Read SEBR SÕNGO, 1998 A. Zoobe 38 Bible Online

A. Zoobe 38 - SEBR SÕNGO, 1998 bible

A. Zoobe 38

¹Sẽn-Ka-Saab koɛɛg yii sobg pʋgẽ n yeel a Zoob yaa:

²«Yaa yɛ ned n gom yalem goam n dat n sãam mam sẽn datã?

³Sẽbg f sɛɛg wa gãndaoog tɩ m sok tɩ f leoke.

⁴Mam sẽn wa n na n naan dũni tɩ fo bee yɛɛnẽ? Fo sã n tara yam bɩ f togse.

⁵Fo mii ned ning sẽn mak-a dũniyã? Wall yaa ãnda soab n tẽeg wĩir n mak-a?

⁶Yaa bõe n tebend a yẽbgrã t'a yasẽ wã? Ãnda soab n tilg a soakã zĩigẽ kugrã,

⁷tɩ yibeoog ãdsã lagem taab n yɩɩndẽ, tɩ Wẽnnaam kom-dibli wã fãa kaasd ne sũ-noogo?

⁸Ãnda soab n pag kʋɩlemsã n gɩdg ko-kãsengã koom sẽn pusg n yit tẽngã pʋgẽ wã?»

⁹Mam sẽn wa n lud-a ne wulgã, la m pil-a ne sawatã,

¹⁰mam sẽn wa n yiis m noyã n kõ-a tods n gɩdg-a ne kʋɩlemsã,

¹¹mam yeelame: «Fo na n yɛdg n tãaga ka, la f ka na n loog beenẽ ye. La bɩ fo ko-wĩ-kãsemsã yaas beenẽ!

¹²Fo sẽn dogã tɛka, fo zoe n kõo yibeoog noore? Fo zoe n tõog n kɩtame tɩ beoog vẽege?

¹³Fo tõog n kɩtame tɩ zĩig yẽeg tẽng zug wa ned sẽn dɩk fu-goabg n fugs t'a sagd rʋʋge?

¹⁴Zĩig sã n yẽege, tẽngã tekda wa ned sẽn dɩk yagd n maan dʋko, wall wa ned sẽn dɩk fuug n los gare.

¹⁵La b kɩtdame tɩ nin-wẽnsã vẽenem meneme, tɩ kang ning sẽn zẽkd-a wã kaooge.

¹⁶Fo tõog n taa hal ko-kãsengã ko-nin pʋsẽ bɩ? Fo tõog n kẽe ko-zulumsã bok pʋgẽ bɩ?

¹⁷B wilga foom kũum dignoor bɩ? Fo yãnda kɩɩm-kulg noor sɩda?

¹⁸Fo mii tẽngã yalem? Fo sã n mi yõwã fãa bɩ f togs-ma.

¹⁹So-bʋg n dabd vẽenem yiri? La lik yir bee yɛ?

²⁰Fo tõe n yãag-a lame n ta a toadgẽ n wilg-a sor t'a kuili?

²¹N-yẽe, fo miime, bala, fo reng-b lame n doge, la fo yʋʋmã sõor yaa wʋsgo.

²²Fo kẽnga neez bĩngr zĩigẽ bɩ? Fo yãnda sa-pɩlem bĩngr zĩig sẽn beẽ bɩ?

²³Mam bĩng-a-la toog wakat yĩnga, la zabr ne tẽn-kũum daar yĩnga.

²⁴Vẽenem tũuda so-bʋg n yãgda? Yaang sobg yita yɛɛnẽ n buiid dũniyã?

²⁵Ãnda soab n tuk sor n kõ ko-wĩiga, la a tuk sor n kõ sa-yãgb ne sa-tãse,

²⁶tɩ saag ni we-raoog pʋg neb sẽn ka beẽ, la a ni we-raoogẽ ninsaalb sẽn ka beẽ,

²⁷n kõ rasempʋɩɩsã koom n kɩt tɩ mood bul n yi beenẽ?

²⁸Sa-koom tara ba bɩ? La ãndã n dog meenemã sẽn dʋʋgdã?

²⁹Galaas ma yaa ãnda soaba? La ãnda soab n dog zɩɩvr sẽn yit yĩngrã?

³⁰Koom maanda a wãn n lebg wa kugri, tɩ ko-kãsengã zug lebg kãenkãe?

³¹Fo tõe n loee tɛtbã la f lok yʋʋm todsã wĩyã?

³²Fo tõe n kɩtame tɩ ãdsã puk sẽn zems b wakate, la f tɛ susã ne b kambã sɩda?

³³Fo mii yĩngr tõod bɩ? Fo tõe n dɩk-b lame n kɩt tɩ tẽng rãmb sak-b bɩ?

³⁴Fo tõe n zẽka f koɛɛg tɩ ta sawatẽ n kɩt tɩ saag ni n bui foom bɩ?

³⁵Rẽ yĩnga, foom n tʋmd sa-yãgb t'a kẽngdẽ, la f boond-a t'a sakdẽ?

³⁶Ãnda soab n kõ kʋɩl-peosg yam, la a kõ no-raoog bãngre?

³⁷Ãnda soab n tar yam n tõe n sõd sawatã, la a tõe n kɩll yĩngr ko-yũusã tɩ koom daag

³⁸n kɩt tɩ tom lebg tãndo, la a kɩt tɩ tãndagã naag taaba?»

³⁹«Rẽ yĩnga, foom n baood rɩɩb n kõt gɩgem-yãang bɩ? La foom n yiisd gɩgem-bi kom,

⁴⁰bãmb sẽn wat n wũg b zĩ-soalgdgẽ wã, la b sẽn wat n sor tuud pʋsẽ wã bɩ?

⁴¹Gãabdã sẽn mi n sãeeg tɩ kom tar-b tɩ b yãbd n boond Wẽnnaamã, yaa ãndã n kõt-b rɩɩbo?»