Read SEBR SÕNGO, 1998 Yɩɩn‑sõamyã 25 Bible Online

Yɩɩn‑sõamyã 25 - SEBR SÕNGO, 1998 bible

Yɩɩn‑sõamyã 25

¹A Davɩɩd yɩɩlle. Mam Zu-soabã Sẽn-Ka-Saabo, mam zẽkda m neng n get yãmba.

²Mam Wẽnnaam, mam teega yãmba. Da-y bas-y tɩ yãnd yõk maam ye. Da-y bas-y tɩ m bɛɛbã tõog-m ye.

³Neb nins sẽn maand tẽeb ne yãmbã kõn tol n paam yãnd ye. La neb nins sẽn maand zãmb zaalmã na n paama yãnde.

⁴Sẽn-Ka-Saabo, kɩt-y tɩ m bãng y soayã, zãms-y maam yãmb soayã.

⁵Kɩt-y tɩ m kẽn yãmb sɩdã pʋga, la y zãms-b maam. Bala, yaa yãmb la Wẽnnaam sẽn fãagd maam. Mam maanda tẽeb ne yãmb wakat fãa.

⁶Sẽn-Ka-Saabo, tẽeg-y yãmb nimbãan-zoeerã ne y nonglmã sẽn sɩng n be hal wakat fãa wã yelle.

⁷Sẽn-Ka-Saabo, da tẽeg-y mam bi-bɩɩlem wakatẽ yel-wẽnã yell ye. Da-y tags-y mam kɩɩsgã yell me ye. Tẽeg-y mam yell wa sẽn zems y nonglmã, bala, yãmb yaa sõmblem soaba.

⁸Sẽn-Ka-Saab yaa sõmblem, la tɩrlem soaba. Rẽ n kɩte, tɩ bãmb wilgd yel-wẽn-maandbã sor ning b sẽn tog n tũ.

⁹Bãmb tɛta naong rãmbã tɩrlem pʋga. Bãmb zãmsda naong rãmbã tɩ b bãng bãmb sorã.

¹⁰Sẽn-Ka-Saab soayã fãa yaa nonglem ne sɩda, neb nins sẽn sakd bãmb kaoolã ne b tʋlsmã yĩnga.

¹¹Sẽn-Ka-Saabo, bɩ y kõ maam m beegrã sugri, y yʋʋrã yĩnga, bala, m beegrã yaa wẽng wʋsgo.

¹²Ãnda soab n zoet Sẽn-Ka-Saabo? Sẽn-Ka-Saab wilgda nin-kãng sor ning a sẽn tog n dɩke.

¹³Yẽnda na n vɩɩmda naar pʋga, la a yagensã na n sooga tẽngã.

¹⁴Sẽn-Ka-Saab vẽnegda b yel-solgdsã ne neb nins sẽn zoet bãmbã. Sẽn-Ka-Saab kɩtdame tɩ nin-bãmb bãng bãmb kaoolã.

¹⁵Mam geta Sẽn-Ka-Saab daar fãa. Bala, bãmb n fãagd maam ne bẽdgo.

¹⁶Wẽnemd-y n ges-y maam n zoe-m nimbãanega, bala, mam yaa m yembre, la m yaa nimbãan-neda.

¹⁷Mam sũurã pida ne sũ-sãamse. Bɩ y fãag maam ne m yel-pakrã.

¹⁸Ges-y mam namsgã ne m toogã, la y kõ maam m yel-wẽnã sugri.

¹⁹Bɩ y ges mam bɛɛbã sẽn yaa wʋsg to-to. Kisgr ning bãmb sẽn kis maamã tara pãnga.

²⁰Bɩ y gũ mam vɩɩmã, la y fãag-ma. Bɩ y ra bas tɩ yãnd yõk-m ye. Bala, yãmb la m zĩ-soalgdga!

²¹Bɩ burkĩndlim la tɩrlem gũ maam. Bala, mam maanda tẽeb ne yãmba!

²²Mam Wẽnnaam, fãag-y Israyɛlle. Fãag-y-yã-a ne a yel-pakdsã fãa!