Read SEBR SÕNGO, 1998 A. Zoobe 7 Bible Online

A. Zoobe 7 - SEBR SÕNGO, 1998 bible

A. Zoobe 7

¹Ninsaal belmã dũni zug yaa bõe tɩ sã n ka tʋʋm-wɛgl tʋʋmã t'a rasmã yaa wa ned sẽn deegd kiuug yaoodo.

²Wa yamb sẽn baood maasmã, la wa tʋmtʋmd sẽn gũud a yaoodã,

³mam yẽ, mam pʋɩɩr yaa namsg kiis wʋsgo, mam sẽn paamd yaa toog yʋng fãa.

⁴Mam sã n gãande, m sokda m menga: «Wakat-bʋg la m na n yiki? Yʋngã lebga woko. Mam leebdame tɩ beoog vẽege.

⁵Mam yĩngã pida ne zũnzũiy la ne noada, mam yĩn-gãongã poome n yit meto.

⁶Mam dasmã loogda tao-tao n yɩɩd sʋn-wʋgd kʋnkʋɩrg tʋʋlem. Mam dasmã sɛtame. Tẽeb ka leb n beẽ ye!

⁷Wẽnnaam, tẽeg-y tɩ mam vɩɩmã yaa pemsem bala! Mam nin kõn tol n leb n yãnd vɩ-noog ye.

⁸Nif ning sẽn ne maamã kõn leb n yãnd maam ye. Yãmb na n baoo maam n konge.

⁹Sawat wɩlgdame n loogdẽ. Woto me, sẽn sigd-a kɩɩm-kulg ka na n leb n yiki,

¹⁰a ka leb n wat a yiri, la a sẽn dag n vɩ zĩig ningã ka leb n mi-a ye.

¹¹Woto n kɩt tɩ mam ka na n sĩnd m noor ye. Mam na n goma m sũ-sãangã pʋga, mam na n yẽgma m sũ-toogã pʋga.

¹²Mam yaa ko-kãseng bɩ m yaa wag-bɛɛg tɩ y na n ning gũudb tɩ b gũusd-ma?»

¹³Mam sã n yeel tɩ: «Mam gãagã n na n bels-ma, tɩ m sã n gãand la m yẽgengã na n wooge,»

¹⁴wakat-kãng la yãmb kẽesd-m dabeem ne zãmsdo, yãmb kẽesd-m-la yɛɛsg pʋg ne vẽnegre.

¹⁵Mam dag n nongẽ lame tɩ b sãr-ma, mam sẽn kiid n são m yĩngã sẽn lebg kõabã!

¹⁶Mam yamã yii ne m vɩɩmã! Mam ka na n vɩɩmd n ka ki ye. Bas-y-ma, mam dasmã loogda wa walem.

¹⁷Ninsaal yaa bõe tɩ yãmb nand-a, la y maand yɩɩr a yĩnga,

¹⁸n get a yell yibeoog fãa, la y makd-a n get wakat fãa?

¹⁹Dabʋr la y na n bas n ka leb n get-ma? Dabʋr la y na n bas-m tɩ m paam n vel m kolkoodo?

²⁰Ninsaalbã gũuda, sã n yaa tɩ mam maana yel-wẽnde, m yel-wẽndã maand-y-la bõe? Bõe yĩng tɩ y yãk maam n na n sɩbge? Mam vɩɩmã yaa zɩɩb ne yãmb ne bõe?

²¹Bõe yĩng tɩ y ka tõe n kõ m kongrã sugri, bõe yĩng tɩ y ka basd m beegrã taale? Bala, moasã, mam na n gãanda tẽng tom pʋga, la yãmb na n baoo maam, rẽ tɩ mam ka leb n be ye.