Read SEBR SÕNGO, 1998 A. Zoobe 5 Bible Online

A. Zoobe 5 - SEBR SÕNGO, 1998 bible

A. Zoobe 5

¹Kelem n gese! Rẽ yĩnga, ned na n leoka foom sɩda? Pʋ-peelem soab a bõe la f na n boole?

²Bala, yalem sũ-toog n kʋʋd-a, la ka-yam soab sũ-kiir n kʋʋd-a.

³Mam yãnda yalem sẽn paam pãnga, la tao-tao bala, mam kãaba a yirã wẽng n yeele:

⁴«Bɩ a kambã ra tol n paam sõngr ye! Bɩ b kong bʋʋm bʋʋd zĩigẽ, tɩ ned ka be n na n fãag-b ye!

⁵Bɩ yẽnda sẽn tʋm n paamã lebg komds rɩɩbo, la b sãag n dɩ ne sẽn be gõos sʋkã! Bɩ b bẽd-a n wʋk a paoongã zãnga.»

⁶Wẽng ka yit tẽng tomẽ ye, la toog me ka yit tẽn-gãong pʋgẽ ye.

⁷Ninsaal doga toog yĩnga, wa bug-pãrs sẽn zẽkd yĩngrã.

⁸Ne maam, mam na n baoo Wẽnnaam, la yaa Wẽnnaam la m na n togs m yellã.

⁹Bãmb maanda tʋʋm-kãsems sẽn ka tõe n togse, la b maand bõn-yɛɛsds sẽn ka tar sõore.

¹⁰Bãmb n sikd sa-koom dũniyã zugu, n kɩtdẽ tɩ pʋtã paamd koom.

¹¹Bãmb n zẽkd b sẽn paoog-b rãmbã, la yaa sũ-sãang rãmbã n paamd fãagre.

¹²Bãmb sãamda sɩlem dãmbã saagre, n kɩt tɩ b ka paam tõogr ne b nus tʋʋmã ye.

¹³Bãmb yõkda yam dãmbã b bãngrã pʋgẽ, la b kɩtdẽ tɩ yel-kɛg rãmbã saagr lebg zaalem.

¹⁴Yel-kɛg rãmbã segda lik bida wĩndga, la bãmb babenda wĩnto-sʋk wa yʋngo.

¹⁵La Wẽnnaam fãagda naong soab t'a põs b noorã zabr sʋʋga. La b fãag-a pãng soab nugẽ.

¹⁶Dẽ kɩtame, tɩ ka-pãng soab tar tẽebo, la nin-wẽng ka tar a sẽn na n yeel ye.

¹⁷Dẽ wã, bark bee Wẽnnaam sẽn demsd ned ningã zugu! Ra zãgs Pãng-Soabã zãmsg ye!

¹⁸Bala, yaa bãmb n pogende, la yaa bãmb n tɩpde. Bãmb wẽeda neda, la bãmb nus n maagd a soaba.

¹⁹Bãmb na n fãaga foom tood a yoob pʋga, la a yopoe soabã ka na n paam foom ye.

²⁰Kom wakate, bãmb na n fãaga foom tɩ f ra ki ye, la zabr wakate, b na fãaga foom ne zabr sʋʋga.

²¹Fo na n põsa zelem-toaag no-beedo, fo kõn tol n zoe rabeem ne sãoong sẽn wat ye.

²²Fo toog ka be ne sãoong la kom ye. Fo kõn zoe we-rũms rabeem ye.

²³Bala, fo na n maana kaool ne weoogã kuga, la we-rũmsã na n vɩɩmda bãan ne foom.

²⁴Fo na n vɩɩmda ne bãan f fu-roogã pʋga. Fo sã n kẽng n na n tɩ ges f sẽn so wã, fo na n mikame tɩ bũmb ka maan-b ye.

²⁵Fo na n paama yagens wʋsgo, la fo pendã neb na n lebga wʋsg wa tẽn-gãongã zug moodo.

²⁶Fo na n kʋʋla sõama n yaool n sig yaoogẽ, wa bɩle sẽn bɩ t'a kẽebg wakat yaool n ta wã.

²⁷Ade, tõnd veesa bõn-kãensã n gese, n mik tɩ sɩd yaa woto! Bee ne foom tɩ f wʋm la f sak n deege!