Read SEBR SÕNGO, 1998 Yɩɩn‑sõamyã 104 Bible Online

Yɩɩn‑sõamyã 104 - SEBR SÕNGO, 1998 bible

Yɩɩn‑sõamyã 104

¹Mam sũuri, pẽg Sẽn-Ka-Saabo! Sẽn-Ka-Saab sẽn yaa mam Wẽnnaam, yãmb sɩd yaa kãsenga! Yãmb pɩndame, la y pida ne ziiri!

²Bãmb yera vẽenem wa fuugu. Bãmb yɛdgda sa-gãongã wa fu-roogo.

³Bãmb tilgda b naamã zĩig koomã zugu, bãmb zaoo sawat wa saare, bãmb zaoo sobg pɩgs n kẽnda.

⁴Sebdã yaa bãmb koe-toagsdba, tɩ bug-witim yaa bãmb tʋmtʋmdba.

⁵Bãmb vigla tẽngã t'a yas kãenkãe, tẽngã yasame n ka tol n miimdẽ ye.

⁶Yãmb dag n lud-a-la ne bog-zulums wa fuugu, tɩ koomã rag n be tãmsã zutu.

⁷Yãmb sã n tãs koomã, a zoetame, koomã sã n wʋm y sa-tãsã, a zoetame.

⁸A zoet n dʋʋda tãmsã n sigd n kẽed londẽ wã, b kẽnda zĩig ning yãmb sẽn kõ-bã.

⁹Yãmb ninga toadg a sẽn ka tog n gãndge, sẽn na n yɩlẽ tɩ koomã ra wa lim dũni wã ye.

¹⁰Bãmb kɩtdame tɩ koomã zoet n kẽnd kʋɩlsẽ wã, koomã zoeta tãmsã sʋka.

¹¹We-rũmsã fãa tõe n wa yũu koomã. We-bõensã wat n yiisda b ko-yũud beenẽ.

¹²Liuuli wã sẽn yɩgd yĩngrã tʋɩta b tʋgd koomã noore, la b wʋmda b sẽn be tɩɩsã vãadã sʋk n yɩɩndẽ.

¹³Sẽn-Ka-Saab be b zĩigẽ wã saasẽ n zãgsd tãmsã koom. Yãmb tʋʋmã biis rɩlgda tẽn-gãongã tɩ seke.

¹⁴Bãmb kɩtdame tɩ moog yit tɩ rũmsã wãbdẽ, la b kɩtdẽ tɩ bõn-koaadl yit tẽn-gãongã zugu, tɩ ninsaalbã kood n paamd b rɩɩbo,

¹⁵la b paamd reezẽ rãam n yũud n noogd b sũuri, la b paamd kaam n zɛɛdẽ tɩ b nens põeeda, ne rɩɩb sẽn kõt-b pãnga.

¹⁶Sẽn-Ka-Saab tɩɩsã paamda koom tɩ sekd-ba, yaa Libã tɩɩsã bãmb sẽn selã.

¹⁷Liuuli wã wat n tʋɩta b tʋgd beenẽ, la rãong me maanda a tʋk sɩprɛs tɩɩsã zutu.

¹⁸Tãn-lug-lugã yaa we-bʋʋs yĩnga, tɩ pĩisã zut lebg kɩɩs soondg zĩiga.

¹⁹Sẽn-Ka-Saab naana kiuugã tɩ b tõe n bãng rayã n sõde, tɩ wĩntoog mi a kõom wakate.

²⁰Yãmb n kɩtd tɩ lik beẽ, tɩ lebg yʋngo, tɩ we-rũmsã fãa yit n gõodẽ.

²¹Gɩgem-poalã wũusdame n baood bũmb n na n yõke, b kotame tɩ Wẽnnaam kõ-b rɩɩbo.

²²Wĩntoogã sã n puki, gɩgem-poalã loogdame n kẽng b gãagẽ.

²³Ninsaal yitame n kẽng a tʋʋm zĩigẽ, la a tʋmdame n tãag zaabre.

²⁴Sẽn-Ka-Saabo, yãmb tʋʋmã sõor waooga! Yãmb maana y tʋʋmã fãa ne yam. Dũniyã pida ne bũmb nins yãmb sẽn naanã.

²⁵Ade, ko-kãsengã bedmame n yalme, tɩ rũm-bɛd ne rũm-bãooneg sẽn ka tõe n sõd n sɛ be a pʋgẽ n saagdẽ.

²⁶Koom kogl-bɛdã kẽnda koomã zutu, la yãmb n naan piryãong t'a reemd koomẽ wã.

²⁷Bãmb fãa geta yãmb tɩ y kõ-b b rɩɩb sẽn zems a wakate.

²⁸Yãmb sɩd kõt-b-la rɩɩbo, tɩ b reegdẽ. Yãmb sã n puk y nugã bala, b paamda rɩɩb tɩ seke.

²⁹Yãmb sã n solg y nenga, rabeem yõkd-b lame. Yãmb sã n deeg b vʋʋsmã, b kiidame n lebs tẽngã a tom.

³⁰Yãmb tʋmda yãmb vʋʋsem, n lebs n naan-ba. Yãmb n palemd tẽn-gãongã.

³¹Bɩ Sẽn-Ka-Saab ziirã zĩnd wakat sẽn kõn sa! Bɩ Sẽn-Ka-Saab maan sũ-noog b tʋʋmã yĩnga!

³²Sẽn-Ka-Saab sã n ges tẽngã, a rigimdidame. Bãmb sã n sɩɩs tãmsã, bug-zõos yita b pʋsẽ.

³³Mam na n yɩɩl n pẽga Sẽn-Ka-Saab m vɩɩmã tɛka. Mam na n yɩɩla ne yʋʋm-teed mam Wẽnnaamã yĩng m yõorã tɛka.

³⁴Bɩ mam kosgã ta bãmb yam! Mam na n maana sũ-noog Sẽn-Ka-Saab pʋgẽ!

³⁵Bɩ yel-wẽn-maandbã menem dũniyã zugu, tɩ nin-wẽnsã ra leb n zĩnd ye! Mam na n pẽga Sẽn-Ka-Saabo! Pẽg-y Sẽn-Ka-Saabo!