Nebã geta bãmb yɩɩg-yɩɩga.

²⁶Gese, Wẽnnaam yaa kãsenga, la tõnd ka mi bãmb sẽn maandã võor ye. Ned ka tõe n bãng bãmb yʋʋmã sõor ye.

²⁷Bãmb takda koom n dʋʋs t'a wa lebg wulg n niida.

²⁸Sawatã basd-a lame t'a niida, a niida ninsaalbã buud fãa yĩnga.

²⁹Ned ka tõe n bãng sawatã ne Wẽnnaam sa-kelemsã yell ye.

³⁰Gese, bãmb gũbga b meng ne vẽenem zĩigã fãa, la bãmb luda zĩ-zulumsã ne ko-kãsengã.

³¹Bala, yaa ne bõn-kãens la bãmb kõt soolm dãmbã neb vɩɩm, la b kõt rɩɩb wʋsg tɩ sekdẽ.

³²Bãmb gãta sa-tãsã ne b nugu, n tʋm-a b sẽn dat zĩig ninga.

³³Bãmb sa-kelemsã wilgda bãmb waoongo. La baa rũmsã miime tɩ b waoongã kolgame.»