Read SEBR SÕNGO, 1998 Yɩɩn‑sõamyã 130 Bible Online

Yɩɩn‑sõamyã 130 - SEBR SÕNGO, 1998 bible

Yɩɩn‑sõamyã 130

¹Zeruzalɛm kẽnd yɩɩlle. Mam bee zĩ-zulumsẽ n boond yãmb a Sẽn-Ka-Saabo!

²Zu-soaba, wʋm-y m boaalã! Kɩll-y y tʋbr n kelg m se-yõkrã!

³Zu-soabã Sẽn-Ka-Saabo, yãmb sã n dag n tẽegdẽ tõnd kongrã, ãnda soab n na n põse?

⁴La sugr bee yãmb nengẽ, tɩ nebã tõe n zoe yãmba.

⁵Mam maanda tẽeb ne Sẽn-Ka-Saabo, m tẽeda bãmb ne m sũur fãa. La mam tẽeda bãmb goamã.

⁶Mam maanda tẽeb ne Sẽn-Ka-Saabo, n yɩɩd gũudb sẽn gũud zĩig yẽegre, n yɩɩd gũudb sẽn gũud be-vẽegre.

⁷Israyɛll nebã, maan-y tẽeb ne Sẽn-Ka-Saabo, bala, bãmb yaa nonglem soaba. La bãmb tara soay buud toay-toay n fãagdẽ.

⁸Yaa bãmb n na n fãag Israyɛll ne a kongrã buud fãa.