Read SEBR SÕNGO, 1998 Yɩɩn‑sõamyã 12 Bible Online

Yɩɩn‑sõamyã 12 - SEBR SÕNGO, 1998 bible

Yɩɩn‑sõamyã 12

¹A Davɩɩd yɩɩlle, yɩɩlã naab yĩnga. Yɩɩnda ne pɛndg sẽn tar sus a nii.

²Sẽn-Ka-Saabo, fãag-y-do! Bala, pʋ-peen-neb ka leb n beẽ ye. B ka leb n yãt sɩd dãmb ninsaalbã sʋk ye.

³Ned kam fãa yagda zĩrẽ ne a to, nebã gomda no-noom goamã, la sɩd yaool n ka be bãmb pʋgẽ ye.

⁴Bɩ Sẽn-Ka-Saab menes sẽn gomd-b no-noom goamã, la sẽn gomd-b wuk-m-men-goam

⁵n yetẽ: «Tõnd no-goamã kõt-d-la tõogre. Tõnd no-bɩmsã mii goamã, tõnd ka leb n zoet ned ye.»

⁶Sẽn-Ka-Saab yetame: «Moasã, naong rãmbã namsg yĩnga, ne nimbãan-nebã sidgr yĩnga, mam na n yikame n fãag b sẽn namsd-b rãmbã.»

⁷Sẽn-Ka-Saab goamã yaa sɩd hakɩɩka. B goamã yaa wa wanzuri b sẽn yɩlg boaagẽ naoor a yopoe.

⁸Sẽn-Ka-Saabo, yãmb n na n gũu yãmb goamã, la yãmb na n kogla tõnd wakat fãa ne zamaan-kãngã sẽn yaa nin-wẽns zamaanã.

⁹Ninsaalbã tʋʋm-beedã sẽn na n lebg wʋsg yĩnga, nin-wẽnsã na n gõoda zĩig zãnga.