Read SEBR SÕNGO, 1998 Yɩɩn‑sõamyã 148 Bible Online

Yɩɩn‑sõamyã 148 - SEBR SÕNGO, 1998 bible

Yɩɩn‑sõamyã 148

¹Pẽg-y Sẽn-Ka-Saabo! Zĩnd-y saasẽ n pẽg Sẽn-Ka-Saabo! Pa-y yĩngr n pẽg bãmba!

²Yãmb fãa sẽn yaa bãmb malegsã, pẽg-y bãmba! Yãmb fãa sẽn yaa bãmb tãb-biisã, pẽg-y bãmba!

³Bɩ wĩntoogã ne kiuugã pẽg bãmba! Bɩ ãdsã fãa sẽn kõt vẽneemã pẽg bãmba!

⁴Bɩ sẽn be-b hal saasẽ-saasẽ wã pẽg bãmba, la bɩ koomã sẽn be sa-gãongã yĩngrã, pẽg bãmba!

⁵Bɩ bãmb fãa pẽg Sẽn-Ka-Saab yʋʋrã! Bala, yaa Sẽn-Ka-Saab n gome, n naan bãmba.

⁶Bãmb vigl-b-la wakat sẽn kõn sa yĩnga. Bãmb vigla noor sẽn paad wakat fãa.

⁷Tẽng zug rãmba, pẽg-y Sẽn-Ka-Saabo, la bɩ koom pʋgẽ parwẽnã, ne zĩ-zulumsã fãa pẽg bãmba.

⁸Bugum ne sapɩlem, la neez[8] ne wulgu, foom a sobg sẽn sakd bãmb noore,

⁹tãmse, yãmb a kunkubã fãa, tɩɩs sẽn womd biisi, yãmb a sɛɛdr tɩɩse,

¹⁰rũmsi, yãmb a we-rũmsã fãa, bõn-vuudsi, liuuli,

¹¹dũniyã nanambse, ninsaalbã fãa, na-biisi, dũniyã bʋ-kaoodb gilli,

¹²kom-bɩɩs ne pʋg-sadba, nin-kẽemba, kom-bãoonego,

¹³pẽg-y Sẽn-Ka-Saab yʋʋrã! Bala, bãmb yʋʋrã bal n yaa kãsenga. Bãmb yʋʋrã ziir buiida yĩngr la tẽnga.

¹⁴Bãmb paasa b nebã pãnga, tɩ yaa pẽgr bãmb nin-nongdsã fãa yĩnga, la Israyɛll sẽn yaa buud ning sẽn pẽ bãmbã yĩnga! Pẽg-y Sẽn-Ka-Saabo!