Read SEBR SÕNGO, 1998 A. Zoobe 39 Bible Online

A. Zoobe 39 - SEBR SÕNGO, 1998 bible

A. Zoobe 39

¹«Fo mii we-bʋʋsã sẽn dogd b kamb wakat ninga? Fo yãta walsã b sẽn wat n dogdẽ wã bɩ?

²Fo tõe n sõda b sẽn tʋtã kiis sõore? Fo mii wakat ning bãmb sẽn dogd b kambã bɩ?

³Bãmb põta b mens n dogd b kambã, la bãmb toogã loogdame n basd-ba.

⁴Bãmb kambã paamda pãng n bɩt zĩ-pɛɛlẽ wã, la b lakd n basd b ma-rãmb n ka leb n baood b zĩig ye.

⁵Ãnda soab n bas we-bõang t'a saad yaare? Ãnda soab n logs a sẽbrã n kõ-a lohorem?

⁶Mam kõo bãmb weoogã tɩ b zĩndi. Mam kõo bãmb lɛɛlgã tɩ b maan b yiri.

⁷Bãmb toog ka be ne tẽng pʋgẽ bʋrg ye. Bãmb ka wʋmd sẽn tɛt-a bõang tãsg ye.

⁸Bãmb gõoda tãms zut n gẽesd yamd zĩiga, n baood yam-maas meng-meng zĩiga.

⁹We-naaf sakd n tʋma fo yir sɩda? A sakd n gãee fo bãgrẽ yʋngo?

¹⁰Fo tõe n loee we-naaf ne wĩir n tɛt-a t'a kooda? A tõe n bee fo poorẽ n vuud wãg-koaadg sɩda?

¹¹Fo tõe n teeg-a lame t'a pãng n yaa wʋsg sɩda? Fo nan dɩka f tʋʋmã n bas ne-a t'a tʋmdẽ?

¹²Fo tõe n teeg-a lame t'a tigs f koodã, la a wʋk-a n wa rʋʋg f zɛɛgẽ wã sɩda?

¹³Neoong tẽegda a pɩgs ne sũ-noogo. La a ka tõe n yɩk wa bulwãoog ye.

¹⁴Neoong basda a gɛl tẽng tɩ tẽngã tom wɩng-ba.

¹⁵A ka tagsd bãmb yell tɩ daarninga ned tõe n wa beds-b lame, la a ka tagsd tɩ we-rũms me tõe n tab-b lame ye.

¹⁶A kengda a sũur ne a kamb wa ka yẽnda n so-b ye. Dabeem ka tar-a t'a namsgã na n wa yɩ zaalem ye.

¹⁷Yaa maam a Wẽnnaam n mong-a yam. Mam sẽn pʋɩ bãngrã, mam ka yãk n kõ-a ye.

¹⁸La yẽnda sã n yik n zoetẽ, a laada weef ne wed-rʋʋda.

¹⁹Rẽ yĩnga, yaa foom n kõ wiidã pãnga, la f ning-b yublã gɛd tɩ miimdẽ bɩ?

²⁰Rẽ yĩnga, foom n kɩt tɩ b yɩgd wa sʋyã? Yẽnda fĩisda ne yẽesem n yɛɛsd nebã.

²¹Weef bee longẽ n tibd ne pãng t'a sũur noomẽ. Yẽnda zoet n segda bɛɛbã zab-teedo.

²²Yẽnda toog ka be ne rabeem ye, a sũur ka kiuusd zabr sʋʋg taoor ye.

²³Sẽn zao-b yẽnda wã logd rãamd yitame. La b kãna ne b kãn-dibsã pɩndame.

²⁴A yɩgd n tirsda ne pãng n na n ning tĩiga. Baorg sã n peebe, a ka tõe n leb n yals ye.

²⁵A sã n wʋm baorg peebgo, a kelemdame. A wʋmda zabr yũug yɩɩga. La a wʋmda nanambsã koees ne zabrã kelemse.

²⁶Rẽ yĩnga, yaa fo bãngrã n kɩt tɩ wɩbg yɩkd yĩngr n tẽegd a pɩgs n teesd rɩtg bɩ?

²⁷Yaa foom n yeel pa-nand-tugr t'a yɩgd yĩngr la? Foom n yeel-a t'a tɩʋ a tʋk yĩngr sɩda?

²⁸Yẽnda bee pĩis zut n gãe be yʋngo, la pĩigã sẽkẽ n yaa yẽnda pãng zĩiga.

²⁹Yaa beenẽ la yẽnda zao n gẽesd zĩ-zãrsẽ n baood bũmb n na n yõk n dɩ.

³⁰A kambã yũuda zɩɩm. Bõn-kɩɩng sẽn be zĩig ninga, yẽnda bee beenẽ.»