Read SEBR SÕNGO, 1998 Yɩɩn‑sõamyã 37 Bible Online

Yɩɩn‑sõamyã 37 - SEBR SÕNGO, 1998 bible

Yɩɩn‑sõamyã 37

¹A Davɩɩd yɩɩlle. Ra yik f sũur ne nin-wẽng ye. Ra maan sũ-kiir ne tʋʋm-wẽns maandbã ye.

²Bala, b na n zelga tao-tao wa moodo, la b na n kʋɩɩ wa mo-maasa.

³Teeg Sẽn-Ka-Saab n maan neere, n zĩnd tẽngã pʋg n vɩɩmd bãane.

⁴Maan sũ-noog Sẽn-Ka-Saab pʋgẽ, la b na n kõo foom f sũur sẽn date.

⁵Bas f yell ne Sẽn-Ka-Saabo, teeg bãmba, la bãmb na manege.

⁶Bãmb na n kɩtame tɩ f tɩrlmã puk wa vẽenem, la b kɩt tɩ f zemsgã puk wa wĩnto-sʋka.

⁷Sĩnd f noor Sẽn-Ka-Saab taoore, la f ges bãmb bala. Ra yik f sũur ne ned ning sẽn paamd tõogr a saag-wẽns pʋga, la ne ned sẽn tõogd ne a tags-wẽns ye.

⁸Zãgs sũ-yikri, la f bas sũ-puugri. Sik f sũuri, t'a ra wa kɩt tɩ f maan sẽn yaa wẽng ye.

⁹Bala, b na n menesa tʋʋm-wẽns maandbã, la sẽn tẽed-b Sẽn-Ka-Saabã n na n soog tẽngã.

¹⁰Keta bilf bala, tɩ nin-wẽng ka leb n zĩnd ye! Fo na n gẽes-a lame n ka yãnd ye!

¹¹Sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga.

¹²Nin-wẽng saagd n dat n maana nin-tɩrg wẽnga, n wãbd a yẽn ne-a.

¹³La Zu-soabã laada yẽnda, bala, b neeme tɩ nin-wẽng daarã taame n sɛ.

¹⁴Nin-wẽns wõogda b sʋʋse, n dʋʋsd b tãbdo, n dat n lub nimbãan-ned ne naong soaba, la b baood n kood sẽn kẽnd-b so-tɩrg zugã.

¹⁵Bãmb sʋʋsã na n wẽneg n kõsa b mensã sũyã, la b tãbdã na n kaoome.

¹⁶Nin-tɩrg sẽn tar bũmb bilfu, n são nin-wẽns wʋsg sẽn tar arzegse.

¹⁷Bala, nin-wẽnsã kams na n kaoome, la Sẽn-Ka-Saab tebendeda nin-tɩrse.

¹⁸Sẽn-Ka-Saab mii burkĩmbã rasmã. Bãmb pʋɩɩr paada wakat fãa.

¹⁹La toog wakate, yãnd kõn yõk-b ye. Kom wakate, b na n dɩ n tɩgame.

²⁰La nin-wẽnsã na n sãamame. Sẽn-Ka-Saab bɛɛbã na n looga wa yam-maasa. Bãmb na n loogame, b na n looga wa bug-zõose.

²¹Nin-wẽng pengdame n ka lebsdẽ ye, la nin-tɩrg zoeta nimbãaneg n kõtẽ.

²²Bala, bãmb sẽn ning-b rãmb barkã n na n soog tẽngã, la bãmb sẽn kãab b rãmb wẽngã na n sãamame.

²³Sẽn-Ka-Saab kɩtdame tɩ ned kẽnd yɩ sõama, la a manesm tata bãmb yam.

²⁴Yẽnda sã n salge, a ka lʋɩt tẽng ye, bala, Sẽn-Ka-Saab gãda yẽnda nugu.

²⁵Mam yɩɩ yãaga, moasã, mam lebga nin-kẽema, la mam zɩ n yãnd tɩ b bas nin-tɩrga, wall a yageng t'a bõsd rɩɩb ye.

²⁶Wakat fãa, nin-tɩrg zoeta nimbãaneg n pengdẽ, la yẽnda yagensã paamda barka.

²⁷Zãag f meng ne wẽnga, n maan neere, la f na vɩɩmd tẽngã pʋg wakat fãa.

²⁸Bala, Sẽn-Ka-Saab nonga tɩrlem, la bãmb ka basd sẽn maand-b pʋ-peelem ne bãmbã ye. Bãmb paamda Sẽn-Ka-Saab gũudum wakat fãa, la nin-wẽns yagens sãamdame.

²⁹Nin-tɩrsã n na n soog tẽngã, la b na n paa beenẽ wakat sẽn kõn sa.

³⁰Nin-tɩrg noor yiisda yam goamã, la a zelemd togsda tɩrlem goamã.

³¹Yẽnda bĩngda a Wẽnnaamã tõog a sũurẽ. Yẽnda ka kẽnd n lagsdẽ ye.

³²Nin-wẽng gũusda nin-tɩrga, n baood n kʋ-a.

³³La Sẽn-Ka-Saab ka basd tɩ nin-wẽng paam-a ye. Bãmb ka sakd tɩ nin-tɩrg kong bʋʋm bʋʋd zĩigẽ ye.

³⁴Maan tẽeb ne Sẽn-Ka-Saabo, la f pa bãmb sorã zugu, tɩ bãmb na zẽk-fo, n kɩt tɩ f soog tẽngã. La fo na n yãnda nin-wẽnsã sãoongo.

³⁵Mam yãnda nin-wẽng a nin-toolmã pʋga. Yẽnda tãooda wa tɩ-polle.

³⁶Nin-wẽng loogdame, n ka leb n beẽ ye. Mam bao-a lame, n ka yãnd ye.

³⁷Maag f yĩng n ges burkina, la f ges nin-tɩrga. Sẽn baood-a vɩ-bãan tara beoog neere.

³⁸La b na n naaga kɩɩsdbã taab n sãame. Nin-wẽnsã ka tar beoog neer ye.

³⁹Sẽn-Ka-Saab n fãagd nin-tɩrse, yel-pakr wakate, Sẽn-Ka-Saab n yaa b pãng zĩiga.

⁴⁰Sẽn-Ka-Saab sõngd-b lame tɩ b põse. Bãmb na n sõng-b lame n kɩt tɩ b põs nin-wẽnse, n fãag-ba, bãmb sẽn baood zĩ-soalgdg bãmb nengẽ wã yĩnga.