Read SEBR SÕNGO, 1998 A. Zoobe 9 Bible Online

A. Zoobe 9 - SEBR SÕNGO, 1998 bible

A. Zoobe 9

¹A Zoob leoka a Bildaad yaa:

²«Yaa sɩda, mam miime tɩ yaa a woto. Ninsaal na n maana a wãn n yɩ tɩrg Wẽnnaam taoore?

³Ned sã n dat n zab ne bãmba, a soab na n goma naoor tusri, tɩ b nan ka yaag b noor ye.

⁴Sã n yaa yam wall pãng soaba, ãndã n na n bao b noor n ka reeg toogo?

⁵Bãmb kɩtdame tɩ tãmsã sers n ka bãng ye. Bãmb sũ-puugrã pʋga b lubda bãmba.

⁶Bãmb kɩtdame tɩ tẽngã rigimd a sẽn beẽ wã, la a tebendsã miimdame.

⁷Bãmb sã n yeel wĩntoogã t'a ra puki, a ka pukd ye. Bãmb soga ãdsã tɩ b ka tõe n yi ye.

⁸Bãmb b yembr bal n yɛdg sa-gãongã, la bãmb n kẽnd ko-kãsengã zugu.

⁹Bãmb n naan susã ne yʋʋm-toadgã, la b naan tɛtbã ne ãds a taabã sẽn be rɩtgã.

¹⁰Bãmb maanda tʋʋm-kãsemse, la tʋʋm ned sẽn ka tõe n bãng b võor ye. B maanda bõn-yɛɛsds sẽn ka tõe n sõd n sɛ ye.

¹¹Gese, bãmb loogda mam sɛɛgẽ, la mam ka tõe n yãnd-b ye. Bãmb menemdame tɩ mam ka wʋmd a võor ye.

¹²Bãmb sã n yõk bũmb n deege, ãndã n tõe n lebs n deeg-a?» Ãnda n tõe n sok bãmb tɩ yaa bõe la b maanda?

¹³Wẽnnaam sũur sã n yiki, a sigsd ka be ye. Bãmb tabda Rahaab[4] sẽn teegã t'a sirgd bãmb taoore.

¹⁴La maam, mam na n leoka bãmb tɩ bõe? Gom-bʋg la mam na n gom bãmb taoore?

¹⁵Ba mam sã n yaa tɩrga, mam ka na n leok-b tɩ bũmb ye. Mam na n kell n yõka m bʋ-kaoodã sɛɛg t'a zoe m nimbãanega.

¹⁶Mam sã n bool bãmb tɩ b leok maam, mam ka na n tẽ tɩ b kelga maam ye.

¹⁷Bãmb pãbda maam ne b sob-bɛdã, la b yɩlemd mam poglgã zaalem bala,

¹⁸n ka basd maam tɩ m vʋʋs ye. La b kɩtdẽ tɩ sũ-toog sekd-ma.

¹⁹Sã n yaa ne pãnga, bãmb n yaa pãng soaba! La sã n yaa ne bʋʋd yelle, ãndã n tõe n bool maam bʋʋdo?

²⁰Ba mam sã n dag n yaẽ-la tɩrga, mam mengã noor goam n mongd maam bʋʋm. Ba mam sã n dag n beẽ-la burkĩndlim pʋga, mam noorã n na n wilg tɩ mam tara yelle.

²¹Rẽ yĩnga, mam yaa burkĩn bɩ? Ka maam n get m meng yell ye. Mam yamã ya n yii ne m vɩɩmã.

²²Ba sẽn yaa a soab fãa, ket n yaa bũmb a yembre. Rẽndã n kɩt tɩ mam yetẽ yaa: «Wẽnnaam sãamda burkĩna, wa b sẽn sãamd nin-wẽngã.

²³Sãoong sã n wa zĩig pʋgẽ n kʋʋda, Wẽnnaam toog ka be ne bʋʋm soab toog ye.

²⁴Bãmb dɩka dũniyã n kõ nin-wẽnse. Bãmb luda bʋ-kaoodbã nense. Sã n ka Wẽnnaam n maane, yaa ãnda soaba?

²⁵Mam dasmã loogda tao-tao n yɩɩd ned sẽn zoete. Bãmb loogdame n ka tol n yãnd vɩ-noog ye.

²⁶Bãmb loogda wa rudum koom koglgo, b loogda wa sɩlg sẽn fõt n dat n dɩk a rɩɩbo.

²⁷Mam sã n yeel tɩ mam dat n yĩma m yẽgengã, la m dat n basa m sũ-sãangã n leb n paam daoodo,

²⁸mam toodã kẽesda maam dabeem. Mam miime tɩ yãmb a Wẽnnaam ka na n ges maam wa ned sẽn ka tar yell ye.

²⁹Yaa maam n na n yɩ bɛɛgdã! Bõe yĩng tɩ m na n nams m meng zaalem?

³⁰Baa mam sã n so m meng ne ko-yɩlemde, mam sã n pegs m nusã ne zẽem,

³¹yãmb na n baas n kẽesa maam bɛgdẽ, la mam futã ka na n dat n sɩɩs-m ye.

³²Bãmb ka ninsaal wa maam tɩ m na n leok-ba, b ka ninsaal wa maam tɩ d tõe n bʋ ne taab ye.

³³Bʋ-kaood ka be n tõe n kẽ tõnd d yiibã sʋk n welg yellã ye.

³⁴Bɩ b zãag b rasaarã ne maam, tɩ b yɛɛsgã ra leb n kẽes-m dabeem ye!

³⁵Dẽ, mam na n gomame n ka zoe bãmb ye. La yellã sẽn ka a woto wã yĩnga, mam paada m yembr ne m menga!»