Read SEBR SÕNGO, 1998 Yɩɩn‑sõamyã 145 Bible Online

Yɩɩn‑sõamyã 145 - SEBR SÕNGO, 1998 bible

Yɩɩn‑sõamyã 145

¹Mam Wẽnnaam, mam na n waooga yãmba, tɩ yãmb n yaa mam dĩma. Mam na n pẽga yãmb yʋʋrã wakat fãa.

²Mam na n pẽga yãmb n ka bas ye. Mam na n waooga yãmb yʋʋrã wakat fãa.

³Sẽn-Ka-Saab yaa kãsenga, la b zemsame tɩ reeg pẽgrã fãa. Ned ka tõe n bãng bãmb kaosengã tɛk ye.

⁴Bɩ zamaan woo zamaan nebã pẽg yãmb tʋʋmã, bɩ b moon yãmb tʋʋm-kãsemsã.

⁵Mam na n tagsa yãmb bõn-bãnã yelle, ne yãmb ziirã sẽn pɩndã yelle.

⁶B na n goma yãmb pãn-kãsengã yelle, la mam na n moona yãmb tʋʋm-kãsemsã.

⁷B na n tẽega yãmb tʋʋm-sõmyã yelle, n moon-ba, la b moon yãmb tɩrlmã yelle.

⁸Sẽn-Ka-Saab yaa sõmblem-soaba, la nimbãan-zoɛta, bãmb yaa sũ-mar soaba, la nonglem-kãseng soaba.

⁹Sẽn-Ka-Saab yaa sõmblem soab nebã fãa yĩnga, la b nimbãan-zoeerã yãagda bãmb tʋʋmã fãa.

¹⁰Sẽn-Ka-Saabo, yãmb tʋʋmã fãa na n pẽga yãmba, la sẽn tũud-b yãmbã na n pẽga yãmba.

¹¹Bãmb na n togsa yãmb naamã ziiri, la b na n goma y pãn-kãsengã yelle,

¹²n kɩt tɩ ninsaalb bãng yãmb tʋʋm-kãsemsã, ne yãmb naamã ziir sẽn yaa kãsengã.

¹³Yãmb naamã ka tar sɛɛb ye, la yãmb n so zamaan-dãmbã fãa.

¹⁴Sẽn-Ka-Saab kokda sẽn lʋɩtbã, la b yikd neb nins pãng sẽn sɛ wã.

¹⁵Bãmb fãa wẽnemd n geta yãmb n teeg yãmba, n gũudẽ tɩ y kõ-b rɩɩb wa sẽn zems a wakate.

¹⁶Yãmb sã n puk y nugã, sẽn vɩ-bã fãa paamda b sẽn dat tɩ seke.

¹⁷Sẽn-Ka-Saab yaa tɩrlem soab b sẽn maandã fãa pʋga, la b yaa sõmblem soab b tʋʋmã fãa pʋga.

¹⁸Sẽn-Ka-Saab pẽe ne neb nins sẽn boond bãmbã, b pẽe neb nins sẽn boond bãmb ne sɩdã.

¹⁹Sẽn-Ka-Saab pidsda sẽn zoet-b bãmbã ratem. B sã n bool-b n kos sõngre, bãmb wʋmdame n wa sõng-ba.

²⁰Sẽn-Ka-Saab gũuda neb nins sẽn nong bãmbã, la b sãamda nin-wẽnsã zãnga.

²¹Bɩ mam noorã waoog Sẽn-Ka-Saabo! Bɩ bõn-vɩɩsã fãa pẽg bãmb yʋ-sõngã.