Read SEBR SÕNGO, 1998 A. Zoobe 42 Bible Online

A. Zoobe 42 - SEBR SÕNGO, 1998 bible

A. Zoobe 42

¹A Zoob leoka Sẽn-Ka-Saab n yeel yaa:

²«Mam miime tɩ yãmb tõee bũmb fãa, la ninsaal tagsg ba a yembr ka lingd yãmb ye.

³Yãmb sokdame tɩ yaa ka-yam soab a bõe n dat n sãam yãmb sẽn dat n maan bũmb ningã. Mam goma m sẽn ka mi. Yaa bõn-kãsems sẽn yɩɩd maam, tɩ mam ka mi-b ye.

⁴M kotame tɩ f kelg tɩ m na n gomame. Mam na n soka foom tɩ f wilg-ma.

⁵Mam tʋbr dag n wʋmdame tɩ b gomd yãmb yelle. La moasã, mam nif yãnda yãmba.

⁶Rẽ kɩtame tɩ mam lebsd m noor poorẽ, la m maand m bãngẽ n zĩ tomẽ ne tompeglmẽ.»

⁷Sẽn-Ka-Saab sẽn gom ne a Zoob woto n sɛ, b yeela Tema tẽng rao a Elifaaz yaa: «Mam sũur yika ne foom ne f zo-rãmb a yiibã. Bala, yãmb ka gom mam yell neer wa m tʋmtʋmd a Zoob ye.

⁸Moasã, bao-y lols a yopoe ne pe-raad a yopoe, n kẽng mam tʋmtʋmd a Zoob nengẽ n tɩ maan maoong sẽn yõogd bugum y mensã yĩnga. La mam tʋmtʋmd a Zoob sã n pʋʋs maam yãmb yĩnga, mam sẽn nand-a wã yĩnga, mam na n deega a pʋʋsgã n ka maan yãmb wa sẽn zems y yalemdã ye. Bala, yãmb ka gom mam yell neer wa m tʋmtʋmd a Zoob ye.»

⁹Tema tẽng rao a Elifaaz ne Suwak tẽng rao a Bildaad ne Naama tẽng rao a Sofaar kẽngame n tɩ maan wa Sẽn-Ka-Saab sẽn yeel bãmbã. La Sẽn-Ka-Saab leoka a Zoob pʋʋsgã.

¹⁰Sẽn-Ka-Saab lebs n manega a Zoob vɩɩmã tɩ lebg wa a pĩndã, yẽnda sẽn pʋʋs a zo-rãmbã yĩngã yĩnga. Sẽn-Ka-Saab tol n paasa a Zoob bũmb nins fãa a sẽn dag n tarã naoor a yiib n yɩɩd pĩndã.

¹¹A Zoob ba-bi-raopã ne a ba-bi-pogsã fãa, la neb nins fãa sẽn dag n yaa yẽnda zo-rãmbã waa yẽnda nengẽ n wa naag-a n dɩ a zakã pʋgẽ. Bãmb yãba a Zoobe, la b bels-a, tood nins fãa Sẽn-Ka-Saab sẽn bas tɩ paam yẽnda wã yĩnga. La bãmb ned kam fãa kõ a Zoob ligd ne sãnem nugbĩnga.

¹²Sẽn-Ka-Saab ninga a Zoob bark a yaoolem yʋʋmã pʋgẽ n yɩɩd a sẽn dag n tar sɩngrẽ wã. A Zoob paama piis tus piig la a naase, ne yʋgmã tus a yoobe, la niig tus a yiibu, n paas bõn-yãans tusri.

¹³A Zoob lebs n paama kom-dibli a yopoe ne kom-pugli a tãabo.

¹⁴Yẽnda pʋda a pipi bi-puglã yʋʋr t'a Yemima, sẽn dat n togs tɩ walle, la a pʋd yiibẽ soabã yʋʋr t'a Ketsiya, sẽn dat n togs tɩ tɩdare, la a pʋd tãabẽ soabã yʋʋr t'a Kerɛn-Happuki, sẽn dat n togs tɩ kɩrʋ tʋko.

¹⁵Tẽngã gill fãa pʋga, b ka tol n yãnd pagb sẽn yaa neeb n yɩɩd a Zoob kom-pugli wã ye. Bãmb ba wã pʋɩ a paoongã n kõ bãmb ne b ba-bi-raopã.

¹⁶Rẽ zugẽ, a Zoob kell n leb n vɩɩmda yʋʋm koabg la pis-naas n paase. Yẽnda yãnda a kamba, ne a yagense la a yagen-tʋbrakẽese.

¹⁷Dẽ, a Zoob kʋʋlame n yaool n ki, la a paama yʋʋm wʋsg tɩ sek-a.